قازاقستاننىڭ كيەلى جەرلەرىنىڭ گەوگرافياسى بويىنشا 600 نىسان بەلگىلەندى. بۇل تۋرالى بۇگىن پرەزيدەنت جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ ءۇشىنشى وتىرىسىندا قر پرەزيدەنتى اكىمشىلىگىنىڭ باسشىسى - ۇلتتىق كوميسسيانىڭ توراعاسى ادىلبەك جاقسىبەكوۆ ءمالىم ەتتى.

"سوڭعى ءتورت ايدا ەلباسى ۇسىنعان باعدارلامانى جۇزەگە اسىرۋدا ناقتى قادامدار جاسالدى. ورتالىق جانە جەرگىلىكتى مەملەكەتتىك ورگاندار بۇل باعىتتاعى جۇمىسقا بەلسەندى قاتىسىپ جاتىر، سونداي-اق وبلىستاردا ارنايى كوميسسيالار، جوبالىق كەڭسەلەر، ساراپشىلىق توپتار قۇرىلدى. ورتالىق جوبالىق كەڭسەنىڭ جۇمىسىمەن جاڭا تانىسىپ شىقتىق. وزدەرىڭىز كوردىڭىزدەر، كوپ جۇمىس جاسالعان. ۇلتتىق كوميسسيانىڭ ارنايى توپتارى جۇمىسىنىڭ العاشقى ناتيجەلەرى بار. ءبىز وسى شارالاردى ۇيىمداستىرۋدا جاڭا دەڭگەيگە شىقتىق»، - دەپ اتاپ ءوتتى ءا. جاقسىبەكوۆ.

تاراتىلعان مالىمەتتەرگە قاراعاندا، جوبالىق كەڭسە جۇمىسىن باستاعاننان بەرى مينيسترلىكتەر مەن اكىمدىكتەر ۇسىنعان 1170 جوبانى پىسىقتادى.

«سونىمەن بۇگىندە جاڭا ءالىپبيدىڭ جوباسى جاسالدى. قازاقستاننىڭ كيەلى جەرلەرىنىڭ گەوگرافياسى بويىنشا 600 نىسان بەلگىلەندى. ولاردىڭ 22-سىندە عىلىمي-رەستاۆراتسيالىق جۇمىستار باستالدى. تۋعان جەر باعدارلاماسى بويىنشا كەڭ كولەمدە جۇمىستار جۇرگىزىلىپ جاتىر. مادەنيەت باعىتىندا ەڭ ۇزدىك شىعارمالار تاڭداپ الىندى»، - دەدى ول.

سونىمەن قاتار ءا. جاقسىبەكوۆ «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا گۋمانيتارلىق پاندەر بويىنشا 17 وقۋلىقتىڭ ءتىزىمى جاسالعانىن جانە ولارعا اۋدارما جاساۋ شارالارى باستالعانىن اتاپ ءوتتى.

«بۇل وسى جۇمىستىڭ باسى عانا. بارلىق باعىتتار بويىنشا جوسپارلى ماقساتتار بار. ونى قوعام قولداپ وتىر. كەلەشەكتە ۇلكەن جۇمىستار اتقارىلادى. ەلباسىنىڭ «رۋحاني جاڭعىرۋ» باعدارلاماسى جالپىۇلتتىق جوباعا اينالۋى كەرەك»،-دەپ تۇيىندەدى ءسوزىن ول.

بەلگىلى بولعانداي، «جاھانداعى زاماناۋي قازاقستاندىق مادەنيەت» جوباسى بويىنشا ۇزدىك تۋىندىلاردىڭ ءتىزىمى جاسالدى. وعان ادەبيەت سالاسىنداعى 216, «تەاتر، كينو جانە حورەوگرافيا» جانرىنداعى 48, بەينەلەۋ ونەرى بويىنشا 182 جانە مۋزىكا سالاسىنداعى 200-دەن استام شىعارما ەندى. بۇدان بولەك، «قازاقستانداعى 100 جاڭا ەسىم» جوباسىنا 1500 ءوتىنىم كەلىپ ءتۇستى، ولاردى ارى قاراي اشىق داۋىس بەرۋگە ۇسىنىلاتىن ارالىق پۋلدار بولادى.

Abai.kz