تالدىقورعان قالاسىندا «National Geographic» ۇسىنعان ۇزدىك 50 سۋرەت» تاقىرىبىندا ۇيىمداستىرىلعان فوتوكورمە ءوز جۇمىسىنا كىرىستى. اتالمىش كورمە كورسەتىلىمدەرىن وڭىرلەر ىشىنەن ءبىرىنشى بولىپ جەتىسۋ جەرىنەن باستادى. بۇل تۋرالى الماتى وبلىسىنىڭ وڭىرلىك كوممۋنيكاتسيالار قىزمەتىنىڭ كوشپەلى ءباسپاسوز-كونفەرەنتسياسىندا ايتىلدى.

شاراعا وبلىستىق ىشكى ساياسات پەن تۋريزم باسقارما باسشىلارى، «National Geographic قازاقستان» جۋرنالىنىڭ وكىلدەرى مەن وسى كەزدەسۋگە ارنايى قىتايدان شاقىرتىلعان بەلگىلى فوتوگراف ەكپىن حاسەنجان قاتىستى.

وقۋشىلار سارايىندا ءبىر ايعا جالعاساتىن فوتوكورمەدە 128 جىلدىق تاريحى بار سۋرەتتەردىڭ ىشىنەن ەڭ ۇزدىك 50 سۋرەت ىرىكتەلىنىپ الىندى. وندا ستيۆ ماككارريدىڭ دۇنيەنى شارلاعان ايگىلى «اۋعان قىزى» سۋرەتىنەن باستاپ، دجەين گۋدوللدىڭ تاڭعاجايىپ كادرلارى، توماس ابەركرومبيدىڭ 1965 جىلى تۇسىرىلگەن مەككە كورىنىسى جانە «National Geographic» تاريحىنداعى باسقا دا تانىمال فوتوتۋىندىلار پاش ەتىلدى.

«كورمەدەگى ماقتانىشپەن ايتا الاتىن سۋرەتتەر وتە كوپ. سونىڭ ءبىرى ەموري كريستوف تىرىلتكەن تيتانيكتى 10 000 ۆاتتىق جارىقپەن 4022 مەتر تەرەڭدىكتە تۇسىرىلگەن سۋرەتى. بۇل سۋرەت بارلىق ۇلى ىستەرگە باستاۋ بولا ءبىلدى. سەبەبى، وسى ءبىر تاماشا تۋىندىدان كەيىن تيتانيك تاريحى قايتا زەرتتەلىپ، ايگىلى «تيتانيك» ءفيلمى ءتۇسىرىلدى»، - دەدى "National Geographic" جۋرنالىنىڭ جاۋاپتى رەداكتورى ءادىلحانوۆ ماقسات.

شارا سوڭىندا «National Geographic قازاقستان» جۋرنالىنىڭ قىزمەتكەرلەرى الماتى وبلىسىنىڭ ەڭ كورىكتى جەرلەرىنە ەكسپەديتسياعا اتتانادى. ولار اۋليە اعاش، شارىن كانوندارى، كولساي كولدەرى، قايىڭدى كولى، تورايعىر تاۋى، ەسىك قورعانى، تاڭبالى مەموريالدىق كەشەنى سەكىلدى تاريحي-مادەني ورىندار.

Abai.kz