قازاقستاننىڭ «Doing Business» رەيتينگىندە ءوسۋى زاڭنامالىق دەڭگەيدە شەشىلمەك
«اتامەكەندە» كاسىپكەرلىك قىزمەتتى مەملەكەتتىك رەتتەۋدى جەتىلدىرۋ تۋرالى زاڭ جوباسى تانىستىرىلدى، - دەپ حابارلايدى اباي-اقپارات.
20 قىركۇيەك كۇنى «اتامەكەن» قر ۇكپ الاڭىندا كاسىپكەرلىك قىزمەتتى مەملەكەتتىك رەتتەۋدى جەتىلدىرۋ تۋرالى زاڭ جوباسىنىڭ تانىستىرىلىمى جاسالدى.
شاراعا «اتامەكەن» قر ۇكپ باسقارما توراعاسىنىڭ ورىنباسارى رۋستام ءجۇرسىنوۆ، قر ۇلتتىق ەكونوميكا ۆيتسە-ءمينيسترى سەرىك جۇمانعارين، قازاقستان كاسىپكەرلەرى فورۋمى اتقارۋشى ديرەكتورىنىڭ ورىنباسارى گۇلنار قۋانعانوۆا، جوبانى ازىرلەۋ بويىنشا ساراپتامالىق توپتىڭ وكىلى گۇلنار كۇربانباەۆا، سونىمەن قاتار كاسىپكەرلىك سۋبەكتىلەرى مەن سالالالىق قاۋىمداستىقتار قاتىستى.
«جىلدان جىلعا بيزنەستى قايتا رەتتەۋ بويىنشا مەملەكەت جۇيەلى جۇمىس اتقارىپ كەلەدى. ماسەلەن، كاسىپكەرلىك سۋبەكتىلەرىنە جوسپاردان تىس تەكسەرۋلەر ازايتىلدى. ۇلتتىق ەكونوميكا مينيسترلىگىنە العىسىمىز شەكسىز، بىرلەسىپ، ءتيىمدى جۇمىس اتقارىپ كەلەمىز»، – دەدى ۇكپ باسقارما توراعاسىنىڭ ورىنباسارى رۋستام ءجۇرسىنوۆ.
سپيكەر ارى قاراي كاسىپكەرلىك قىزمەتتى مەملەكەتتىك رەتتەۋدى جەتىلدىرۋ تۋرالى زاڭ جوباسىنىڭ ارتىقشىلىعىن، وزگەرتۋ ەنگىزىلگەن نەگىزگى بەس باعىتتى اتاپ ءوتتى.
«اتالعان زاڭ جوباسى بيزنەس ءۇشىن جاپپاي شىعىنداردى ازايتۋ جانە زاڭنامادا باسەكەلەستىكتى قيىنداتاتىن نورماتيۆتەردى جويۋدى، 2020 جىلعا دەيىن كاسىپكەرلىك قىزمەتتى مەملەكەتتىك رەتتەۋدى جەتىلدىرۋ تۇجىرىمداماسىن جۇزەگە اسىرۋ جانە بيزنەستى قايتا رەتتەۋ بويىنشا شارالار قولدانۋدى كوزدەپ وتىر. سونداي-اق، بيزنەستى جۇرگىزۋ ءۇشىن قولايلى جاعداي جاساۋ جانە وڭىرلەر رەيتينگىن جۇرگىزۋ جانە قازاقستاننىڭ دۇنيەجۇزىلىك بانكتىڭ «Doing Business» رەيتينگىندە پوزيتسيالارىن جاقسارتۋعا باعىتتالعان وزگەرتۋلەر ەنگىزۋدى قاراستىرادى»، – دەدى ۇكپ باسقارما توراعاسىنىڭ ورىنباسارى رۋستام ءجۇرسىنوۆ.
سپيكەردىڭ ايتۋىنشا جوعارىدا اتالعان باعىتتاردى جۇزەگە اسىرۋ ارقىلى كاسىپكەرلىك قىزمەتتى رەتتەۋدىڭ بارلىق اسپەكتىلەرىن قامتۋعا مۇمكىندىك بەرەدى.
ءوز كەزەگىندە قر ۇلتتىق ەكونوميكا ۆيتسە-ءمينيسترى سەرىك جۇمانعارين زاڭ جوباسىنىڭ اۋقىمى مەن قۇرىلىمىنىڭ بيزنەسكە قاراي بەيىمدەلگەنىن تىلگە تيەك ەتتى.
«بۇل زاڭ جوباسىن اتامەكەن جازىپ شىقتى. مازمۇنىنداعى بيزنەسكە قاتىستى وزگەرتۋلەر ەلباسىنىڭ بيىل قازاقستان حالقىنا جاساعان جولداۋىنا سايكەس نەگىزدەلدى. جاپپاي تەكسەرۋلەر، اقپاراتتىق قۇرالدار، مەملەكەتتىك باقىلاۋ مەن قاداعالاۋدى رەفورمالار، كۆازيمەملەكەتتىك جانە تابيعي مونوپوليالار بەرەتىن رۇقسات قاعازداردىڭ سانىن ازايتۋ سىندى باعىتتار ەسكەرىلدى. ۇلتتىق پالاتا مەن ۇلتتىق ەكونوميكا مينيسترلىگى قىرۋار جۇمىستى اتقاردى. زاڭ تۇجىرىمداماسى مەملەكەتتىك ورگاندار قاراۋىنا جىبەرىلدى. جالپى زاڭ جوباسىن ازىرلەۋدە 26 ساراپشى جۇمىس ىستەدى»، – دەدى سەرىك جۇمانعارين.
ال زاڭنامانىڭ قۇرىلىمى جايىندا قر ۇلتتىق ەكونوميكا مينيسترلىگى كاسىپكەرلىكتى دامىتۋ دەپارتامەنتى ديرەكتورىنىڭ ورىنباسارى اسلانبەك جاقىپوۆ جان-جاقتى تانىستىرىلىم جاسادى.
اتاپ ايتقاندا، زاڭ جوباسى اقپاراتتتىق قۇرالدار رەفورماسىن اياقتاۋ، مەملەكەتتىك باقىلاۋ مەن قاداعالاۋدى رەفورمالاۋ، رۇقسات بەرۋ زاڭناماسىنا نۇكتەلىك وزگەرتۋدى ەنگىزۋ، ءوزىن-ءوزى باسقارۋ مەن رەتتەۋشىلىك اسەردى تالداۋ ينستيتۋتى دامۋىنا جول اشاتىن نورمالاردى جەتىلدىرۋ، بيزنەستىڭ جاپپاي شىعىندارىن ازايتۋ، ونىڭ ىشىندە باسەكەلەستىككە كەدەرگى كەلتىرەتىن نورمالاردى انىقتاۋعا باعىتتالعان.
شارا بارىسىندا سۇراق-جاۋاپ بولىمىندە كاسىپكەرلىك قاۋىمداستىقتار مەن كاسىپكەرلەر سپيكەرلەرگە ساۋالدارىن قويىپ ۇسىنىستارىن ورتاعا سالدى. جوبانى ازىرلەۋ بويىنشا ساراپتامالىق توپتىڭ وكىلى گۇلنار قۇربانباەۆانىڭ ايتۋىنشا زاڭ جوباسى مەملەكەتتىك ورگاندار قاراۋىندا، بۇگىن ايتىلعان ۇسىنىستار ەسكەرىلەدى.
Abai.kz
