قازاقستان رەسپۋبليكاسىنىڭ

باس پروكۋرورى ج.ق. اسانوۆقا

 قۇرمەتتى جاقىپ قاجمانۇلى!

ءوزىڭىز جاقسى بىلەسىز، جاقىنعى كۇندەردەن بەرى ومىربەك جامپوزوۆتىڭ «ءوزىن-ءوزى اتىپ ولتىرگەنى» تۋرالى اقپاراتتار تارادى. ونىڭ ارەكەتىن الەۋمەتتىك جەلىدە، باق-تا ۇلت زيالىلارى، قاراپايىم قاۋىم «ءوز بەتىنشە جاساعان جازالاۋ سوتى» دەپ باعالاپ، قازاقستانداعى قۇقىق قورعاۋ جۇيەسىنىڭ كەمشىلىگى رەتىندە كورسەتۋ جيىلەپ بارادى.

ومىربەك جامپوزوۆتىڭ باسىنداعى ءدال وسىنداي جاعداي مەنىڭ كۇيەۋىم ءشارىپوۆ ەرمەك يساۇلىنىڭ باسىنا دا تۋىپ وتىر.

اڭگىمەنىڭ جالپى بارىسى بىلاي: مەنىڭ كۇيەۋىم  پودپولكوۆنيك ەرمەك ءشارىپوۆ قر قورعانىس مينيسترلىگىنىڭ ماتيرالدىق تەحنيكالىق قامداۋ ءبولىمىنىڭ  اعا وفيتسەرى بولىپ قىزمەت اتقارىپ جاتقان جەرىنەن قر قىلمىستىق كودەكسىنىڭ 366-بابىنىڭ 4-تارماعىمەن ايىپتالىپ، 19 شىلدە كۇنى 10 جىلعا باس بوستاندىعىنان ايىرۋ جازاسىنا كەسىلدى.

نەگىزى، مەنىڭ جولداسىممەن بىرگە 10 ادام تۇتقىندالعان. تەرگەۋ بارسىسىندا باس قىلمىسكەر رەتىندە 12 جىلعا سوتتالعان جۇمقازيەۆ تولەمىس يشاحاتۇلى جانە قالعان ايىپتالۋشى توعىز ادامنىڭ ءبارى  ەرمەك ءشارىپوۆتىڭ كىناسى جوق دەۋمەن بولدى.

كۇيەۋىمنىڭ ايتۋىنشا، بۇل جازامەن كەلىسپەيدى. ونىڭ بار كىناسى – باستىعى  تولەمىس جۇمقازيەۆتىڭ اۋىزشا بەرىلگەن تاپسىرماسىمەن تەندرگە قاتىسۋشىلارعا زاڭ اياسىندا كەڭەس بەرگەنى. ال، اۋىزشا تاپسىرما بەرگەنىن تولەمىس جۇمقازيەۆتىڭ ءوزى سوت تەرگەۋىندە راستاپ، موينىنا الدى.

وكىنىشكە وراي، ولاردىڭ بۇل سوزدەرى مەن مويىنداۋى سوت بارىسىندا ەسەپكە الىنبادى...

قۇرمەتتى جاقىپ قاجمانۇلى!

ءسىز جۇرگىزىپ وتىرعان سوت رەفورماسىنا قاراپ، كۇيەۋىم  ەرمەك شارىپوۆكە ءادىل ۇكىم شىعادى، اقتالادى دەگەن ۇمىتتە ەدىم. امال نە، ول ءۇمىتىم اقتالمادى. مەن ءۇش بالانىڭ اناسىمىن. ءوزىم دە، جولداسىم دا زيالى وتباسىنىڭ بالالارىمىز. مەن كۇيەۋىمنىڭ اق ەكەنىنە سەنىمدىمىن. ەگەر، ول شىن مانىندە مەملەكەت قارجىسىنا قول سالىپ، قيانات جاساعان بولسا، بۇل ۇكىمگە ريزا ەدىم، ءسىزدىڭ اتىڭىزعا حات تا جازباس ەدىم.

جاسىراتىنى جوق، مەن دە سول  ومىربەك جامپوزوۆتىڭ ارەكەتىندەي جانقيارلىققا بارماعانىممەن، سوعان جەتەعابىل ىستەردى ىستەگىم كەلدى. سەبەبى، ادىلەتسىزدىككە ايەل جانى توزبەيدى ەكەن. بالاپاندارىمدى ويلاپ، ءوزىمدى زورعا تەجەۋمەن كەلەمىن. الدا اپپەلياتسيالىق سوتقا شاعىمدانعالى جاتىرمىن. ەگەر، ناتيجە جىقپاسا، قانداي قادامعا بارارىم بەلگىسىز. كوز الدىم بۇلىڭعىر تۇمان بولىپ تۇر...

سىزدەن كۇيەۋىم ەرمەك ءشارىپوۆتى ءوز نازارىڭىزعا الىپ، ءىسىن قايتا قاراپ، ءادىل شەشىم شىعارۋعا ىقپال ەتۋىڭىزدى وتىنەم!

قۇرمەتپەن، سامالگۇل ەسەنعازيەۆا

Abai.kz