رەسەي دە ءوز الىنشە اقش-قا قارسى سانكتسيا جاريالاپ جاتىر. ويتكەنى اقش پرەزيدەنتى دونالت ترامپ تامىزدىڭ 2-ءسى كۇنى رف-عا، يرانعا، سولتۇستىك كورەياعا قارسى سانكتسيالاردى كۇشەيتۋ تۋرالى جارلىققا قولىپ قويىپ جىبەرگەن بولاتىن. سونىڭ قارىمتاسى رەتىندە كرمەل دە قارمانىپ، قارسى قارەكەت جاساپ، اقش ديپلوماتتارىنىڭ ماسكەۋدەگى «سەرەبريانىي بور» ساياجايىنا  كىرۋىنە تيىم سالدى. بۇنىمەن قوسا، كرەمل اقش-تىڭ ماسكەۋدەگى ەلشىلىگى مەن سانكت-پەتەربورداعى باس كونسۋلدىعىندا قىزمەت ەتەتىن قاراسى 755 قىزمەتكەردى قىركۇيەكتىڭ 1-ىنە دەيىن ەلىنە قايتارماق.

وسى تۋراسىندا ورىس باسىلىمدارى: «اقش ەلشىلىگىنىڭ ديپلوماتيالىق قىزمەتىندە جۇرگەن ماماندار ەندى قايتىپ «سەرەبريانىي بور» ساياجايىنا كىرە المايدى. بۇل ساياجاي ەكى ەل اراسىنداعى ساياسي سالقىندىقتى توقتاتىپ، تاراپتاردىڭ تابىسۋىنا سەپ بولىپ كەلىپ ەدى. بۇل ساياباقتا تىرەسىپ، سىرەسىپ باستالعان تالاي اڭگىمەنىڭ سوڭى جايماشۋاقتانىپ بىتەتىن. وكپە-رەنىشتىڭ ءبارى ۇمىتىلاتىن، بىراق، باربەكيۋ-پاتي ەستە قالاتىن»، - دەپ جازۋدا.

«سەرەبريانىي بور»...بۇل اتاۋدىڭ قايدان شىققانىن ورىستاردىڭ وزدەرى دە بىلمەيدى.  بىراق، ايتەۋىر، تويعانشا ءىشىپ، تويعانشا جەپ، سوڭىنان دومالاپ جاتا كەتۋگە ىڭعايلى، سالقىن ساباتقا كومىلگەن توعاي ءىشى – جاننىڭ راحاتى. سول توعايدىڭ الاڭقايلارىندا دەمالاتىن ۇيلەر سالىنىپ، ءبىر كەزدە بۇندا «پراۆدا» مەن  «موسكوۆسكي كومسومولەتس» گازەتىنىڭ تىلشىلەرى، ماسكەۋدەگى ۇلكەن تەاتردىڭ قىزمەتكەرلەرى سايراندى سالعان كورىنەدى.  كەيىن ارگەنتينا، ليۆان ەلىنىڭ ەلشىلىك قىزمەتكەرلەرى، سوكپ وك-ءنىڭ ادامدارى ساياجاي ەتىپ تۇرا باستاعان. سول ساياباقتىڭ سىقپىتى مىناۋ:

Abai.kz