جۇما, 29 ناۋرىز 2024
قۇيىلسىن كوشىڭ 11058 12 پىكىر 5 شىلدە, 2017 ساعات 12:36

مينيستر بولساڭ، مىرزاحمەتوۆتەي بول!

شەتتەن كوشىپ كەلىپ، شارۋاشىلىقپەن اينالىسام دەگەن اعايىنعا سولتۇستىك ايماقتى نەگىز ەتىپ ورالمانداردى قونىستاندىرۋ ءۇشىن ۇكىمەت ايقىنداعان جەتى وبلىستاعى اۋىلداردىڭ ەسىگى ايقارا اشىق، زاڭ اياسىندا بارلىق جاعداي جاسالادى. قىسقاسى، اۋىلعا بارعىسى كەلەتىن اعايىندار، الاڭداۋدىڭ قاجەتى جوق!

ەندى وسى ءسوزىمىز دالەلدى بولۋ ءۇشىن مىنا اڭگىمەنى ءسال ارىدان قوزعاۋعا تۋرا كەلىپ تۇر.

وسىدان ءبىر اي شاماسى بۇرىن، ناقتىلاپ ايتسام، وتكەن مامىر ايىنىڭ 17 كۇنى «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىندە قر پرەمەر-ءمينيسترىنىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ ازاماتتاردى قابىلداعاندا، ەل قاتارلى ءبىز دە كىرىپ، تۇڭعىش پرەزيدەنتتىڭ كوشى-قون قورىن قۇرۋ، قحر-نان كەلگەن قانداستارىمىزدان تۇراقتى تىركەۋگە تۇراردا تالاپ ەتىلەتىن سوتتىلىعىنىڭ بار-جوعىن دالەلدەيتىن انىقتامانى كۇشىنەن قالدىرۋ سىندى بىرنەشە ماسەلەنى ورتاعا قويعامىز. سونىڭ ءبىرى – كوشىپ كەلۋشىلەردى ۇكىمەت ايقىنداعان وڭىرلەرگە باعىتتاپ قونىستاندىرۋداعى ماسەلە بولاتىن. «مىسالى، وڭتۇستىك قازاقستان، الماتى وبلىستارىنا كوشىپ كەلگەن اعايىندارعا جەرگىلىكتى اتقارۋشى بيلىك بوس جەر جوق دەسە، وعان تۇسىنىستىكپەن قاراۋعا بولادى. ويتكەنى، ول وڭىرلەردە حالىق ونسىز دا تىعىز ورنالاسقان. ال، شەتتەن كەلگەن ءبىر تۋىسىمىز سول جەتى وبلىستاعى ءبىر اۋداننىڭ اكىمىنە بارىپ شارۋاشىلىق قۇراتىن جەر تەلىمىن سۇراسا، وعان ول اكىم اۋىلدا بوس جەر جوق دەسە، ءبىتتى، وندا سول تۋىس ءبارىن بۇلدىرەدى! «ورالمانداردى قونىستاندىرۋ ءۇشىن ۇكىمەت ايقىنداعان جەتى وبلىسىڭدا دا بوس جەر جوق ەكەن!» دەگەن سۋىت حاباردى WeChat دەگەن وسەكشى سول كۇنى-اق جۇرتقا جاياتىنى مۇندا تۇرعان اڭگىمە» دەگەن ەدىك اسەكەڭە.

سودان بەرى دە ءبىر جارىم اي كولەمىندە ۋاقىت ءوتتى. ارادا دۇنيەجۇزى قازاقتارىنىڭ V قۇرىلتايى اشىلىپ، وزدەرىڭىز ەت قۇلاقتارىڭىزبەن ەستىدىڭىزدەر، ۇلت كوشباسشىسى نۇرسۇلتان نازارباەۆ «ەلىم، جەرىم دەپ ەڭىرەگەن ءاربىر قازاققا قازاقستاننىڭ ەسىگى ارقاشان اشىق. ەشكىمگە شەكتەۋ جوق!» – دەدى. سونداي-اق، ەلگە كەلگەننەن سوڭ قۇجات تۇگەندەۋ ءۇشىن ءارى-بەرى سابىلۋ بولماۋى ءۇشىن سوتتىلىق تۋرالى انىقتامانى شەشۋدى, شەتتەگى جانە ەلگە كوشىپ كەلگەن اعايىنداردى قولداۋ ءۇشىن «وتانداستار» دەگەن قور قۇرۋدى ۇكىمەتكە شەگەلەپ تۇرىپ تاپسىردى.

ەلباسىنىڭ بۇل تاپسىرماسىن ۇكىمەت كوپكە سوزباي، جەدەل ورىندايدى دەگەن ويدامىز! اسىرەسە، سوتتىلىق تۋرالى انىقتاما ماسەلەسىن ەڭ الدىمەن شەشىپ تاستاۋ كەرەك!

ەندى اۋەلگى سوزىمىزگە ورالساق، بۇگىن مەنىڭ قولىما قازاقستان رەسپۋبليكاسى اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنەن اقجولتاي حات كەلىپ ءتۇستى.

ماناعى قابىلداۋدان شىعا سالىسىمەن قر پرەمەر-ءمينيسترىنىڭ ورىنباسارى – اۋىل شارۋاشىلىعى ءمينيسترى اسقار يسابەكۇلى سولتۇستىك وڭىرلەردە بوسالقى اۋىل شارۋاشىلىعى جەرلەرىنە تالداۋ جۇرگىزۋ ءۇشىن اتالعان كوميتەت جانىنان جەدەل جۇمىس توبىن قۇرىپ، ول توپتى سولتۇستىك قازاقستان وبلىسىنا اتتاندىرىپتى.

جۇمىس توبى ساپار بارىسىندا سولتۇستىك قازاقستان وبلىسى اكىمىنىڭ ورىنباسارى ا.س. ساپاروۆپەن وتىرىس وتكىزىپ، كوشىپ كەلۋشىلەر مەن قونىس اۋدارۋشىلارعا اۋىل شارۋاشىلىعى جەرلەرىن ءبولۋ ماسەلەسىن تالقىلاپتى.

سونداي-اق، بۇل وڭىرگە كوش كەرۋەنىن بۇرعاندارعا ءۇي ساتىپ الۋ، جەرگىلىكتى جەردە جۇمىسقا ورنالاسۋ مۇمكىندىكتەرىن انىقتاۋعا تاپسىرما بەرىپتى. جۇمىس توبى ودان ارى سقو ءۋاليحانوۆ اۋدانىنىڭ 5 اۋىلدىق وكرۋگىندە جۇرتشىلىقپەن كەزدەسىپ، ناقتى تەكسەرۋ-زەرتتەۋ جۇرگىزەدى.

ناتجەسىندە، ءۋاليحانوۆ اۋدانىنىڭ 5 اۋىلدىق وكرۋگىندە كوشىپ كەلۋشىلەر مەن قونىس اۋدارۋشىلاردىڭ قاجەتتىلىگى ءۇشىن 234 مىڭ 157 گەكتار بوسالقى جەر بار ەكەنى انىقتالىپتى. ونىڭ 508 گەكتارى ەگىستىك، 397 گەكتارى تىڭايما، 234 مىڭ 824 گەكتارى جايىلىمعا ارنالعان جەر ەكەن.

ال، وسى 234 مىڭ 824 گەكتار جايىلىمعا ارنالعان جەردىڭ 33 مىڭ 896 گەكتارىن 2018-2022 جىلدارعا قاراي كوشىپ كەلۋشىلەر مەن قونىس اۋدارۋشىلاردىڭ قاجەتتىلىگى ءۇشىن رەزەرۆكە (قورعا) قويىپتى.

«بارلىق مۇقتاج تۇلعالارعا جاڭا جۇمىس ورىندارى بالالارعا ارنالعان بالا باقشا جانە مەكتەپتە ورىندار قاراستىرىلعان.

جۇرگىزىلگەن جۇمىستىڭ قورتىندىلارى بويىنشا، جۇمىس توبى اۋىل شارۋاشىلىعى ماقساتىنداعى جەرلەردىڭ كولەمى  سولتۇستىك قازاقستان وبلىسىنا كوشۋگە نيەت بىلدىرگەن تۇلعالاردىڭ قاجەتتىلىگىن قامتاماسىز ەتۋ ءۇشىن جەتكىلىكتى دەگەن شەشىمگە كەلدءى» دەلىنگەن كوميتەت حاتىندا. دەمەك، باسقا اۋىلداردا دا جەر ماسەلەسى وسىلاي دەپ توپشىلاي بەرۋگە بولادى.

سوناۋ يت ارقاسى قياننان وتانىم بار دەپ كوشىپ كەلگەن اعايىن ءبىر ءتىلىم جەردىڭ بۇشپاعىن ۇستاي الماسا، ارتتاعى ەلگە نە بەتىمەن قارايدى!؟ ۇياتتى بىلاي قويعاندا، جەرسىز شارۋاشىلىقتى قالاي شالقىتادى، جاندى قايتىپ باعادى؟!

قۇداي-اۋ، بۇگىنگى كۇندە ءبىزدىڭ قانداستارىمىزعا جەتپەي تۇرعانى دا ءدال وسىنداي اقپارات قوي! ءار اۋدان، ءار اۋىل وسىلاي اقپار تاراتىپ وتىرسا، كوش بىردەن سولتۇستىككە اعىلعالى تۇر! اسقار يسابەكۇلى سول تۇيتكىلدىڭ باسىن باستادى. ەندى اكىمدەر ءىلىپ اكەتىپ، جالعاستىرۋى كەرەك بۇل باستامانى!

ارداقتى اعايىن، ەندى كوزدەرىڭىز جەتكەن شىعار، كوشتىڭ باسىن بۇگىننەن باستاپ ۇكىمەت ايقىنداعان جەتى وبلىسقا جەدەل بۇرۋلارىڭىزعا بولادى.

مىنە، مينيستر بولساڭ، مىرزاحمەتوۆتەي بول!

اۋىت مۇقيبەك

Abai.kz

12 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3552