قىتاي بيلىگى. "تۋىسىڭدى كەپىلگە قوي دا، قازاقستانعا بارىپ وقى"
قىتايداعى قانداستارىمىزعا جاسالىپ جاتقان زاڭسىزدىقتاردىڭ كەسىرى – قازاقستاندا وقىعىسى كەلەتىن قازاق جاستارىنا قيىندىق تۋعىزىپ جاتىر.
ءار جىل سايىن قىتايدان قازاقستانعا وقۋ ءۇشىن نەشە مىڭداعان جاستار كەلەدى، بۇل جىلى دا سولاي كەلمەكشى ەدى... بىراق، سول سولاقاي ساياساتتىڭ كەسىرىنەن، ەڭكەيگەن قاريادان ەڭبەكتەگەن بالاعا دەيىن نە ىستەرلەرىن بىلمەي دال بولىپ جۇرگەن جايلارى بار. وسى جىلدىڭ باسىنان قانداستارىمىزدىڭ تولقۇجاتتارىن جيىپ العان قىتاي وكىمەتى الەمدىك اقپارات قۇرالدارىنىڭ شۋلاۋىنان سەسكەندى مە، ايتەۋىر قازىر تولقۇجاتتارىن جايلاپ بەرە باستادى. دەسە دە شەتەلگە شىعۋ ءۇشىن توقسان تەسىكتەن رۇقسات الىپ، ءبىر تۋىسىن كەپىلگە (زالوگقا) قويىپ، ءولدىم دەگەندە ارەڭ شەكارا اساتىن بولدى...
ءبىزدىڭ ءبىلىم جانە عىلىم مينيسترلىگى ول جاقتاعى جاعدايدى بىلمەدى مە قايدام، ادەتتەگىدەي شەتتەن كەلەتىن قازاق جاستارىن «دايىندىق كۋرسىنا» قابىلداۋ ۋاقىتىن جىلداعىداي 15-تامىزعا بەكىتىپ، وعان ۇلگەرمەگەندەر اقىلى تۇردە 300 مىڭ تەڭگە كولەمىندە اقشا تولەپ وقيتىنىن ەسكەرتىپتى... «جاۋ جاعادان العاندا ءبورى ەتەكتەن الدى» دەگەن وسى شىعار. مينيسترلىكتىڭ بۇل شەشىمگە ءبىر جاعىنان كۇلكىڭ كەلەدى، ال ەكىنشى جاعىنان جىلاعىڭ كەلەدى...
جاقىندا عانا دۇنيە ءجۇزى قازاقتارىنىڭ قۇرىلتايىندا ەلباسى سويلەگەن سوزىندە «شەتتەن كەلەتىن قازاق جاستارىنا ءبىلىم گرانتىن ەكى ەسەگە ارتتىرىپ، قۇجاتتارىن راسىمدەۋدى جەڭىلدەتۋگە» ناقتىلى تاپسىرمالار بەرگەنىن، سونىڭ ارقاسىندا وسى جىلى «دايىندىق كۋرسىنا» كەلەتىن جاستارعا 1400 گرانت بەرىلەتىنىن مالىمدەگەن ەدى. ءبىلىم جانە عىلىم ءمينيسترى دايىندىق كۋرسىنا قابىلداۋ ۋاقىتىن سوزباسا، ەلباسىنىڭ تاپسىرماسىن تولىق ورىنداي المايدى. ناتيجەسىندە مەملەكەت بيۋدجەتىنەن اقشا بولىنگەن گرانتتى تولىق يگەرە الماي، جىل سوڭىندا "يگەرىلمەگەن اقشانى قايتاراتىن مودانى" جاسايىن دەپ تۇر.
وسى جايتتى ەسكەرىپ، بۇگىن الماتىدا ءبىر توپ جاستار ەلباسىنا، ءبىلىم جانە عىلىم مينيسترىنە ءوتىنىش جازىپ;
1. دايىندىق كۋرسىنا قابىلداۋدى 15.09.2017 گە دەيىن ۇزارتۋدى،
2. قىتايداعى قازاقستان كونسۋلى ولارعا كەزەكسىز، تەز ۆيزا بەرۋدى،
3. دايىندىق كۋرسقا قابىلدايتىن جوو-دارى، ءتۇرلى سىلتاۋ ايتپاي، قۇجاتتارىن تەزىرەك قابىلداۋىن ءوتىندى...
قازىرشە قولدان كەلەر وسى عانا بولىپ تۇر...
Abai.kz
