جۋىردا «ەنشى» زياتكەرلىك-تانىمدىق تەلەۆيزيالىق جوباسى كورەرمەنگە جول تارتادى. جوباعا 10-11 سىنىپ وقۋشىلارى مەن 1-2 كۋرس ستۋدەنتتەرى  قاتىسا الادى.

ءبىلىم بايگەسى قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى مەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ باستاماسىمەن قولعا الىندى. ءتورت كەزەڭدى قامتيتىن سايىسقا ەلىمىزدىڭ تۇكپىر-تۇكپىرىنەن 48 قاتىسۋشى ىرىكتەلىپ الىنادى. بىلگىرلەر باسەكەسىندە قويىلاتىن سۇراقتاردىڭ دەنى تاريح، مادەنيەت، ادەبيەت پەن سالت-داستۇرگە نەگىزدەلگەن. سونداي-اق، جەڭىمپازعا ينتەللەكت، لوگيكا جانە مىقتى ەرۋديتسيا دا ءوز سەپتىگىن تيگىزەدى.

جوباعا ىرىكتەۋ 18-قىركۇيەكتە اقتاۋ قالاسىنان باستاۋ السا، وسكەمەندە 19-ى، اقتوبە مەن الماتىدا 21-ءى، شىمكەنتتە 25-ءسى، استانادا 29-ى وتەدى. ەكى كەزەڭنەن تۇراتىن سايىستا قاتىسۋشىلار ءۇش بلوگقا بولىنگەن تاپسىرمانى ورىندايدى. العاشقى بلوگتا بەرىلگەن 10 ساۋالدىڭ ءبىر عانا نۇسقاسى دۇرىس بولسا، ەكىنشى بلوكتا سۇراقتاردىڭ بىرنەشە جاۋابى بولادى. ال ءۇشىنشى بلوكتا ۇزىن-سانى جيىرما ساۋالدىڭ ەشبىر نۇسقاسى ۇسىنىلماستان، جازباشا تۇردە الىنادى. تەستىلەۋدەن جوعارى ۇپاي جيناعاندار ەكىنشى كەزەڭدە باقتارىن سىنايدى. بۇل اينالىمدا قاتىسۋشىلارعا اۋىزشا ءتۇرلى ساۋالدار قويىلادى. ايماقتىق كەزەڭگە قاتىسا الماعاندار باعدارلاما سايتى ارقىلى (www.yenshi.kz-اۆت.) ءوتىنىش قالدىرۋلارىنا بولادى.  تىركەۋ ءۇشىن دە ۇمىتكەرلەردىڭ ءبىلىمى تەكسەرىلەدى. ياعني، ءوتىنىش قالدىرماس بۇرىن قاتىسۋشى 50 سەكۋند ىشىندە 10 ساۋالعا جاۋاپ بەرۋى ءتيىس. قويىلعان سۇراقتاردىڭ 9-ىنا دۇرىس جاۋاپ بەرگەن قاتىسۋشىعا ىرىكتەۋ كوميسسياسى 29-30 قىركۇيەك ارالىعىندا «Skype» ارقىلى بايلانىسقا شىعىپ، ەكىنشى كەزەڭنىڭ سۇراقتارىن جولدايدى. سىننان سۇرىنبەي وتكەندەر عانا جوبانىڭ تەلەۆيزيالىق كەزەڭىنە جولداما الادى. ۇيىمداستىرۋشىلار ساۋالداردىڭ ۇزدىكسىز وزگەرىپ وتىراتىنىن ايتادى.

ايماقتىق كەزەڭگە بارلىعى 1500 ۇمىتكەر قاتىسادى دەپ جوسپارلانعان. سونداي-اق، باعدارلامادا 1400 سۇراق وقىلادى دەپ كۇتىلۋدە. باعدارلامادا كورەرمەندەر دە  بەلسەندىلىك تانىتىپ، ساۋالدارىن جولداۋىنا بولادى.

-باعدارلامادا قازاقتىڭ بايىرعى سالت-ءداستۇرى مەن ۇلتتىق قۇندىلىعىن جاڭعىرتۋ كوزدەلىپ وتىر. بۇل جوبانىڭ بۇرىنعى زياتكەرلىك-سايىستاردان وزگەشەلىگى وسىندا. ياعني، جەڭىمپاز تەك ءبىلىمدى عانا ەمەس، سالت-داستۇرىمىزبەن سۋسىنداعان، قازاق ءتىلىنىڭ قادىر-قاسيەتىن سەزىنە الاتىن جاس بولادى،- دەدى ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ اقپارات جانە ساراپتاما ءبولىمىنىڭ باسشىسى م.باقىتقىزى.

دودادا ۇزدىكتەردەن ىرىكتەلگەن 48 ويىنشى جوبانىڭ العاشقى اينالىمىندا 15 سۇراققا جاۋاپ بەرەدى. ەكىنشى «توعىز توراپ» كەزەڭىندە،  اتى ايتىپ تۇرعانداي 9 ءتۇرلى تاقىرىپ توڭىرەگىندە بىلىمدەرىن بايقاتادى. ال «جامبى اتۋ» كەزەڭىندە ويىنشىلار وزدەرى قالاعان ۇياشىققا جامبىنى ورنالاستىرۋ ارقىلى سۇراقتى تاڭداۋعا قۇقىلى. سوڭعى اينالىمداعى سۇراقتار تۇتاستاي قازاقتىڭ شوقتىعى بيىك شىعارمالارى مەن ولاردىڭ اۆتورلارى، سالت-داستۇرلەر، فولكلوردان كەلەدى.

سايىس سوڭىندا جەڭىمپازدار مەن جۇلدەگەرلەردى قوماقتى سىياقى كۇتەدى.

نۇرباي شاكىم

Abai.kz