«نۇر وتان» پارتياسىنا

قر مادەنيەت جانە سپورت ءمينيسترى

ا. مۇحامەديۇلىنا!

قر سىرتقى ىستەر ءمينيسترى

ق. ابدىراحمانوۆقا!

ۇستىمىزدەگى جىلدى استانادا وتكەن دۇنيەجۇزى قازاقتارىنىڭ V قۇرىلتايىندا ۇلت كوشباسشىسى نۇرسۇلتان ءابىشۇلى نازارباەۆ شەتتەگى جانە ەلگە كوشىپ كەلگەن اعايىنداردى قولداۋ ءۇشىن «وتانداستار» دەگەن قور قۇرۋ تۋرالى ۇكىمەتكە تاپسىرما بەرگەنى ءمالىم.

اتالعان قۇرىلتايدا پرەزيدەنت «وتانداستار» قورى دۇنيەجۇزى قازاقتارىنىڭ قاۋىمداستىعىمەن بىرلەسىپ، وتانداستارعا جان-جاقتى قولداۋ مەن كومەك كورسەتۋ ءىس-شارالارىن انىقتاپ، كەشەندى باعدارلاما ازىرلەۋى كەرەكتىگىن دە اتاپ ايتقان بولاتىن. ازىرلەنگەن كەشەندى باعدارلامادا قازاق كوشىنىڭ ماسەلەلەرى، الىستاعى اعا­يىنمەن بايلانىستىراتىن بارلىق ماسە­لەلەر قامتىلۋى ءتيىس ەكەنى تاپسىرىلعان. باعدارلامانىڭ باسىمدىقتارى مەن مىندەتتەرى قور ارقىلى ىسكە اسىرىلاتىنىن دا ەسكەرتكەن.

ەلباسىمىزدىڭ سول تاپسىرماسى نەگىزىندە، قازاقستان رەسپۋبليكاسى ۇكىمەتىنىڭ 2017 جىلعى 13 قازانداعى №644 قاۋلىسىمەن «وتانداستار قورى» كوممەرتسيالىق ەمەس اكتسيونەرلىك قوعامى قۇرىلدى.

ۇكىمەت قاۋلىسىندا «شەتەلدەگى جانە قازاقستان رەسپۋبليكاسىنا كوشىپ كەلگەن ەتنيكالىق قازاقتاردى قولداۋدى قامتاماسىز ەتۋ قوعام قىزمەتىنىڭ نەگىزگى نىساناسى بولىپ ايقىندالسىن» دەلىنگەن. ەندى وسى ماقساتتى نەگىزگە الا وتىرىپ، قر مادەنيەت جانە سپورت مينيسترلىگى مەن قر سىرتقى ىستەر مينيسترلىگى «وتانداستار» قورىنىڭ جارعىسىن جاسايتىنى انىق.

ءسوز جوق، «وتانداستار» قورى ەلباسى ەرتە جولعا قويعان، تاريحي، ستراتەگيالىق ماڭىزى توتەنشە زور كوشى-قون ساياستىنا ءوز سەپتىگىن تيگىزەدى جانە بولاشاقتا يزرايل مەن گەرمانيانىڭ ۇلتتىق كوشى-قون قورلارى سەكىلدى ۇلكەن ميسسيانى ارقالايدى.

ول ءۇشىن، ەڭ الدىمەن، جارعى دۇرىس بەكىتىلۋى كەرەك!

بۇگىنگى تاڭدا، قۇدايعا شۇكىر، كوشىپ كەلگەن اعايىنداردى قولداۋ جاعى تۇك قيىندىق تۋدىرمايدى. ماسەلە، شەتتەگى قانداستارىمىزعا قول ۇشىن بەرۋ جاعى ءار ەلدە ارقيلى جۇزەگە اسىرىلاتىنى بەلگىلى. ەركىن، دەموكراتيالى باتىس ەلدەرى مەن ءبىر شەكپەننەن شىققا تمد مەملەكەتتەرى قور جۇمىسىنا كەدەرگى كەلتىرمەي، تۇسىنىستىكپەن قارايدى. ال، «ەرتەڭ كولەڭكەسىنەن قورقاتىن، از ۇلتتارعا دەگەن ساياساتى سارىارقانىڭ جەلى سەكىلدى ۇيتقىمالى ەلدەرگە بارۋ، قانداس باۋىرلارعا كومەك بەرۋ ماسەلەسى قالاي بولادى؟!» دەگەن ءتۇيىندى وسى باستان جاقسى ويلاسقان ءابزال.

دەمەك، قور مەملەكەتتىك ۇيىم بولماعان سوڭ، تەك ەكونوميكالىق كومەكپەن عانا شەكتەلمەي، ەتنيكالىق قازاقتاردىڭ رۋحاني، ساياسي بوستاندىعىنا دا كوڭىل بولەتىنىن ەستەن شىعارماعانى دۇرىس.

سوندىقتان، اتلعان ەكى مينيسترلىك «وتانداستار» قورىنىڭ جارعىسىنا «... ەتنيكالىق قازاقتاردىڭ مۇددەسىن قورعايدى!» دەگەن ءسوزدى مىندەتتى تۇردە كەرگىزۋى كەرەك! بۇل باپ وتانداستار قورىنىڭ عانا ەمەس، دۇنيەجۇزى قازاقتارى قاۋىمداستىعىنىڭ دا جارعىسىندا بولۋى ءتيىس.

اۋىت مۇقيبەك

 05.12.2017

Abai.kz