كەشە اقىن، قوعام قايراتكەرى، "Abai.kz" اقپاراتتىق پورتالىنىڭ استاناداعى اۆتورى اۋىت مۇقيبەك قر ءماجىلىس دەپۋتاتى كارىباي مۇسىرمان مىرزاعا ءۇشبۋ حات جولداپ, قانداستاردىڭ ورالمان مارتەبەسىن الۋىنا قاتىستى بىرقاتار ماسەلەلەردى قوزعاعان بولاتىن.

ءماجىلىس دەپۋتاتى كارىباي يمانجانۇلى مۇسىرمان مىرزا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوش-قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»  قازاقستان رەسپۋبليكاسى زاڭىنىڭ جوباسىن تالقىلاۋعا ارنالعان ماجىلىستەگى جۇمىس توبىن باسقارادى.

كارىباي يمانجانۇلىنا قانداستاردىڭ قىنجىلىسى جازىلعان حات "Abai.kz" اقپاراتتىق پورتالىندا كەشە جاريا بولدى. ال سول كۇنى ،19-جەلتوقسان كۇنى كەشكى ۋاقىتتا دەپۋتات مىرزا رەسمي جاۋاپ جازىپتى.

جاۋابىندا ءبىزدىڭ ۇسىنىستارىمىز قايتا قارالاتىنىن ايتىپتى. بارەكەلدى! ءبىز دە كارىباي يمانجانۇلىنىڭ جاۋابىن نازارلارىڭىزعا ۇسىنعاندى ءجون كوردىك.

قادىرلى اۋىت مۇقيبەك!

ەلباسى بيىل ماۋسىم ايىندا استانادا بولعان دۇنيەجۇزى قازاقتارى قاۋىمداستىعىنىڭ بەسىنشى قۇرىلتايىندا سىرتقى ىستەر مينيسترلىگىنە اتاجۇرتقا كوشكىسى كەلەتىن قانداستارىمىزدىڭ قۇجاتتارىن ولاردىڭ تۇرىپ جاتقان ەلدەرىندە قامداپ، قازاقستانعا كەلگەندە ەشقانداي قيىنشىلىق تۋدىرماۋ تۋرالى تاپسىرما بەرگەنى وزىڭىزگە ءمالىم. ءبىز وسى ماسەلەنى قارالىپ وتىرعان زاڭ جوباسى ارقىلى زاڭداستىرىپ الساق، ەلگە ورالام دەگەن اعايىنعا ازاماتتىق الۋدا ەش قيىندىق بولمايدى دەپ ويلايمىن.

ال ءسىز ايتقان ۇسىنىستاردى ءتيىستى مينيسترلىكتەردەن ناقتى دەرەكتەر الدىرىپ، ءوزىڭىزدىڭ قاتىسۋىڭىزبەن تاعى ءبىر قارايتىن بولامىز. ويتكەنى، ءسىزدىڭ وسىعان دەيىن بەرگەن ۇسىنىستارىڭىزدا دا قانشا ادامنىڭ قانداي سەبەپپەن ءبىر جىل ىشىندە ازاماتتىق الۋعا قۇجات تاپسىرا الماي جۇرگەندىگى كورسەتىلمەگەن.ال ەكى مينيسترلىك وكىلدەرىنىڭ پىكىرىنشە، قازاقستان ازاماتتىعىن وڭايلاتىلعان تارتىپپەن العىسى كەلگەندەر بىلتىردان بەرى ەكى-ءۇش ايدا قۇجات جيناپ تاپسىرىپ، الىپ جاتقان كورىنەدى. جالپى، بۇل ماسەلەنى ءوزىڭىزدىڭ قاتىسۋىڭىزبەن جان-جاقتى زەرتتەۋىمىز كەرەك.

قر پارلامەنتى ءماجىلىسىنىڭ دەپۋتاتى،
جۇمىس توبىنىڭ جەتەكشىسى
كəرىباي مۇسىرمان

"اباي.كز" اقپاراتتىق پورتالىنا جازعان پىكىرى

Abai.kz