الماتىدا دۇنيەجۇزىلىك تۇركى قۇرىلتايى جوعارعى كەڭەسىنىڭ «ينتەگراتسيا – دامۋدىڭ العىشارتى» تاقىرىبىندا وتىرىسى ءوتىپ جاتىر. وتىرىسقا تۇركى حالىقتارىنىڭ وكىلدەرى قاتىسىپ، تۇركى حالىقتارىنىڭ رۋحاني-مادەني سالاسىنداعى وزەكتى ماسەلەلەردى تالقىلاۋدا. وتىرىستى تالعات ءابدىجاپپاروۆ باسقارىپ، جۇرگىزۋدە. بۇل وتىرىسقا باشقۇرت، حاكاس، تۋۆا، ازەربايجان، وزبەكستان، قىرعىزستان، كيپر، ساحا ەلدەرىنەن كەلگەن تۇركىتانۋشى عالىمدار، قوعام قايتاركەلەرى قاتىسىپ جاتىر.

2 شىلدە كۇنى قىرعىزستانداعى شولپان اتا قالاسىندا ورنالاسقان شىڭعىس ايتماتوۆ اتىنداعى «رۋح وردا» مادەني ورتالىعىندا وتەدى دەپ جوسپارلانعان دۇنيەجۇزىلىك تۇركى حالىقتارىنىڭ قۇرىلتايى مادەني ورتالىققا بومبا قويلىعانى تۋرالى تەلەفوننان تۇسكەن جالعان تەررورلىق حابارلامانىڭ كەسىرىنەن وتپەي قالعان ەدى. وسىلايشا، 21 ەلدەن دەلەگات جيناپ، قۇرىلتاي وتكىزۋدى ءوز موينىنا العان قىرعىز ەلى ءوز جاۋاپكەرشىلىگىن اتقارا الماي، اتاۋلى جيىن باستالماي جاتىپ، تىعىرىققا تىرەلدى. وسىنداي ساتتە قۇرىلتايعا بارعان قازاق دەلەگاتتارى جانە «اتتيلا» كوشپەندىلەر مادەنيەتىن ساقتاۋ ورتالىعى» قوعامدىق قورى قۇرىلتاي جوعارعى كەڭەسىنىڭ رەسمي وتىرىسىن الماتىدا وتكىزۋ جايلى باستاما كوتەردى. باستاما الىس-جاقىن شەتەلدەردەن كەلگەن دەلەگاتتار تاراپىنان قولداۋ تاۋىپ، ءار ەلدەن كەلگەن دەلەگاتسيا ءوز ورتالارىنان وكىل تاڭداپ، الماتىداعى جيىنعا اتتاندىردى. وسىلايشا، بۇگىن الماتىدا قۇرىلتايدىڭ جوعارعى كەڭەسىنىڭ وتىرىسى ءوز جۇمىسىن باستادى. كەڭەس جۇمىسى ەكى كۇنگە جالعاسادى دەلىنىپ وتىر. قىرعىز ەلى تاراپىنان تىعىرىققا تىرەلگەن قۇرىلتايدى قۇتقارىپ، دەلەگاتتاردى الماتىعا اكەلىپ كۇتىپ، رەسمي وتىرىستى وتكىزىپ جاتقان قازاقستانعا تۇركى حالىقتارىنىڭ وكىلدەرى العىستارىن جاۋدىرىپ، تارتۋ-تارالعىلارىن جاسادى. قازىرگى ۋاقىتتا كەڭەس وتىرىسى 2018 جىلى قازاقستاندا وتەدى دەپ جوسپارلانىپ وتىرعان «دۇنيەجۇزىلىك تۇركى ويىندارى» جوباسىن تالقىلاپ، تۇركى ويىندارىنىڭ ءمان-ماڭىزىن دەلەگاتتارعا ءتۇسىندىرىپ، ءاربىر تۇركى حالىقتارىنا ءتان ويىندار جايلى جان-جاقتى مالىمەت ايتىلىپ، تالقىلانىپ جاتىر. بۇدان سوڭ "اتتيلا" اتتى دۇنيەجۇزىلىك كوشپەندىلەر ورتالىعىن قۇرۋ جوباسى تالقىلانباق.

كەڭەس وتىرىسىندا 2018 جىلى قازاقستاندا وتەدى دەپ جوسپارلانىپ وتىرعان «دۇنيەجۇزىلىك تۇركى ويىندارى» جوباسىن پرەزيدەنت ن.نازارباەۆتىڭ قولداپ، استانادان تۇركى ويىندارىن وتكىزۋگە ارنالعان نىسان سالۋدى تاپسىرعانى ايتىلدى. قازاقستان پرەزيدەنتىنىڭ بۇل قولداۋىن تۇركى حالىقتارىنىڭ وكىلدەرى ۇلكەن ريزاشىلىقپەن قابىلدادى.

ۇيىمداستىرۋشىلار كەڭەس وتىرىسىنىڭ ەكىنشى كۇنى استانادا وتەدى دەپ وتىر. استانادا قۇرىلتاي دەلەگاتتارى EXPO كورمەسىن ارالاپ، قازاقستان پرەزيدەنتىنە ارنايى سىيلىق تابىس ەتەدى دەپ كۇتىلىپ وتىر.

دۇنيەجۇزىلىك تۇركى حالىقتارى قۇرىلتايىنىڭ جوعارى كەڭەس وتىرىسىندا تالقىلانىپ جاتقان ماسەلەلەردى جانە فوتوسۋرەتتەردى قۇرىلتايدىڭ facebook-تەگى پاراقشاسىنان كورە الاسىزدار.

نۇرا ماتاي