يسپانيا كورلدىگىنىڭ قۇرامىندا اۆتونومدى ەل مارتەبەسىمەن ءومىر ءسۇرىپ كەلگەن كاتولونيا ءوز دەربەستىگىن جاريالاۋدى ءجون كورىپ وتىر. XVII عاسىردىڭ ورتا شەنىنە دەيىن، ۇلى كارلدىڭ ءداۋىرى اياقتالعانشا، جەكە مەملەكەت بولىپ كەلگەن كاتولونيا پيرەنەي كەلىسىمىنىڭ سالدارىنان 1659 جىلى يسپانيا مەن فرانتسيانىڭ بولشەكتەۋىنە تۇسكەن. الايدا، كاتولوندىقتاردىڭ كەۋدەسىندە تاۋەلسىزدىك رۋحى سونبەسە كەرەك، اراعا 500 جىلداي ۋاقىت سالىپ بارىپ مىنە،  ازات ءومىر سۇرۋگە ۇمتىلىپ جاتىر. ارينە، بۇل كەزگە دەيىن يسپانيا اۆتونومدى كاتولونيا حالقىنىڭ قۇقىعىن تاپتاپ، ءتىلى مەن ءدىلىن جويىپ، قۋعىن-سۇرگىنگە سالىپتى دەگەندى ەستي قويعان جوقپىز. كاتولونيا اۆتونومدى مارتەبەسىنە لايىق ءومىر ءسۇردى. الايدا، بوستاندىقتىڭ اتى – بوستاندىق. بۇل ءبىر ەسەپتەن باتىس دەموكراتياسىنىڭ شەكتى ءحالىن كورسەتسە كەرەك.

سونىمەن كەشە كاتولونيادا تاۋەلسىزدىككە قول جەتكىزۋدى كوكسەگەن رەفەرەندۋم ءوتتى. رەفەرەندۋمعا قاتىسقانداردىڭ 90 پايىزى كاتولونيانىڭ تاۋەلسىزدىگىن جاقتاپ داۋىس بەرگەن. ايتكەنمەندە، بۇل جايتتى رەسمي مادريد مويىنداۋدان باس تارتتى. بي-بي-سي-ءدىڭ حابارلاۋىنشا، پوليتسيامەن حالىقتىڭ اراسىندا قاقتىعىس بولىپ، 800 ادام دەنە جاراقاتىن العان.  بۇنىمەندە شەكتەلمەي پوليتسيا جاساقتارى سايلاۋ ورىندارىنا باسىپ كىرىپ، بيۋللەتەندەر سالىنعان جاشىكتەردى تالقانداپ، تارتىپ العان. يسپانيا ۇكىمەتى اتالعان رەفەرەندۋم كونستيتۋتسياعا قايشى دەگەندى ايتادى. ال، كاتولونيا ۇكىمەتىنىڭ باسشىسى كارلەس پۋچدەمون بولسا، رەسمي مادريد پەن پوليتسيا جاساقتارىنىڭ قارسىلىعىنا قاراماستان رەفەرەندۋم ءوتتى، كاتولونيا رەفەرەندۋمنىڭ ناتيجەسى بويىنشا تاۋەلسىز ەل دەپ ەسەپتەيدى.

قالاي دەسەك تە، ازاتتىعىنان ايرىلعان ەل ءتۇبى ءبىر سىلكىنەرى مىنا زاماندا بەلگىلى بولا باستادى. انە، كۇردتەر جەكە مەملەكەت بولۋعا بارىن سالىپ جاتىر. رەسەيدىڭ قۇرامىنداعى تاتار، باشقۇرت باۋىرلارىمىز ءبىر-اق كۇندە تاۋەلسىز ەل اتانۋعا دايىن وتىر. الەمدەگى وسىنداي قاۋىرت قوزعالاستان سەكەمدەنگەن قىتاي قاۋىپسىزدىك ماسەلەسىنە قاتتى كوڭىل ءبولىپ، مەملەكەت قۇرامىنداعى از ۇلتتارعا بارىنشا قىسىم جاساۋدا. ال، جۋىردا ميانمادان ءبولىنىپ كەتۋدى كوزدەگەن جەرگىلىكتى مۇسىلماندار قاندى قىرعىنعا ۇشىرادى.

ەستەرىڭىزگە سالا كەتەيىك، كەشە بارسەلونا قالاسىنىڭ ورتالىعىنا مىڭداعان جۇرت جينالىپ، كاتولونيانىڭ تاۋەلسىزدىگىن قولدادى.

Abai.kz