ۇشتۇعىرلى ءتىل ساياساتى بويىنشا، قازاق، اعىلشىن، ورىس تىلدەرىن جەتىك مەڭگەرگەن جاستار اراسىنداعى «ءتىلدارىن» رەسپۋبليكالىق وليمپياداسى بۇگىن  مارەسىنە جەتتى. ءبىز وليمپيادا جۇلدەگەرى ايدانا ابۋباكيروۆانى سوزگە تارتقانىمىزدا ول بىلاي دەدى:

-ءۇش تۇعىرلى ءتىل ساياساتىن جۇيەلى جۇرگىزۋ ءۇشىن جاستارىمىزدىڭ ىقىلاسىن ءتىل ۇيرەنۋگە اۋدارۋ كەرەك. سوندا عانا قازاقستان باسەكەگە بەيىم، اعىلشىن ءتىلىن مەڭگەرگەن، عىلىمنىڭ قاي سالاسىندا بولسىن قاجەتتى اقپاراتىن الا الاتىن جاستارىمەن ماقتاناتىن بولادى. بۇگىنگى بايقاۋ جوعارعى دەڭگەيدە ءوتتى. ءار ايماقتان ءۇش ءتىلدىڭ جىلىگىن شاعىپ، مايىن ىشكەن جاستار كەلگەن. سوندىقتان ولاردىڭ ءاربىرى جەڭىمپاز.

سونىمەن، قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسى اياسىندا قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى مەن شايسۇلتان شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى ۇيىمداستىرعان شارا ءوز دەڭگەيىندە ءوتتى.

استانا، الماتى قالالارى مەن ايماقتىق ىرىكتەۋدەن سۇرىنبەي وتكەن سايىسكەرلەر بۇگىن «بالداۋرەن» رەسپۋبليكالىق وقۋ-ساۋىقتىرۋ ورتالىعىندا بىلىمدەرىن تارازىلادى. 18-20 جاس ارالىعىنداعى قازاق، ورىس، اعىلشىن تىلدەرىن يگەرگەن جاستاردىڭ ءبىلىمىن ارنايى قۇرىلعان قازىلار القاسى باعالادى. قازىلار القاسى قۇرامىندا اكادەميك، ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ قازاق ادەبيەتى كافەدراسىنىڭ پروفەسسورى، فيلولوگيا عىلىمدارىنىڭ دوكتورى جاندوس سماعۇلوۆ، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ شەتەل تىلدەرىنىڭ تەورياسى جانە تاجىريبەسى كافەدراسىنىڭ دوتسەنتى، پەداگوگيكا عىلىمدارىنىڭ كانديداتى جايناش نۇرجانوۆا، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قازاق ءتىل ءبىلىمى كافەدراسىنىڭ دوتسەنتى، فيلولوگيا عىلىمدارىنىڭ كانديداتى سالتانات شوقاباەۆا، ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ورىس فيلولوگياسى جانە كىتاپحانا ءىسى كافەدراسىنىڭ جەتەكشىسى، فيلولوگيا عىلىمدارىنىڭ كانديداتى گۇلنارا فاتكيەۆا، ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ وقۋ-ادىستەمەلىك جانە اعىلشىن ءتىلى كافەدراسىنىڭ دوتسەنتى، فيلولوگيا عىلىمدارىنىڭ كانديداتى ايناگۇل يسماعۇلوۆا بار.

وليمپيادا ەرەجەسىنە ساي قاتىسۋشىلار ءۇش كەزەڭ بويىنشا تاپسىرما ورىندادى. ولار العاشقى اينالىمدا بەرىلگەن تاقىرىپتاردىڭ ءۇش تىلدە مازمۇنىن اشسا، ەكىنشى كەزەڭدە ىلەسپە اۋدارما جاسادى. العاشقى ەكى اينالىمدا ءۇش ءتىلدى ءبىلۋ دەڭگەيلەرىن كورسەتسە، سوڭعى سايىستا قازاق تىلىندە بەرىلگەن تاقىرىپقا ەسسە جازدى.

- اۋقىمدى ۇيىمداستىرىلىپ وتىرعان بۇل شارانىڭ ماقساتى - قازاق ءتىلىن، ورىس، اعىلشىن تىلدەرىن جوعارعى دەڭگەيدە بىلەتىن جاستاردىڭ كوبەيۋىنە ىقپال ەتىپ، قازىرگى جاسامپاز قازاقستاننىڭ ءۇش تۇعىرلى ءتىلدى دامىتۋ باعدارلاماسىنىڭ ورىندالۋىنا جاعداي جاساۋ. جانە وزگە تىلدەردى مەڭگەرگەن جاستارىمىز ارقىلى قازاق ءتىلىنىڭ قولدانىس اياسىن كەڭەيتۋ. ىلەسپە اۋدارما جاسايتىن كاسىبي ماماندار سانىن ارتتىرۋ بولىپ وتىر. سوندىقتان جاستارىمىزدىڭ ءبىلىم دەڭگەيىن باعالاپ، ولاردى ىنتالاندىراتىن مۇنداي جارىستار ءجيى بولىپ تۇرسا ارتىق ەتپەيدى،- دەيدى قازىلار القاسىنىڭ توراعاسى جاندوس سماعۇلوۆ.

وليمپيادا قورىتىندىسى بويىنشا، باس جۇلدەنى الىبەك مارات جەڭىپ الدى. ءۇش تاپسىرمانى دا تياناقتى ورىنداعان ول قازىلار شەشىمىمەن ناعىز پوليگلوت اتاندى. ال ءبىرىنشى ورىن قىزىلوردالىق ايدانا ابۋباكيروۆاعا بۇيىردى. ەكىنشى ورىندى كاميلا احمەتوۆا ەنشىلەسە، ۇزدىكتەر قاتارىن گۇلميرا كامەنوۆا مەن ەكاتەرينا بوبكا تولىقتىردى.

سالتاناتتى شارا مەرەكەلىك كونتسەرتپەن جالعاستى.  «ءتىلدارىن» رەسپۋبليكالىق وليمپياداسى كەيىنگى جىلدارى ەلىمىزدە ءۇش ءتىلدى مەگەرىپ العان پوليگلوت جاستاردىڭ كوبەيە باستاعانىن بايقاتتى.

Abai.kz