قىتايداعى قازاق ازاماتتارىنىڭ ساياسي قىسىم كورىپ جاتقانى تۋرالى ءتۇرلى اقپارات تاراپ جاتىر. "Abai.kz" اقپاراتتىق پورتالى بۇل ماسەلەدە بىرنەشە دۇركىن ماتەريال جاريالاپ، تۋعان-تۋىستارى قىتايدا قامالعان ازاماتتاردىڭ جانايقايىن جازدى.

ماسەلە قازاقستاننىڭ سىرتقى ىستەر مينيسترلىگىنىڭ قۇلاعىنا جەتىپ، وتكەن اپتادا ءسىمنىڭ الماتىدا وكىلدىگى قىتايدا ۇستالعان ازاماتتاردىڭ تۋىستارىن جيناعان بولاتىن.  قىتايدىڭ قازاقستانداعى ەلشىسى دە پىكىر ءبىلدىرىپتى.

چجان حانحۋەيدىڭ ايتۋىنشا، سينتسزيان-ۇيعىر اۆتونومدى اۋدانىنىڭ تۇرعىندارىنا قاتىستى قاتاڭ شارالار تەك قازاق دياسپوراسىنا ەمەس، سونداي-اق، باسقا دا ۇلتتىڭ وكىلدەرىنە قاتىستى قولدانىلىپ كەلگەن.

سونىمەن قاتار، چجان حانحۋەي مەملەكەتتىڭ وسى وڭىرگە قارجىلاي كومەك كورسەتىپ جاتقانىن ايتىپ ءوتتى.

"قحر ەشقاشان دا كەمسىتۋشىلىك ساياساتىن جۇرگىزبەگەن جانە جۇرگىزبەيدى", - دەدى چجان حانحۋەي.

ء"بىز كحر-داعى قازاقتاردىڭ، ناقتىراق ايتساق، ۇيعىر اۆتونوميالىق وكرۋگىندەگى سينتسزياندا شەكارا اسىپ، ساپارعا شىعاردا رەسمي قۇجات الۋدا قيىندىقتارعا تاپ بولىپ جاتقانىن انىقتادىق، كحر-دا مەملەكەتتىك قىزمەتتە جۇمىس ىستەيتىندەردىڭ تولقۇجات الۋىندا بەلگىلى ءبىر قيىندىقتارعا تاپ بولىپ جاتقانىن بىلدىك. بۇل ماسەلەلەردى ءبىز مۇقيات تەكسەرىپ جاتىرمىز، ساراپتاۋدامىز، سونداي-اق، ماسەلەنى قىتايلىق ارىپتەستەرىمىزبەن تالقىلاپ جاتىرمىز. ءبىزدىڭ ءسىم-گە رەسمي تارتىپپەن تۇسكەن ءوتىنىشتى نازارسىز قالدىرمايمىز", - دەگەن ەدى وسىعان دەيىن قر ءسىم ءمينيسترى.

سونىمەن قاتار، ەلشى مىرزا بۇل قىتايدىڭ ىشكى ماسەلەسى ەكەنىن دە ايتقان.

«ەگەر ماسەلە قىتايدىڭ قۇجاتى بار ازاماتتارى تۋرالى بولسا، بۇل قىتايدىڭ ىشكى ماسەلەسى» دەدى ەلشى.

ايتا كەتەيىك، استانادا «زاماناۋي قىتاي: سۇراقتار مەن جاۋاپتار» اتتى سەز ءوتتى. وندا ەتنيكالىق قازاقتاردىڭ جاعدايى تۋرالى سۇراق قويىلدى.

«قىتاي ءوزىنىڭ سىرتقى ساياساتىن جۇرگىزگەندە گەگەمونيزم جولىمەن جۇرمەيدى جانە باسقا ەلدىڭ ىشكى جاعدايىنا ارالاسپايدى. ءبىزدىڭ ماقساتىمىز ءبىر. ول – ادام زاتتىڭ ورتاق تاعدىرى قوعامداستىعىن قۇرۋ» دەدى قىتايدىڭ رەسمي وكىلى.

Abai.kz