وبلىستىق اكىمدىكتىڭ جۇمىسپەن قامتۋدى ۇيلەستىرۋ، الەۋمەتتىك باعدارلامالار باسقارماسىنىڭ "الەۋمەتتىك جاتاقحاناسى" مەكەمەسى وندا تۇراتىن ورالمانداردان جاتاقحانانى بوساتۋدى، جيناقتالىپ قالعان كوممۋنالدىق تولەمدى تولەۋدى (200-500 مىڭ تەڭگەارالىعىندا) تالاپ ەتىپ وتىر. ورالماندار "كوممۋنالدىق تولەمدى تولەۋدى دەر كەزىندە، اي سايىن تالاپ ەتەتىن بولسا مۇنداي قيىندىققا تاپ بولمايتىن ەدىك" دەيدى. سوتتا جينالعان ءىرى سومانى تولەيتىن اقشالارى دا، جاتاقحانانى بوساتىپ، باراتىن باسقا جەرى جوقتىعىن ايتقان ءبىرسىپىرا ورالمان ورتالىقتى بوساتپايتىندارىن مالىمدەدى.

- ماعان قارىزدى 2013 جىلى كەتىپ قالعان كۇيەۋىمنىڭ اكەسىنە دە جازىپ قويعان. تولەۋگە مىندەتتەپ وتىرعان سوما – 510 668 تەڭگە، مەن ونى تولەي المايمىن. سول سەبەپتى بوساتسام دا، قايدا باراتىنىم بەلگىسىز، - دەيدى سوتقا تارتىلعان وزبەكستاننان كەلگەن ورالمان جانساۋلە جانگيليچەۆا.

ول جۇبايى جانە ەكى بالاسىمەن 2012 جىلدان بەرى قاراي وسىندا تۇرادى.

"الەۋمەتتىك جاتاقحانا" زاڭگەرى ءنۇربيبى مەرەۆانىڭ ايتۋىنشا، ەڭبەك جانە الەۋمەتتىك قورعاۋ مينيسترلىگىنىڭ 2013 جىلعى 22 قاراشاداعى بۇيرىعىنا سايكەس، ورالمان جاتاقحانادا مارتەبەسى اياقتالعانعا دەيىن التى اي عانا تۇرۋعا قۇقىلى.

2010 جىلى اقتاۋ قالاسىندا سالىنعان ورالمانداردى بەيىمدەۋ ورتالىعى 200 وتباسىنا ارنالعان. مۇندا قازىر بالالار ءۇيىنىڭ تۇلەكتەرى، سونىمەن بىرگە يران، وزبەكستان، تۇركىمەنستان جانە باسقا ەلدەردەن كەلگەن ورالماندار تۇرىپ جاتىر.

Abai.kz