تىلدەر كۇنىن قازاقستاندا تۇراتىن بارلىق ەتنوس وكىلدەرى مەن ۇلىستار ءار جىل سايىن تۇراقتى تۇردە تويلاپ كەلەدى. قازاقستاندا 100-دەن اساتىن ۇلتتاردىڭ ءبىرازىندا ءوز تىلدەرىن وقىتاتىن مەكتەپتەرى بار جانە ولاردى مادەني-رۋحاني قولداۋ باعىتىندا قازاقستان حالقى اسسامبلەياسى ايانباي ەڭبەك ەتىپ ءجۇر.

قازاقستان حالقى تىلدەرىنىڭ كۇنىنە وراي جامبىل وبلىسى اكىمى اپپاراتىنىڭ «قوعامدىق كەلىسىم» كمم-دە «قازاقستان - ورتاق ءۇيىمىز» تاقىرىبىنا مەملەكەتتىك تىلدە ەسسە جازۋدان بايقاۋ ءوتتى. وڭىرلىك قازاقستان حالقى اسسامبلەياسى ءتىلىمىزدىڭ دارەجەسىن كوتەرۋگە باعىتتالعان ءىس-شارانى العاش رەت ۇيىمداستىرىپ وتىر. بايقاۋعا قازاق ءتىلىن مەڭگەرگەن وزگە ۇلت وكىلدەرى: تاراز قالاسىنداعى پوليتەحنيكالىق، بولاشاق، مەديتسينالىق، «اسپارا»، «پاراسات» كوللەدجدەرىنىڭ بىلىمگەرلەرى  جانە  مەكتەپ  وقۋشىلارىن قوسقاندا، بارلىعى 32 جاس قاتىستى. سايىس شارتى بويىنشا، جاسوسپىرىمدەر قوسىمشا قۇرالداردىڭ كومەگىنسىز 1 ساعات ىشىندە تاقىرىپتى اشىپ، قاعاز بەتىنە ويىن انىق جەتكىزۋى ءتيىس ەدى.

ال ولاردىڭ شىعارمالارىنا قالا مەكتەپتەرىنەن قازاق ءتىلى مەن ادەبيەت ءپانىنىڭ تاجىريبەلى  مۇعالىمدەرى ءادىل-قازىلىق ەتتى.

جارىس جەڭىمپازدارىنا 1,2,3 دارەجەلى ديپلومدار  جانە العىس حاتتار مەن  باعالى سىيلىقتار تاپسىرىلدى. ءادىل-قازىلار القاسىنىڭ ءتورايىمى دانا  ءجۇنىسوۆا ءوز سوزىندە جەڭىمپازداردى قۇتتىقتاپ، بارشا قاتىسۋشىلارعا العىسىن ءبىلدىردى. سونىمەن قاتار، ۇستازدار ءبىر اۋىزدان 41 ورتا مەكتەپتىڭ 11 سىنىپ وقۋشىسى، ورىس قىزى ۆالەريا ميحايلوۆانىڭ تۋىندىسىن ەرەكشە اتاپ ءوتتى.

بۇل قىزدىڭ ەسسەسىن وقىپ، ءبىز دە مۇعالىمدەردىڭ پىكىرىمەن كەلىستىك. سەبەبى، ۆالەريا ءوز ەسسەسىن ەلباسىنىڭ سوزىمەن باستاپ، ويىن ايقىن ءارى جۇيەلى تۇردە جەتكىزگەن.

«قازاقستان – ورتاق ءۇيىمىز. نەگە ورتاق؟ مەنىڭ ويىمشا، بىرىنشىدەن، مۇندا 132-دەن استام ۇلت وكىلدەرى تۇرعانىنا قاراماستان بارلىعىمىز تاتۋ-ءتاتتى ءومىر سۇرەمىز. ەكىنشىدەن، اتا-بابالارىمىزدىڭ تاريحى بارىمىزگە ورتاق. ۇشىنشىدەن، بىرلىكتىڭ كۇشىمەن، نايزانىڭ ۇشىمەن دەمەكشى، تاۋەلسىزدىككە جەتۋ جولىندا بار حالىق ورتاقتاسىپ، وسى جەتىستىككە جەتتى»، - دەپ مەكتەپ وقۋشىسى ورتاق ءۇي دەگەن ۇعىمعا انىقتاما بەرىپتى.

ال جامبىل وبلىسى قازاقستان حالقى اسسامبلەياسىنىڭ قىزمەتكەرلەرى بايقاۋدىڭ جوعارى دەڭگەيدە وتكەنىن جانە الداعى ۋاقىتتا وسى سىندى ءىس-شارالاردى كوپتەپ ۇيىمداستىراتىنىن جەتكىزدى.

جامبىل وبلىسى 

Abai.kz