ەلوداداعى ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتىندە 2017-2018 جىلعى جاڭا وقۋ جىلىنىڭ سالتاناتتى اشىلۋ ءراسىمى ءوتتى. ءداستۇرلى ءىس-شاراعا جوعارى وقۋ ورنىنىڭ بۇرىنعى رەكتورى اكادەميك كەنجەعالي ساعاديەۆ پەن عارىشكەر-ۇشقىش، حالىق قاھارمانى ايدىن ايىمبەتوۆ قاتىستى. جيىن ارنايى دايىندالعان كونتسەرتتىك باعدارلامامەن اشىلىپ، ەل تۋى ساحنا تورىنە كوتەرىلىپ، مەملەكەتتىك ءانۇران شىرقالدى.

ۋنيۆەرسيتەت جاڭا وقۋ جىلىن بيىل دا تابىستى باستادى. ستۋدەنتتەر قاتارى 3000 جاس تۇلەكپەن تولىعىپ، جوعارى وقۋ ورنى 1156 ءبىلىم گرانتىن جەڭىپ الدى.

ستۋدەنتتەر مەن وقىتۋشىلاردى جاڭا وقۋ جىلىمەن قۇتتىقتاعان ۋنيۆەرسيتەت رەكتورى اقىلبەك كۇرىشباەۆ وقۋ ورنىنىڭ عىلىمي-زەرتتەۋ ۋنيۆەرسيتەتىنە ترانسفورماتسيالاۋ ءۇردىسى باستالعانىن، بۇل جۇزەگە اسقان شاقتا قازاتۋ ەلىمىزدەگى نازارباەۆ ۋنيۆەرسيتەتى تيپتەس ەكىنشى وقۋ ورنى بولاتىنىن اتاپ ءوتتى.

-ءبىز ءوز ۋنيۆەرسيتەتىمىزدى شىن جۇرەكتەن جاقسى كورەمىز، ءبىر-بىرىمىزبەن اۋىزبىرشىلىكتە، ءبىر ءۇيدىڭ بالاسىنداي ءومىر سۇرەمىز،  شاڭىراعىمىزدىڭ ابىرويىن اسقاق ۇستاۋعا تىرىسامىز. وسىنداي ەڭسەسى بيىك ەلدە تۇراتىنىمىزدى، وسىنداي ابىرويى اسقاق وقۋ ورنىندا جۇمىس ىستەپ، وقيتىنىمىزدى ارقاشان ماقتان تۇتامىز. سوندىقتان سىزدەر دە وسى ءۇردىستى جالعاستىرىپ، ءبىزدىڭ وتباسىنىڭ مۇشەلەرىنە اينالاسىزدار دەگەن سەنىمدەمىن، - دەدى وقۋ ورنىنىڭ باسشىسى.

«ءبىزدىڭ ۋنيۆەرسيتەت – تامىرىن تەرەڭنەن الاتىن، تاريحى باي، تىڭ ولكەسىن يگەرۋ شاعىندا تۇڭعىش قۇرىلعان ەڭ بايىرعى وقۋ ورنى. 60 جىل ىشىندە وقۋ ورنى قابىرعاسىنان 65 مىڭنان استام تۇلەك ۇشىپ شىقتى.  ولاردىڭ ىشىندە بۇگىندە ەلىمىزگە، الەمگە تانىمال تالاي قوعام قايراتكەرلەرى، عالىمدار، سپورتشىلارىمىز بار.  قازاتۋ – قازاقستانداعى ەڭ ءىرى اگرارلىق جانە تەحنيكالىق جوعارى وقۋ ورىندارىنىڭ ءبىرى. ۋنيۆەرسيتەتىمىزدىڭ ەڭ باستى قۇندىلىعى – ساپالى ءبىلىم بەرۋ. ول ءۇشىن بىزدە بارلىق جاعداي جاسالعان. قازاتۋ-دا 9 فاكۋلتەت، 47 كافەدرا، 25 عىلىمي-زەرتتەۋ ورتالىعى جۇمىس ىستەپ، 94 عىلىم دوكتورى، 12 PhD دوكتور، 350 عىلىم كانديداتى ەڭبەك ەتەدى. ۋنيۆەرسيتەتىمىز الەمدەگى 800 ۇزدىك ۋنيۆەرسيتەت قاتارىنا كىرەدى»، - اقىلبەك كۇرىشباەۆ.

ۋنيۆەرسيتەتتىڭ بۇرىنعى رەكتورى، قوعام قايراتكەرى كەنجەعالي ساعاديەۆ  ءبىلىم شاڭىراعىنىڭ ستۋدەنتتەردى الەۋمەتتىك قولداۋ باعىتىندا اتقارىپ وتىرعان ۇلكەن جەتىستىكتەرىن اتاپ، ۇجىمدى استانا قالاسى بويىنشا الەۋمەتتىك جوبالار كونكۋرسىنداعى جەڭىسىمەن قۇتتىقتادى. سوڭعى وقۋ جىلىندا استانانىڭ سول جاعالاۋىنان 120 وتباسىلىق باسپانا مەن  800 ورىندىق جاتاقحانا پايدالانۋعا بەرىلگەن.   وسىلايشا،   ستۋدەنتتەردى جاتاقحانامەن قامتۋ   دەڭگەيى 75%-عا جەتكىزىلگەن. بۇل رەسپۋبليكا بويىنشا ەڭ جوعارعى كورسەتكىش. قازاتۋ-دا كوپ بالالى وتباسىنان شىققان، الەۋمەتتىك جاعدايى تومەن، اتا-اناسىنىڭ قامقورلىعىنسىز قالعان ستۋدەنتتەر وقۋ ورنى باسشىلىعىنىڭ ءجىتى نازارىندا. ۋنيۆەرسيتەت وسى ساناتتاعى جاندارعا تەگىن تاماق بەرەدى، كەڭسە زاتتارىمەن قامتاماسىز ەتەدى، جازعى دەمالىس-ساۋىقتىرۋ ورىندارىنا جولداما بەرەدى، اتاۋلى شاكىرتاقى تاعايىندايدى.

كەنجەعالي ساعاديەۆ شاكىرتتەرگە وقۋ ورنىندا جاسالعان جاعدايدى لايىقتى باعالاپ، وزدەرىنە ارتىلعان ەل سەنىمىن اقتاۋعا تىلەدى. قوناقتار ۋنيۆەرسيتەت جانىنداعى وندىرىستىك ورتالىقتاردىڭ، ەت-ءسۇت ونىمدەرى تسەحتارىنىڭ جۇمىسىمەن تانىستى. وقۋ ورنىنىڭ عالىمدارى ستۋدەنتتەرمەن بىرلەسىپ، مۇندا وتىزعا تارتا ازىق-تۇلىك ونىمدەرىن شىعارۋدى قولعا الىپ وتىر. ولار قازاقتىڭ ۇلتتىق اسحاناسىنداعى قازى، قۇرت ، ىرىمشىك سىندى ونىمدەردىڭ نەگىزىندە جاسالعان. عارىشكەر ايدىن ايىمبەتوۆ جاستارمەن ءوزىنىڭ عارىشتا وتكىزگەن «داستارحان-6» تاجىريبەسىنىڭ ناتيجەلەرىمەن ءبولىستى. سىناق  قازاقتىڭ قۇرت، ىرىمشىك، ايران، قىمىز، جىلقى ەتى سىندى تاعامدارىنىڭ ساپالىق قاسيەتتەرىن ارتتىرۋعا باعىتتالعان بولاتىن.

Abai.kz