وزبەكستاندا ءبىلىم جانە مەديتسينالىق مەكەمەلەر تەمىر-تەرسەك تاپسىرۋدان بوساتىلادى
كەلەسى جىلدىڭ 1 قاڭتارىنان باستاپ وزبەكستاندا ءبىلىم جانە مەديتسينالىق مەكەمە قىزمەتكەرلەرى تەمىر-تەرسەك تاپسىرۋدان بوساتىلادى. بۇل جونىندە ەل پرەزيدەنتى شاۆكات ميرزياەۆتىڭ 18 جەلتوقسانداعى جارلىعىندا ايتىلعان.
وسىعان دەيىن وزبەكستاندا مەكتەپ مۇعالىمدەرى، مەديتسينالىق مەكەمە قىزمەتكەرلەرى جانە بالاباقشا تاربيەشىلەرىنە تەمىر-تەرسەك وتكىزۋ مىندەتتەلگەن. وتكىزبەگەن جاعدايدا، اقشالاي ايىپپۇل سالىنىپ كەلگەن.
بيىل جەلتوقسان ايىنىڭ باسىندا ءاندىجان قالاسى اكىمى ديلمۋرود راحماتۋللاەۆ كەزەكتى جينالىستا قىسقا مەرزىمدە 600 توننا تەمىر جيناۋدى تاپسىرعان. ءدال وسىنداي نۇسقاۋدى فەرعانا، ۇرگەنشى جانە نۇكىس باسشىلارى دا بەرگەن.
Abai.kz
