جەكسەنبى, 20 قازان 2019
ەكونوميكا 2454 2 پىكىر 9 تامىز, 2017 ساعات 17:41

سىر مارجانى مەن قاۋىنى سىرتتاعى سۇرانىسقا يە

قىزىلوردا  وبلىسى اگروونەركاسىپ كەشەنىن دامىتۋ جانە ەكسپورتتىق الەۋەتىن ارتتىرۋ باعىتىندا 2017-2020 جىلدار ارالىعىندا 30 ملرد. تەڭگە كولەمىندە 99 جوبانى جۇزەگە اسىرۋدى جوسپارلاپ وتىر. وبلىستىڭ اۋىلشارۋاشىلىق سالاسىنداعى وڭ وزگەرىستىڭ ءبىرى – 647 جەكە قوسالقى شارۋاشىلىقتىڭ  بىرىگۋىمەن 27 كووپەراتيۆ قۇرىلعان. ەلباسىنىڭ ەكسپورت كولەمىن 40 پايىزعا ارتتىرۋ تاپسىرماسىنا ساي وبلىستىڭ اۋىلشارۋاشىلىق سالاسى «اگروكارتا» باعدارلاماسى اياسىندا ىسكە اساتىن بولادى دەپ حابارلايدى www.ortcom.kz

«اگروكارتا» اياسىندا اۋىل شارۋاشىلىعىنىڭ كۇرىش، بالىق، ەت، باقشا ونىمدەرىن  ەكسپورتتاۋ كولەمىن 2021 جىلعا قاراي  5 ەسەگە دەيىن ۇلعايتۋ جولدارى ايقىندالعان. نەگىزگى ەكسپورتتالاتىن ەلدەر - قىتاي، رەسەي، ەۆرووداق، تۇركيا، يران  مەملەكەتتەرى. وسى رەتتە كۇرىش ءوندىرىسىن دامىتۋ ماقساتىندا، كۇرىش جارماسىن قىمبات نارىققا شىعارۋ جولعا قويىلعان.

−         بۇل باعىتتا يراندا سۇرانىسى جوعارى تورەم حوشەمي سورتىن بيىل 100 گەكتارعا ەگىپ، 2020 جىلعا قاراي يران يسلام رەسپۋبليكاسىنا 5 مىڭ توننا كۇرىش وتكىزۋ جوسپارلانىپ وتىر. بيىلدىڭ وزىندە «اقتوبە ي ك» جشس-گى يراندا سۇرانىسى جوعارى «تورەم حوشەمي» سورتىن  90 گەكتارعا ەكتى جانە «سىر مارجانى» شارۋاشىلىعىندا وسى سورتتى تەستەن وتكىزۋ ءۇشىن  2 گەكتارعا ەگىلدى. بيىل يرانعا ەكسپورتقا 60 توننا «تورەم حوشەمي» سورتىن جىبەرۋ جوسپارلانىپ وتىر. سونىمەن قاتار، بۇگىنگى كۇنى قىتاي مەملەكەتىنە كۇرىش سالىسىن وتكىزۋ ماسەلەسىن پىسىقتاۋدامىز،-دەدى قىزىلوردا وبلىسى اۋىل شارۋاشىلىعى باسقارما باسشىسىنىڭ ورىنباسارى پىرمۇحامەد سىزدىقوۆ ورتالىق كوممۋنيكاتسيالار قىزمەتىنىڭ الاڭىندا.

قىزىلوردانىڭ ەلىمىزگە كەڭ تاراعان «اڭگەلەگى» ەندى وزگە ەلدەرگە جىبەرىلەتىن بولدى. بيىل 2000 تونناعا جۋىق سىر قاۋىنىن ەكسپورتتاۋ جوسپارلانعان. قازىرگى تاڭدا رەسەيگە 52 توننا سىر قاۋىنى ەكسپورتتالدى. رەسەيدە سۇرانىسى جوعارى قاۋىن سورتتارىمەن گيبريدتەرىن ەگۋ وبلىستىڭ اۋىلشارۋاشىلىق سالاسىنداعى نەگىزگى ماقساتتىرىنىڭ ءبىرى.  سونىمەن قاتار، وندىرىستىك نەگىزدە 1600 گەكتار باسقا دا باقشا داقىلدارى ەگىلگەن.

اباي-اقپارات

2 پىكىر