الداعى 3 جىلدا 2 ملن اۋىل حالقى ساپالى ينتەرنەتكە قول جەتكىزەدى. بۇل تۋرالى بۇگىن ۇكىمەت وتىرىسىندا قر اقپارات جانە كوممۋنيكاتسيالار ءمينيسترى داۋرەن اباەۆ ءمالىم ەتتى، دەپ حابارلايدى قازاقپارات. ءمينيستردىڭ دەرەگىنشە، قازاقستاننىڭ بارلىق 122 قالاسى جانە شامامەن 1200 اۋىلدىق ەلدى مەكەن تالشىقتى-وپتيكالىق جەلى ارقىلى جوعارى جىلدامدىقتى ينتەرنەتكە قول جەتكىزىپ وتىر.

«قۇرمەتتى باقىتجان ءابدىرۇلى، ءسىزدىڭ تاپسىرماڭىزعا ساي مينيسترلىك بولاشاعى بار 1700-گە جۋىق اۋىلدىق ەلدى مەكەنگە تالشىقتى-وپتيكالىق بايلانىس جەلىسىن تارتۋ جۇمىسىن قولعا الۋدا. ياعني، بۇل 2 ميللوننان استام تۇرعىن ساپالى ينتەرنەتكە قول جەتكىزەدى دەگەن ءسوز. جوبادا قامتىلاتىن اۋىلداردىڭ ءتىزىمى ۇلتتىق ەكونوميكا مينيسترلىگىمەن بىرلەسە وتىرىپ، انىقتالۋدا. جالپى بۇل جوبا 2018-2020 جىلدار ارالىعىندا جۇزەگە اسىرىلادى دەپ جوسپارلانىپ وتىر»، - دەدى ول ۇكىمەت باسشىسى باقىتجان ساعىنتاەۆقا قاراتا.

داۋرەن اباەۆتىڭ ەسەبىنشە، جوبانىڭ ناتيجەسىندە 2021 جىلعا دەيىن ۇزىندىعى 24 مىڭ شاقىرىم تالشىقتى-وپتيكالىق بايلانىس جەلىلەرى تارتىلادى. بۇل جەرگىلىكتى اتقارۋشى ورگاندار مەن مەملەكەتتىك ورگانداردىڭ قۇرىلىمدىق بولىمدەرىنىڭ ينتەرنەتكە قولجەتىمدىلىگىن قامتاماسىز ەتۋى ءتيىس. «ايتا كەتۋ كەرەك، جوبا مەملەكەت پەن جەكەلەگەن ازاماتتاردىڭ ارىپتەستىگى بويىنشا ىسكە اسىرىلادى دەپ جوسپارلاندى. بۇل رەتتە مەملەكەتتىك ورگانداردىڭ  بايلانىس قىزمەتتەرىن 13 جىل بويى (2018-2030) كەپىلدى تۇردە تۇتىنۋ ماسەلەسى دە  قاراستىرىلىپ وتىر»، - دەدى اباەۆ. ءمينيستردىڭ ايتۋىنشا، اتالعان جۇمىستاردىڭ ناتيجەسىندە ينتەرنەتكە سەكۋندىنا 20 مەگابايتكە دەيىنگى جىلدامدىقپەن قول جەتكىزۋ قامتاماسىز ەتۋ، شامامەن 2 مىڭ مەكتەپتى ينتەرنەتپەن قامتۋ جانە دەنساۋلىق ساقتاۋ مەكەمەلەرىندە دە، جەرگىلىكتى مەملەكەتتىك ورگانداردا دا 1200 نۇكتەگە قوسۋ جوسپارلانعان. «جوبانى جۇزەگە اسىرۋ ءۇشىن اقپارات جانە كوممۋنيكاتسيالار مينيسترلىگى ءىس-شارالاردىڭ  اتاۋىن  جانە ورىنداۋ مەرزىمىن كورسەتە وتىرىپ، ارنايى جول كارتاسىن ازىرلەدى. بۇگىنگى كۇنى بۇل قۇجات بەكىتىلدى. قازىرگى كەزدە جوبانىڭ تۇجىرىمداماسى ۇلتتىق ەكونوميكا مينيسترلىگىمەن جانە قازاقستاننىڭ مەملەكەتتىك-جەكەشەلىك ارىپتەستىك ورتالىعىمەن پىسىقتالۋدا»، - دەدى ول. ايتا كەتەيىك، ۇكىمەتتىڭ سەلەكتورلىق رەجيمدەگى وتىرىسىندا «اۋىلدىق ەلدى مەكەندەردى تالشىقتى-وپتيكالىق بايلانىس جەلىلەرى تەحنولوگياسى بويىنشا كەڭ جولاقتى قولجەتىمدىلىكپەن قامتاماسىز ەتۋ» جوباسىنىڭ اعىمداعى جاي-كۇيى تالقىلانۋدا.

Abai.kz