ءبىر پەردەلى پەسا

 

قاتىسۋشىلار:

كەڭەس - شەكارا كۇزەتىندەگى اسكەر.

كەڭەس - شەكارا كۇزەتىندەگى تاعى ءبىر اسكەر.

ايتباي - شەكارا كۇزەتىندەگى كوماندير.

 

تاڭ اتىپ كەلە جاتقانى، نە كەش باتىپ بارا جاتقانى بەلگىسىز بەيمەزگىل شاق. شەكارا ايماقتارىنىڭ بىرىندەگى ەكى ەلدى ءبولىپ تۇرعان ەسكى قورعان. قورعاننان كەيىن بيىك قاراۋىل كورىنەدى. وعان شىعاتىن باسپالداق باياعىدا قيراعان.  قاراۋىلدىڭ ماڭايىندا كىشكەنە ۇيشىك تۇر. ونىڭ ەسىگى شالقاسىنان اشىق جاتىر. ساحنانىڭ الدىنا تامان وكوپ ورنالاسقان. وكوپ ارقىلى جەرتولەگە بارۋعا بولادى. ءار جەردە قيراعان قيراندىلار بايقالادى.

 

بوس ساحنا. وكوپتىڭ وڭ جاق شەتىنەن يىعىندا اۆتوماتى بار كەڭەس شىعادى. ەسىنەپ، كەرىلىپ-سوزىلىپ تۇرادى. بىرەۋدى ىزدەگەن ادامشا جان-جاعىنا قاراعىشتايدى.

كەڭەس (وكوپتىڭ ىشىنە قاراپ ايقايلايدى). كەڭەس جولداس!

جۇگىرگەن دىبىس ەستىلىپ، وكوپتىڭ سول جاق شەتىنەن ەكىنشى كەڭەس شىعادى. ەكەۋىنىڭ سىرتقى ءتۇر-تۇلعالارى، ءجۇرىس-تۇرىستارى، كيگەن كيىمدەرى ءبىر-بىرىنەن اۋمايدى.

كەڭەس ( ەسىنەپ، كەرىلىپ- سوزىلىپ). قانشا ۋاقىت ۇيىقتاعامىز؟

كەڭەس. سەنى نە قارا باسىپ ءجۇر. بىلاي ۇيىقتاساق ەل مەن جەردى كىم قورعايدى؟

كەڭەس ( اسپانعا قاراپ). تاڭ اتىپ كەلە مە؟

كەڭەس (اسپانعا قاراپ). كەش باتىپ بارا جاتقان سەكىلدى.

كەڭەس. قانشا ۋاقىت ۇيىقتاعان بولدىق؟

كەڭەس. ساعات توقتاپ قالىپتى.

كەڭەس ( جەردە جاتقان گازەت قيقىمدارىن الادى. گازەتكە شۇقشيىپ، ەجىكتەپ وقيدى). سيريادا وزدەرىن يسلام حاليفاتىمىز دەپ اتاعان ۇيىم پايدا بولىپتى.

كەڭەس. ولار تۋرالى ەستىگەنمىن. ولار ادام ەتىن دە جەيتىن بولۋى كەرەك.

كەڭەستىڭ قاسىنا كەلىپ، گازەتىنىڭ ءبىر بەتىن الادى.

كەڭەس (ول دا گازەتكە شۇقشيىپ، ەجىكتەپ وقيدى ). ۋكراينادا لەنيننىڭ ەسكەرتكىشىن قۇلاتتى دەيدى.

كەڭەس. (گازەتىن ءتۇسىرىپ. شوشىنا). جۇرت جىندانايىن دەگەن ەكەن.

كەڭەس. ءبارىبىر ولار جازاسىز قالمايدى.

كەڭەس. قۇداي ءبارىن كورىپ تۇر عوي.

كەڭەس. ول بۇعان قاپالاناتىن بولۋ كەرەك.

كەڭەس. كەشە عانا راديودان كوسەم جولداس ءوزى سويلەگەن.

كەڭەس (تۇسىنبەي). قايداعى راديو ول؟

كەڭەس. قايداعى راديو دەيمىسىڭ؟

كەڭەس. ءيا.

كەڭەس ( ويلانعان بولىپ).  ون جىلدىقپەن قۇتتىقتاپ سويلەدى عوي.

كەڭەس ( گازەتتىڭ ەكىنشى بەتىن اۋدارىپ). بەرلين قالاسىنىڭ ورتاسىنان قامال تۇرعىزىپ جاتىر ەكەن.

كەڭەس. قامال تۇرعىزعاندارى دۇرىس بولعان ەكەن.

كەڭەس ( كەڭەستىڭ ارەكەتىن اينىتپاي قايتالاپ، گازەتتىڭ ەكىنشى بەتىن اۋدارىپ). كەشە، ياعني، ون ءبىرىنشى قىركۇيەك امەريكادا ءىرى ساۋدا ورتالىعى جارىلىپتى.

كەڭەس (گازەتىن شيىرشىقتاپ). ونى وقىپ العانمىن.

كەڭەس. مىنە مىندا انەكدود بار ەكەن، وقىپ بەرەيىن ساعان.

كەڭەس. تىڭداعىم كەلمەيدى.

كەڭەس.  قىزىق ەكەن..

كەڭەس. مەنىڭ ەتىگىمدى قايدا قويدىڭ؟

كەڭەس ( تۇسىنبەي ). قايداعى ەتىكتى ايتىپ تۇرسىڭ؟

كەڭەس. كەشە ساعان بەردىم عوي.

كەڭەس. سەندە ەتىك بولعان ەمەس.

كەڭەس. كەشە ساعان سۋ جاڭا ەتىك بەرگەم سىيلىققا. قاسىمىزدا سۇلتان قاراپ تۇردى.

كەڭەس. قاي سۇلتان؟

كەڭەس. ەكەۋمىزدىڭ دوسىمىز.

كەڭەس. مەندە سۇلتان دەگەن دوس جوق. مىندا ەكەۋمىز عانامىز.

كەڭەس ( رەنجىپ)  سەن مەنى تۇسىنبەي-اق وتەتىن بولدىڭ.

كەڭەس.  مەن سەنى تۇسىنۋگە تىرىسىپ كەلەم.

كەڭەس. شەكارانى شارلاپ كەلۋىمىز كەرەك.

كەڭەس. تاڭ اتسىن.

كەڭەس. تاڭنىڭ اتۋىن كۇتسەك كەش قالامىز.

كەڭەس ( اينالاسىنا ءۇڭىلىپ قارايدى). مىندا ءبىر نارسە تۇر ما؟

كەڭەس (ول دا ءۇڭىلىپ قارايدى). قاراڭعىلىق شىعار.

ەكەۋى ساحنانىڭ سول جاعىنا كەلىپ، بيىك قورعانعا تىرەلىپ، ارى- بەرى جۇرەدى.

كەڭەس ( تاڭدانىپ، قابىرعانى  سيپاپ). بۇل نە ؟

كەڭەس ( قابىرعانى سيپاپ) قورعان با، الدە جارتاس پا؟

كەڭەس. سوقىر تۇمان با؟

كەڭەس. جوق، قورعان ەكەن

كەڭەس.  بۇل مۇندا قايدان پايدا بولعان؟

كەڭەس. مەن سەنەن سۇرايىن دەپ تۇرمىن.

كەڭەس. شىنىمەن قورعان كورىپ تۇرمىسىڭ؟

كەڭەس. ءيا، كادىمگى قارا تاستان قالانعان قورعان ەكەن.

كەڭەس. تۇندە مەن كۇزەتتە تۇرعاندا جوق ەدى.

كەڭەس. ۇيقىدان ءولىپ پە ەدىڭ. تاڭ اعارعانشا تۇرمايمىسىڭ؟

كەڭەس. تاڭ اتپاي كەتتى. سوسىن...

كەڭەس. ءبىر جاماندىق بولسا، باسششتابقا جاۋاپ بەرەسىڭ.

كەڭەس (ساحنانىڭ وڭ جاعىن نۇسقاپ) بىلاي بارىپ كورەلىكشى.

ەكەۋى ساحنانىڭ وڭ جاعىنداعى قورعاننىڭ قاسىنا كەلەدى. قورعاننىڭ قاسىندا ارى-بەرى جۇرەدى. قورعاندى يتەرەدى.

كەڭەس (تاڭدانىپ، قابىرعانى سيپاپ). مۇندا دا قورعان تۇرعىزىلعان ەكەن.

كەڭەس ( شەكارانى ءبولىپ تۇرعان قورعاندى نۇسقاپ). مىنا قورعاننان باسقا قورعان جوق ەدى عوي.

كەڭەس. بۇل قالاي بولعانى؟

كەڭەس. ( تاڭدانىپ، قابىرعانى سيپاپ). قارا  جولدىڭ ۇستىنەن تۇرعىزعانى نەسى؟.

كەڭەس. (قابىرعانى سيپاپ). جالىقپاي قارا تاستان قالاپ شىعىپتى.

كەڭەس ( اينالاسىن شولىپ). اينالامىزعا تۇگەلدەي قورعان سوعىلىپتى.

كەڭەس( اينالاسىن كوزبەن شولىپ). قالاي عانا تەز وزگەرىپ كەتكەن؟

كەڭەس. كوزدى اشىپ-جۇمعانشا باسقا الەمگە اينالىپ سالا بەردى.

كەڭەس. ءبىر كۇننىڭ الدىندا  عانا جازىق دالا بولاتىن

كەڭەس. الىسقا قاراساڭ كوزىڭ تالاتىن  كەڭ دالا ەدى عوي.

كەڭەس. تومەندە اعىپ جاتقان وزەن دە كورىنبەي قالىپتى.

كەڭەس ( ويلانعان بولىپ) نە ايتۋعا بولادى؟

كەڭەس. دۇرىس بولعان. ەندى ءبىزدى  ەشبىر جاۋ الا المايدى

كەڭەس. جىندانعانبىسىڭ؟

كەڭەس. ۇرەي، قورقىنىش دەگەندى ۇمىتامىز.

كەڭەس. بىراق ءبىز قامالىپ قالدىق عوي.

كەڭەس. ءبىر جەرىندە شىعاتىن قاقپاسى بار شىعار.

كەڭەس. وندا ىزدەپ كورەلىك.

ەكەۋى قورعاندى  جاعالاپ، قاقپانى ىزدەپ ساحنانىڭ سول جاعىنا شىعادى.

كەڭەس. (ۇرەيلى بەينەدە). اينالامىز تۇگەلدەي قورعان، نە شىعار قاقپاسى دا جوق.

كەڭەس. سىعالايتىن تەسىك تە قالدىرماعاندارى نەسى؟

كەڭەس. (تاڭدانىپ). كادىمگى قىتاي قورعانى سەكىلدى.

كەڭەس. (قابىرعانى سيپاپ) . بەرلين قامالىنان اۋمايدى.

كەڭەس.  بىتەۋ جۇمىرتقا دەرسىڭ مۇنى.

كەڭەس. كادىمگى تەرەڭ قازعان كور دەسەڭ دە بولاتىنداي.

كەڭەس. كەلشى، يتەرىپ كورەلىك.

ەكەۋى بار كۇشتەرىمەن قورعاندى ۇزاق يتەرەدى.

كەڭەس (يتەرۋىن توقتاتىپ). قۇلاتۋ مۇمكىن ەمەس.

كەڭەس (يتەرۋىن توقتاتىپ). مىزعىماستاي ەتىپ تۇرعىزعانى كورىنىپ تۇر.

كەڭەس. قۇلاتاتىن بىردەڭە الىپ كەلشى.

كەڭەس ۇيشىكتەن ۇلكەن بالعا الىپ كەلەدى. بالعامەن ۇزاق سوققىلايدى.

كەڭەس (سوققىلاۋىن توقتاتىپ، ەنتىگىپ). قۇرىپ كەتسىن،  شاعىلاتىن ءتۇرى جوق.

كەڭەس. تەمىردەن بالقىتىپ قۇيعان سەكىلدى.

كەڭەس (قورعاننىڭ  باسىنا قاراپ). اسىپ تۇسسەك قايتەدى؟

كەڭەس ( قورعاننىڭ باسىنا قاراپ). ءبىزدىڭ قولىمىزدان كەلە مە؟

كەڭەس (قورعانعا جارماسىپ). كەل، مەنى دەمەپ جىبەرشى.

كەڭەستىڭ ارتىنان كوتەرگەن بولادى. كەڭەس قورعانعا جابىسىپ، ورمەلەمەك بولىپ ۇزاق ارپالىسادى. بىراق ءبىر ورىننان قوزعالا المايدى.

كەڭەس (قولىن جوعارى قاراي ەربەڭدەتىپ). كوتەر، بار كۇشىڭدى سالساڭشى.

كەڭەس (كەڭەستى كوتەرگەن بولىپ). كوتەرىلسەڭشى، ماعان  ءمىنىپ الماي.

كەڭەس. ۇستايتىن جەر جوق.

كەڭەس. يىعىمدى اۋىرتتىڭ، قۇرىپ كەتكىر.

كەڭەس. بولدى، جىبەر!

كەڭەس ( جەرگە ءتۇسىپ، قورعاننىڭ باسىنا قاراپ). مىنادان اسىپ ءتۇسۋ مۇمكىن ەمەس.

كەڭەس ( قورعاننىڭ باسىنا قاراپ). بيىكتىگىنە كوز جەتپەيدى عوي.

كەڭەس. اسپانعا بارىپ تىرەلىپ قاعان با؟

كەڭەس (قورعاننىڭ باسىنا قاراپ). قورعان ەمەس، قۇدىق سەكىلدى.

كەڭەس (كۇبىرلەپ، قايعىلى ۇنمەن). سوندا بۇل نە قىلعان قورعان؟

كەڭەس (كۇبىرلەپ، قايعىلى ۇنمەن) سوندا بۇل نە قىلعان  قۇدىق؟

كەڭەس. كومانديرگە مالىمدەسەك قايتەدى؟

كەڭەس (ۇرەيلەنە سىبىرلاپ). مەنىڭ وعان ايتۋعا ءداتىم جەتپەيدى.

كەڭەس. قايتسەك تە وعان ايتۋىمىز كەرەك.

كەڭەس. ءۇش باستى يتىنە تالاتىپ، وتقا كۇيدىرسە قايتەمىن؟.

كەڭەس. الجاسقاننان ساۋمىسىڭ، ءۇش باستى يت بولۋشى ما ەدى؟

كەڭەس. انە، سەنبەيسىڭ سەن.  اڭىزداردا سولاي ايتىلعان.

كەڭەس. وسى كومانديردىڭ اتى كىم دەپ ايتقان ەدى؟

كەڭەس (ويلانىپ). بىزگە ول تۋرالى ايتقان با ەدى؟

كەڭەس. باياعىدا وسىندا كەلە جاتقاندا قايىقشى شال ەسكەرتىپ ەدى عوي.

كەڭەس.  (ويلانىپ)  قاھار دەگەن بولۋى مۇمكىن.

كەڭەس. قاھار ەمەس. ءامىر دەگەن سەكىلدى ەدى.

كەڭەس. مۇمكىن، راحمان؟

كەڭەس. مۇمكىن،  راحيم؟

كەڭەس. الدە، مەيىر ما ەدى؟

كەڭەس (شامدانىپ). كورشى اۋىلداعى ناۋبايشى قاتىن عوي ول.

كەڭەس. بەيبىت شىعار وندا؟

كەڭەس. الدە، بەرىك پا ەدى؟

كەڭەس. مۇراگەر بولۋى دا مۇمكىن؟

كەڭەس. قادىر دەپ ايتقان جوق پا؟

كەڭەس. راسۋل بولۋى دا عاجاپ ەمەس.

كەڭەس. الدە، ءازيز؟

كەڭەس. جاپپار دەگەن شىعار؟

كەڭەس. جوق الدە حالىق پا ەدى؟

كەڭەس. كارىم دەپ ايتقان سياقتى ما ەدى؟

كەڭەس. الدە ءماجيد.

كەڭەس. مۇمىكن، ءۋالي

كەڭەس. راشيد بولۋى دا مۇمكىن.

كەڭەس (تاڭدانىپ). وسىنىڭ ءبارى ونىڭ اتى ما سوندا؟

كەڭەس. ونىڭ ون التى ەسىمى بولۋى مۇمكىن ەمەس

كەڭەس. مۇمكىن اتى كوپ شىعار ونىڭ

كەڭەس. ءيا، ەسىمە ەندى ءتۇستى، اتى ايت.

كەڭەس. ايت دەيمىسىڭ؟ نە ايتام؟

كەڭەس (ويلانعان بولىپ). جوق، ايت ەمەس، ايت..ايت...  ءيا، ايتباي.

كەڭەس. اتى ايتباي ەكەنىنە سەنىمدىسىڭ بە؟

كەڭەس. ءدال سونىڭ ءوزى.

كەڭەس. بار قايراتىمىزدى بويىمىزعا جيىپ مالىمدەيىك.

كەڭەس. ول ۇيىقتاپ جاتىر عوي.

كەڭەس. وياتساق قايتەدى؟

كەڭەس. كۇنالارىمدى سۇراپ، يتىنە تالاتا ما دەپ قورقام.

كەڭەس. مۇمكىن ول مەيىرىمدى.

كەڭەس (وتتى كورسەتىپ). مىنا وتقا قاقتاپ، ازاپتاسا قايتەم؟

كەڭەس. بىزگە  كەشىرىم جاسايتىن شىعار.

كەڭەس. سوندا نە ايتام وعان؟

كەڭەس (ويلانىپ). ءبىز قاماۋدا قالدىق دەپ ايت.

كەڭەس. ول سەنە قويار ما؟

كەڭەس. ءبىز ازاپتا ءومىر ءسۇرىپ جاتقانىمىزدى دا ەسكەرت.

كەڭەس. ءبىز وسىنشا تار كەڭىستىكتە جاسايتىنداي نە جازدىق سونشا دەپ ايتايىن.

كەڭەس. ولاي قاتتى كەتپە

كەڭەس ( قۋانىپ). وزىنە اتاپ قۇربان شالاتىنىمىزدى ايتايىن وندا.

كەڭەس. ءبىزدىڭ ونى جاقسى كورەتىنىمزىدى دە ايتشى.

كەڭەس. ەسىمىزدەن ءبىر ساتكە شىعارمايمىز دەپ ايتايىن.

ەكەۋى وكوپتىڭ قاسىنا كەلىپ، وكوپقا ءۇڭىلىپ قارايدى.

كەڭەس. قورقىپ تۇرمىن.

كەڭەس. تاۋەكەل ەتەلىك.

كەڭەس  جاسقانا باسىپ وكوپقا ءتۇسىپ كورىنبەي كەتەدى.

كەڭەس ( تاعاتسىزدانىپ، وكوپقا ەڭكەيىپ، اقىرىن داۋىستايدى). كەڭەس، بارمىسىڭ؟

كەڭەستىڭ ايقايلاعان داۋىسى ەستىلىپ، وكوپتان جۇگىرىپ شىعادى.

كەڭەس (شوشىنا، سىبىرلاپ). نە بولىپ قالدى؟

كەڭەس (ەنتىگىن باسا الماي).  ك...ك... كوماندير جوق؟

كەڭەس. جوعى قالاي؟

كەڭەس. بارلىق بولمەلەردى ارالاپ شىقتىم. تابا المادىم.

كەڭەس. ءيتى دە جوق پا؟

كەڭەس. بولمەلەردىڭ ءىشى جىلان جالاعانداي بوس جاتىر.

كەڭەس. ونى وسىندا دەگەندەرى وتىرىك بولعانى ما؟

كەڭەس. بىراق مەن ءيتىنىڭ ۇرگەنىن تالاي رەت ەستىگەنمىن.

كەڭەس. مۇمكىن كورشى اۋىلدىڭ يتتەرى شىعار ۇرگەن.

كەڭەس ( ۇرەيلەنىپ). ۇزاق جىل سەنگەن يەمىزدەن ايىرىلعانىمىز با سوندا؟

كەڭەس. ءبىز وعان كۇمان كەلتىرگەن بە ەدىك؟

كەڭەس (ويلانىپ). ەسىمدە قالماپتى.

كەڭەس. سەن وسىندا ۇيىقتاپ جاتىر دەگەنىڭ قايدا؟

كەڭەس (شامدانىپ). بىزدەن بۇرىنعىلار سولاي دەپ ايتقان.

كەڭەس. ءبىزدى قورعانعا قاماپ زىتىپ بەرگەن ەكەن.

كەڭەس. اۋىلدىڭ جەسىر قاتىندارىنا كەتكەن بولدى.

كەڭەس. ونى ۇيىقتاپ جاتىر دەپ ويلادىق عوي.

كەڭەس. بىزگە ءبىر باسشى بولماسا توز-توزىمىز شىعادى.

كەڭەس. ارينە، بىزگە ءبىر جارىلقاۋشى كەرەك.

كەڭەس. كوماندير بار بولسا دا ءبىز وعان قاماۋدا قالعانىمىزدى ايتا الماس ەدىك.

كەڭەس. (ۇرەيلى بەينەدە). ون التىنشى نومەر!

كەڭەس. ( قايعىلى ۇنمەن). ون التىنشى نومەر تىڭداپ تۇر.

كەڭەس. (كىبىرتىكتەپ). سوندا  بى...ءبى...ءبىز قاماۋدامىز با؟

كەڭەس. (تۇسىنبەي). بايلاۋدامىز با دەيسىڭ بە؟

كەڭەس. جوق، ءبىز قاماۋدا ما ەدىك دەيمىن.

كەڭەس. سەن ءوزىڭدى بايلاۋدامىن، (ويلانىپ) تۇتقىندامىن، قاماۋدامىن دەپ ويلايسىڭ با؟

كەڭەس. مەن ولاي ويلامايمىن. بىراق...

كەڭەس. قاماۋدا بولۋىمىز مۇمكىن ەمەس، ( ەكى قولىن ەربەڭدەتىپ). مىنە كوردىڭ بە،  بىز ەركىندىكتەگى ادامدارمىز.

كەڭەس. ەش كۇنامىز جوق ەكەنى داۋسىز.

كەڭەس (رۋحتانىپ). ءبىز تاۋەلسىزبىز. ءوزىڭ كورىپ تۇرسىڭ عوي، ءبىزدىڭ قول-اياعىمىز كىسەندەۋلى ەمەس.

كەڭەس (ەسى اۋىسقان ادامشا). سوندا قايدا تۇرمىز؟

كەڭەس. شەكارا كۇزەتىندە تۇرمىز.

كەڭەس. ءيا، دۇرىس ايتاسىڭ، شەكارا كۇزەتىندە تۇرمىز.

كەڭەس. شەكارا كۇزەتىندە تۇرعانىمىزعا كۇمانىڭ بولماسىن.

كەڭەس (جىلامسىراپ). ەندى نە ىستەيمىز؟

كەڭەس (ويلانىپ). مۇمكىن باسشتابقا حابارلايمىز؟

ەكەۋى ۇيشىككە  كىرىپ كەتەدى.

ۇنسىزدىك.

كەڭەس. اللو. باس شتابقا حابارلاسىپ تۇرعان شىعىس سولتۇستىك شەكارا بولىمىندەگى كەڭەس سۇلتانوۆ؟

داۋىس (ايەل ادامنىڭ داۋسى). سالەمەتسىز بە؟ ءسىز «دامۋ» كومپانياسىنا حابارلاسىپ تۇرسىز.

كەڭەس. بۇل باس شتاب ەمەس پە؟

داۋىس. نومەردەن قاتەلەسىپ تۇرسىز. بۇل «دامۋ» كومپانياسى.

تەلەفون ءۇزىلىپ كەتەدى. ەكەۋى ۇيشىكتەن شىعادى.

كەڭەس (اشۋلانىپ). قۇرىپ كەتسىن، قۇرىپ كەتكىر. نومەرلەرىن الماستىرىپ جىبەرگەن بە؟

كەڭەس. كەشە عانا حابارلاستىق ەمەس پە؟

كەڭەس. سەن نومەردى شاتاسىپ تەرگەن جوقسىڭ با؟

كەڭەس. ءدال سول نومەر.

كەڭەس. سوڭى جەتپىس بەس دەپ تەردىڭ بە؟

كەڭەس. ءيا.

كەڭەس. قايتا حابارلاسىپ كورەلىكشى.

ەكەۋى ۇيشىككە قايتا كىرەدى.

ۇنسىزدىك.

داۋىس ( ايەل ادامنىڭ داۋىسى). سالەمەتسىز بە؟  «نۇربانك» بولىمشەسى ءسىزدى تىڭداپ تۇر.

كەڭەس. اللو، بۇل باس شتاب با؟

داۋىس.  تۇرمىستىق قيىنشىلىقتاردان تىعىرىققا تىرەلىپ ءجۇرسىز بە؟

كەڭەس. بىزگە باس شتاب كەرەك ەدى.

داۋىس. ءوزىڭىزدىڭ جەكە ءۇيىڭىز بولعانىن قالايسىز با؟

كەڭەس. ۇزاق جىل ارماندادىم.

داۋىس. وندا بىزدەن تومەن وسىمدە قارىز الىڭىز.

كەڭەس. ءسىز نە ايتىپ كەتتىڭىز. بىزگە باس شتاب كەرەك.

داۋىس. كەشىرىڭىز، ءسىز نومەردەن شاتاسىپ تۇرسىز. ساۋ بولىڭىز.

تەلەفون ءۇزىلىپ كەتەدى. ەكەۋى ۇيشىكتەن شىعادى.

كەڭەس. مەنىڭ ءۇيىم جوق ەكەنىن قايدان ءبىلىپ العان؟

كەڭەس. كىم ول، تاني الدىڭ با؟

كەڭەس. تاني المادىم. مەنىڭ تىعىرىققا تىرەلىپ جۇرگەنىم تۋرالى  دا بىلەدى ەكەن.

كەڭەس. سەن نومەردى قاتە تەرىپ جاتقاننان ساۋمىسىڭ؟

كەڭەس (رەنجىپ). وتىز جىلدان بەرى حابارلاسىپ كەلە جاتقان نومەردى بۇگىن ۇمىتىپ قالامىن با؟

كەڭەس. وندا مەن حابارلاسىپ كورەيىن

ەكەۋى ۇيشىككە كىرىپ كەتەدى.

ۇنسىزدىك.

كەڭەس. اللو، شىعىس شەكارا بولىمىندەگى كەڭەس سۇلتانوۆ  حابارلاسىپ تۇر.

داۋىس ( ايەل ادمنىڭ داۋىسى). سالەمەتسىز بە؟ بۇل  «بولاشاق» بيزنەس باستاۋ ورتالىعى. ءبىز ءسىزدىڭ جاڭا مۇمكىندىكتەرگە جەتىپ، بايۋ جولىنا تۇسۋىڭىزگە كومەكتەسەمىز.

كەڭەس. كەشىرىڭىز، بۇل باس شتابتىڭ نومەرى ەدى عوي.

داۋىس. جوق. بۇل «بولاشاق» بيزنەس باستاۋ ورتالىعى.

كەڭەس. قالايشا وزگەرىپ كەتكەن؟

داۋىس. كەشىرىڭىز، ءبىز ونداي سۇراقتارعا جاۋاپ بەرە المايمىز.

تەلەفون ءۇزىلىپ كەتەدى. ەكەۋى ۇيشىكتەن شىعادى.

كەڭەس. نومەردى قاتە تەرىپ المادىڭ با؟

كەڭەس. ءدال سول نومەر.

كەڭەس. قانداي ورتالىقپىز دەيدى؟

كەڭەس ( ەسىنە تۇسىرە الماي). بي ورتالىعى..... جو...جوق بيزنەس ورتالىق دەيدى

كەڭەس. بيزنەس دەگەن  نە سوندا؟

كەڭەس ( ويلانىپ). تاماقتىڭ اتى بولۋ كەرەك.

كەڭەس. ادامنىڭ اتى سەكىلدى.

كەڭەس (قايعىلى ۇنمەن). ەندى نە ىستەسەك بولادى؟

كەڭەس. قايتا ءبىر حابارلاسىپ كورشى؟

ەكەۋى ۇيشىككە قايتا كىرەدى.

ۇنسىزدىك.

داۋىس (ايەل ادامنىڭ داۋىسى). سالەمەتسىز بە! «توتەنشە جاعدايلاردىڭ الدىن الۋ» ءبولىمى ءسىزدى تىڭداپ تۇر، ايتا بەرىڭىز.

كەڭەس. بىزگە كومەكتەرىڭىز كەرەك.

داۋىس. ءيا، ايتىڭىز قانداي كومەك كەرەك ەدى.

كەڭەس. ءبىز قاماۋدا قالدىق،

داۋىس. كىم سىزدەردى قاماپ جۇرگەن؟

كەڭەس. قۇداي... جو.. جوق. كىم ەكەنىن بىلمەيمىز.

داۋىس. قازىر قايداسىزدار؟

كەڭەس. ءبىز ەلىمىزدىڭ شىعىس سولۇستىك شەكارا ايماعىندا كۇزەتتەمىز.

داۋىس. ناقتى ايتىڭىزشى.

كەڭەس. قىزىل تۋ اۋىلىنان شىعىسقا قاراي ون بەس شاقىرىم جەردە ورنالاسقان شەكارا كۇزەتىندەمىز.

داۋىس. قازىر كىشكەنە كۇتە تۇرىڭىز.

ۇنسىزدىك

داۋىس. كەشىرىڭىز. كارتادا ونداي اۋىل كورسەتىلمەگەن.

كەڭەس. كورسەتىلمەگەنى قالاي؟ ءبىزدىڭ قولىمىزداعى كارتادا بادىرايىپ تۇرماي ما؟

داۋىس.ءبىزدىڭ قولىمىزداعى كارتادا قىزىل تۋ دەگەن اۋىل مۇلدە جوق.

كەڭەس. ءسىز ناقتىلاپ قارادىڭىز با؟

داۋىس. ءبىز سپۋتنيكپەن باقىلايمىز. بىراق سىزدەر ايتقان اۋىل مۇلدە جوق.

كەڭەس. بۇل مۇمكىن ەمەس!

داۋىس. مۇمكىن ءوزىڭىز شاتاسىپ تۇرسىز.

كەڭەس. التىناي بۇل سەنبىسىڭ؟ مەن كەڭەسپىن عوي.

داۋىس (ەركەكتىڭ كۇلكىسى قوسا ەستىلەدى). قويا تۇرشى.

كەڭەس. التىناي، نە دەيسىڭ؟

داۋىس. كەشىرىڭىز، سىزگە ەمەس.

كەڭەس. التىناي، قاسىڭداعى ەركەك كىم؟

داۋىس. دۇرىستاپ ويلانىپ الىپ، قايتا حابارلاسىڭىز.

كەڭەس. ترۋبكانى قويما. دۇرىستاپ سويلەسەلىك.  مەن سەنى ءالى دە بۇرىنعىداي جاقسى كورەم.

تەلەفون ءۇزىلىپ كەتەدى. ەكەۋى ۇيشىكتەن شىعادى.

كەڭەس. قايداعى التىنايدى ايتىپ شاتىپ كەتتىڭ؟

كەڭەس. داۋىسى سونىڭ داۋىسى عوي، بايقامادىڭ با؟

كەڭەس. مۇلدە باسقا ادام ول.

كەڭەس. باعانادان بەرى بارلىق تەلەفوندا جاۋاپ بەرىپ وتىرعان سول عوي.

كەڭەس. ول بولۋى مۇمكىن ەمەس.

كەڭەس (شامدانىپ). سەن بايقامايسىڭ، البەتتە. ساعان تاماق قانا بولسا بولدى.

كەڭەس. وسى ۋاقىتقا دەيىن مەن سەنى سۇيرەپ كەلە جاتىرمىن.

كەڭەس. ول مەنى ەشقاشان سۇيگەن ەمەس.

كەڭەس. سەن ونى ىزدەمەدىڭ عوي.

كەڭەس. مەن ونى ىزدەدىم، بىراق تابا المادىم.

كەڭەس. شتابتىڭ نومەرىن سۇراۋىمىز كەرەك ەدى.

كەڭەس. التىنايدى ايتاسىڭ با؟

كەڭەس. اقىلىڭنان الجاسقانبىسىڭ، ول ءجاي ءبىر ايەل عوي.

كەڭەس. (قامىققان بەينەدە). ماعان وكپەلى سەكىلدى قاسارىسىپ تۇر. ايتا قويار ما ەكەن.

كەڭەس. (كەڭەستى سىلكىلەپ). اقىلىڭنان الجاسايىن دەدىڭ بە؟

كەڭەس ( جەرگە وتىرا كەتىپ، جىلامسىراپ). مەن سەنى ىزدەپ ءجۇرمىن دەپ ايتۋعا دا ۇلگىرتپەدى.

كەڭەس. ول باياعىدا قوراداعى بەلاعاشقا اسىلىپ ولگەن.

كەڭەس. مەنى مۇگەدەك دەپ مەنسىنبەگەن بولدى.

كەڭەس. سەنىڭ بار مۇشەڭ ساۋ تۇر  عوي.

كەڭەس. ونى ساعان ايتا المايمىن.

كەڭەس. مەنەن ەشتەڭەڭدى جاسىرا المايسىڭ.

كەڭەس (تورىعىپ). ەندى نە ىستەيمىز؟

كەڭەس. قايتا حابارلاسىپ كورەلىك.

ەكەۋى قايتادان ۇيشىككە كىرىپ كەتەدى.

ۇنسىزدىك.

داۋىس ( ايەل ادامنىڭ داۋىسى).  سالەمەتسىز بە؟

تەلەفون ءۇزىلىپ كەتەدى.

ەكەۋى ۇيشىكتەن شىعىپ، سىلەيىپ ۇزاق تۇرادى.

كەڭەس. جاڭاعى ايەل كىم بولدى ەكەن؟

كەڭەس. التىناي ەمەس.

كەڭەس. تاعى دا حابارلاسساق قايتەدى؟

كەڭەس. ءبارىبىر باس شتابتاعىلار تەلەفون قابىلدامايدى.

كەڭەس. سوندا تەلەفون قابىلداۋشىلار  ۇزدىكسىز وزگەرە بەرەتىن بولعانى ما؟

كەڭەس. وزگەرۋدىڭ شەگى جوق بولۋى مۇمكىن.

كەڭەس ( تاڭدانىنپ) . ماڭگى وسىلاي وزگەرە بەرەتىن بولعانى عوي.

كەڭەس ساحنانىڭ سول جاعىنا بارىپ ايعايلايدى.

كەڭەس (ايقايلاپ). كۇزەتشى، اۋ، كۇزەتشى؟

كەڭەس (جاقتىرماي). وتىز جەتىنشى نومەر، نەمەنەگە سونشا ايعايلايسىڭ؟

كەڭەستىڭ قاسىنا قايتىپ كەلەدى.

كەڭەس. ون التىنشى نومەر، مەن  كۇزەتشىنى شاقىرىپ جاتىرمىن.

كەڭەس. وتىز جەتىنشى نومەر، قايداعى كۇزەتشىنى ايتىپ تۇرسىڭ؟

كەڭەس ( كەڭەسكە سىبىرلاپ). ءبىزدى قاماپ قويدى ما ەكەن دەيمىن.

كەڭەس (تۇسىنبەي). نە ءۇشىن قاماپ قويادى؟

كەڭەس. مەن دە بىلمەيمىن عوي نە ءۇشىن قاماعاندارىن.

كەڭەس. مۇمكىن، ءبىزدى جازاعا تارتاتىن شىعار.

كەڭەس. وتىز جەتىنشى نومەر مەن ەشقانداي كۇنا  وتكىزبەدىم.

كەڭەس. سوندا  تۇرمەدەمىز دەپ ويلايسىڭ با؟

كەڭەس (قورعاندى كوزىمەن شولىپ). تۇرمەنىڭ بيىك قورعاندارىنان اۋماي تۇرعانىن بايقامادىڭ با؟

كەڭەس (قورعاندى كوزىمەن شولىپ). بەسىنشى تۇرمەنىڭ قابىرعالارى سەكىلدى ەكەن.

كەڭەس. ءيا، سىز تارتىپ، ( يىسكەلەپ) كوگەرگەن  ءيىس مۇرنىڭدى جارادى.

كەڭەس. بىراق، بۇل مۇمكىن ەمەس. ءبىز ەركىن ادامدارمىز عوي.

كەڭەس. ءيا، ءبىز شەكارا كۇزەتىندەگى اسكەرلەرمىز.

كەڭەس. بالكىم، ىستەگەن كۇنامىزدى بىلگەن شىعار.

كەڭەس. قاي كۇنامىزدى ايتاسىڭ؟

كەڭەس. قايسىبىرىن ايتايىن.

كەڭەس. ءبىزدى تۇرمەگە قاماعان بولسا كۇزەت قويۋى كەرەك قوي.

كەڭەس. كۇزەتشى ۇيىقتاپ قالعان شىعار.

كەڭەس. تاعدىرعا كونۋدەن باسقا امال جوق.

كەڭەس. بىراق  شەكارانى ادالدىقپەن كۇزەتىپ تۇرعانىمىزعا كۇمانىڭ بولماسىن.

كەڭەس. قانشاما ۇيقىسىز تۇندەردى وتكىزدىك.

كەڭەس. قاراۋىلدىڭ باسىندا سۋىققا توڭدىق.

كەڭەس. ءبىر اتىستا يىعىڭنان جارالانعانىڭدى قوسىپ قوي.

كەڭەس. كۇزەتشىدەن بىلسەك قايتەدى.

كەڭەس. نەنى بىلگىڭ كەلەدى؟

كەڭەس. ءبىزدى نەگە قامايدى، ءبىزدىڭ جازىعىمىز نە؟

كەڭەس ( قۋانىپ). مۇمكىن ءوزىمىزدى اقتاپ الارمىز.

ەكەۋى ساحنانىڭ وڭ جاعىنداعى قورعاننىڭ تۇبىنە بارىپ تۇرادى.

كەڭەس ( ايقايلاپ). ەي، كۇزەتشى، بار بولساڭ ءتىل قات.

كەڭەس (ول دا ايقايلايدى). كۇزەتشى، ءبىزدى تىڭداپ تۇرمىسىڭ؟

كەڭەس ( ايقايلاپ). اۋ، كۇزەتشى دەيمىن.

ەكەۋى قورعانعا قۇلاقتارىن توسىپ تىڭداعان بولادى.

كەڭەس (كۇرسىنىپ). ءتىل قاتپايدى.

كەڭەس.ۇيىقتاپ جاتقان بولار؟

كەڭەس. كۇزەتتى يەن قالدىرىپ، قىدىرىپ كەتكەن سەكىلدى.

ەكەۋى ساحنانىڭ سول جاعىنداعى قورعاننىڭ تۇبىنە كەلىپ تۇرادى.

كەڭەس (ايقايلاپ). ەي، كۇزەتشى، بار بولساڭ ءتىل قات.

كەڭەس. ەي، مۇرا. سەنبىسىڭ كۇزەتتە تۇرعان؟

كەڭەس.(ايقايلاپ). نە ءۇشىن قاماعاندارىڭدى تۇسىندىرەتىن ۋاقىت جەتتى.

كەڭەس. كولحوزدىڭ قويىن ۇرلاعان مەن ەمەسپىن. اسەت بولاتىن.

كەڭەس. نان ۇرلاپ جەگەن ءۇشىن قاماۋ قاي زاڭدا بار ەكەن؟

كەڭەس. ءتىل قاتار ءتۇرى جوق.

كەڭەس (اشۋلانىپ). قانداي قىرسىق ەدى ءوزى.

كەڭەس (ايقايلاپ). ەي، كۇزەتشى، تىڭداپ تۇرمىسىڭ ءبىزدى.

كەڭەس ( ول دا ايقايلاپ).  ءبىزدى نەگە قامادىڭدار؟

كەڭەس. (ايقايلاپ). قامايتىنداي قانداي قىلمىس جاسادىق ؟

قۇلاقتارىن قورعانعا توسىپ تىڭدايدى

كەڭەس. بىرەۋ جۇرگەن سەكىلدى مە؟

كەڭەس. اياق باسقان دىبىسى ەستىلىپ تۇر.

كەڭەس (باس كيىمىن شەشىپ، قۇلاعىن توسەپ). شىنىمەن اياق دىبىسىن ەستىپ تۇرمىسىڭ؟

كەڭەس. سوعان وقسايدى.

كەڭەس. گۋىلدەپ سوققان جەل عوي.

كەڭەس. جاڭا بىرەۋ جۇرگەندەي بولعان.

كەڭەس. ۇشىپ وتكەن قۇس سەكىلدى.

ەكەۋى ۇيشىكتىڭ قاسىنا قايتىپ كەلەدى دە، كورەرمەنگە قاراپ ۇزاق ءۇنسىز تۇرادى.

كەڭەس (قايعىلى ۇنمەن). قايدا تۇرعانىمىز ءجايلى قۋانارلىق ءبىر نارسە ايتشى.

كەڭەس. شەكارا كۇزەتىندە تۇرعانىمىزعا ەش كۇمانىڭ بولماسىن.

كەڭەس (قۋانىپ). ءبىز تۇرمەدە ەمەس بولدىق قوي سوندا؟

كەڭەس. قاماۋدا بولساق كۇزەتشى بولار ەدى.

كەڭەس. دەمەك ءبىز ەركىندىكتە جۇرگەنىمىز شىندىق بولدى.

كەڭەس. مەن ساعان ءبىز ەركىندىكتەگى ادامدارمىز دەپ باياعىدا ايتقان بولاتىنمىن.

كەڭەس. نەگە بۇلاي تىعىرىققا تىرەلىپ قالعانىمىز تۋرالى ويلانالىق.

كەڭەس (ويلانعان بولادى). مەن ويلانا المايمىن.

كەڭەس. نەگە ويلانا المايسىڭ؟

كەڭەس. مەن وسى ۋاقىتقا دەيىن ويلانىپ كورگەن ەمەسپىن.

كەڭەس. تىنىشتال، ءسال ويلانايىن.

ەكەۋى  ءۇنسىز تۇرادى.

كەڭەس (ايقايلاپ). اۋ، كىم بار مۇندا، قورعاننىڭ سىرتىندا ادام بار ما؟

كەڭەس. بىرەۋ بولسا ءتىل قاتار ەدى.

كەڭەس ( ايقايلاپ).  سىرتتا ءتىرى پەندە بولسا ءتىل قاتىڭدار!

كەڭەس ( ايقايلاپ). كىم بار مۇندا؟

كەڭەس (ايقايلاپ). ەي، ءتىل قاتىڭدار!

ۇنسىزدىك.

ساحنانىڭ تۇبىندەگى شەكارانى ءبولىپ تۇرعان قورعاننىڭ ارعى بەتىنەن دۋماندى  مۋزىكانىڭ ۇنىمەن  بىرگە ايەلدەردىڭ كۇلكىلەرى،بوكالداردىڭ سىڭعىرلاعان داۋىسى قاتار ەستىلەدى. كوڭىلدى كەش بولىپ جاتقان سەكىلدى.  ەكى كەڭەس تە مىلتىقتارىن كەزەنىپ، جەرگە جاتا كالادى.

كەڭەس (سىبىرلاپ). بۇلار قايدان ءجۇر؟

كەڭەس ( سىبىرلاپ). كورشى ەلدىڭ اسكەرلەرى كەلگەن سەكىلدى.

كەڭەس. قىز- قىرقىنداردى ەرتىپ الىپتى.

كەڭەس. كوڭىلدى عوي وزدەرى.

ورىندارىنان تۇرىپ،  ساحنانىڭ تۇبىندەگى قورعانعا كەلەدى دە، تىڭدايدى. مۋزىكا داۋىسى، ايەلدەردىڭ كۇلكى ارالاس داۋىستارى. ەستىلىپ تۇرادى.

كەڭەس. قاراساق قايتەدى؟

كەڭەس. ءبىلىپ قويماي ما؟

كەڭەس. بىلسە، كومەك سۇرايمىز.

كەڭەس. اتىپ تاستاپ جۇرمەسىن.

كەڭەس. ابايلايىق!

كەڭەس قورعاننىڭ  قابىرعاسىنان كىشكەنتاي تەسىك اشادى. تەسىكتەن جارىق ءتۇسىپ تۇرادى. سىعالاپ قارايدى.

كەڭەس ( تاڭعالعان داۋىسپەن). مىنا جاق باۋ-باقشاعا اينلالىپ كەتىپتى عوي،

كەڭەس. قويشى، كەشە عانا يەن، تاقىر دالا ەمەس پە ەدى.

كەڭەس. جاپ- جاسىل شالعىن، جاپىراعى جايقالعان جەمىس  اعاشتار ءوسىپ تۇر. ۇشىپ جۇرگەن قۇستاردى قارا!

كەڭەس (تىڭداعان بولىپ). سىڭعىرلاعان  بۇلاقتىڭ داۋىسى ەستىلىپ تۇر.

كەڭەس. باقشانىڭ ارعى بەتىندە  ەكى قاباتتى ءزاۋلىم ءۇي كورىنىپ تۇر.

كەڭەس (قۋانىپ). ءبىز ارمانداعانداي ما؟

كەڭەس. اس تولى داستارحان باسىندا  بىر ەر ادام وتىر.

كەڭەس. كوماندير ەمەس پە؟

كەڭەس. تەرىس قاراپ وتىر. تاني المادىم.

كەڭەس (قوماعايلانىپ). قانداي تاعامدار تۇرعانىن ايتشى؟

كەڭەس. الما، المۇرت. ءبىر تاباق قاقتالعان قوي ەتى، تاۋىق ەتى، مانتى، اراق- شاراپتار تۇر.

كەڭەس (كەڭەستى يتەرىپ). مەن دە كورەيىنشى.

كەڭەس. كۇتە تۇرشى

كەڭەس. ( كەڭەستى يتەرىپ جىبەرىپ، قارايدى، تاڭدانىپ). قانداي كوركەم جەر، قانداي كۇشتى جارىق!

كەڭەس. كادىمگى ءجانناتتىڭ ءوزى دەسەڭ دە بولادى.

كەڭەس ( تاڭقالعان داۋىسپەن). ءبىر توپ قىز بيلەپ ءجۇر. قانداي سۇلۋ ەدى!

كەڭەس (قۇمارتىپ) . جالاڭاش پا؟

كەڭەس. جامىلعىلارى بار.

كەڭەس. ولار نە ىستەپ ءجۇر مۇندا؟

كەڭەس. كوڭىل كوتەرگەلى كەلگەن سەكىلدى.

كەڭەس. اراسىندا التىناي جوق پا، قاراشى!

كەڭەس. بايلاردىڭ اراسىندا وعان قايداعى ورىن.

كەڭەس ( كەڭەستى يتەرەدى). مەن كورەيىن.

كەڭەس. جۇپار ءيىس مۇرنىمدى جارىپ بارادى.

كەڭەس ( كەڭەستى يتەرىپ جەبەرىپ، قارايدى. قۋانىپ). التىناي ءجۇر ورتالارىندا.

كەڭەس. جىندانعانبىسىڭ، ول باياعىدا ۋ ءىشىپ ولگەن.

كەڭەس. التىناي دەپ ايقايلاسام قايتەدى؟

كەڭەس. ول التىناي ەمەس.

كەڭەس. مەنى كەدەيسىڭ دەپ مەنسىنبەدى. استىندا قىمبات كولىك. قالادا ەكى جەردە ءۇيى بار ەكەن.

كەڭەس. ول دا سەنى جاقسى كورگەن بولاتىن.

كەڭەس. ەندى مىنە الگى ءبىر شىعىس ەرتەگىلەرىندەگىدەي كەرەمەت كوركەم باقشاسى دا بار ەكەن.

كەڭەس. ونىڭ ولگەنىنە وتىز جىل بولدى.

كەڭەس. ءدال سونىڭ ءوزى. سەن ونى تانىمايسىڭ.

كەڭەس. ولاردان كومەك سۇرالىق.

كەڭەس. ول ماعان وكپەلى، جاۋاپ بەرمەي قويار ما دەپ قورقامىن.

كەڭەس ( تەسىكتىڭ تۇبىنە كەلىپ، داۋىستاپ سويلەيدى). بىزگە كومەكتەرىڭىز كەرەك ەدى.

كەڭەس ( تىڭداعان بولىپ). ەستىگەن جوق.

كەڭەس ( داۋىسىن كوتەرىپ). ءبىزدى تىڭداپ تۇرسىزدار ما؟

كەڭەس. ول قىرسىق دەپ ايتتىم عوي.

كەڭەس (قورعاندى ۇرعىلاپ، ايقالايدى). مۇندا قامالىپ قالدىق. بىزگە كومەكتەرىڭىز كەرەك.

كەڭەس (ايقايلاپ). التىناي، مەن كەڭەسپىن. تىڭداپ تۇرمىسىڭ؟

كەڭەس ( ايقايلاپ). ءبىزدى قۇتقارىپ الىڭىزدار!

كەڭەس (ايقايلاپ). ماعان وكپەلى ەكەنىڭدى بىلەم. ءبىز ءبارىن ۇمىتالىق.

كەڭەس. ءبىزدىڭ داۋىسىمىز ەستىلمەيدى.

كەڭەس. ول قاساقانا ىستەپ تۇر.

كەڭەس ( ايقايلايدى). ءبىزدى قاپاستان شىعارىپ الىڭدار!

ەكەۋى  ساحنانىڭ ورتاسىنا كەلىپ، قۇلاقتارىن باسىپ تۇرىپ بىرلىكتە ۇزاق ايقايلايدى. مۋزىكانىڭ داۋىسى بىرتە-بىرتە باسەيىپ، وشەدى. ەكەۋى باياعى ورىندارىنا بارىپ، تەسىكتەن سىعالايدى.

كەڭەس ( تەسىكتەن سىعالاپ). كەتىپ قالىپتى.

كەڭەس. قايدا كەتتى؟

كەڭەس. ۇيلەرىنە كەتكەن بولۋ كەرەك.

كەڭەس (ۇرەيلەنىپ). ەندى كىم قۇتقارادى ءبىزدى بۇل تىعىراقتان؟

كەڭەس. ءبىر  قۇتقارۋشى كەلىپ قالار.

كەڭەس. جۇرتتىڭ ءبارى قاماۋدا قالىپ، وزدەرىمەن ابىگەر بولىپ جاتقان شىعار؟

كەڭەس (قايعىلى ۇنمەن). ەندى نە ىستەۋىمىز كەرەك؟

كەڭەس. ءبىر امال تابايىق.

كەڭەس. جەردى قازىپ، قورعاننىڭ استىنان وتەلىك.

كەڭەس. قورعاننىڭ سىرتىندا تاعى دا قورعان بولىپ جۇرمەسىن.

كەڭەس. وندا تەرەڭ قىلىپ قازالىق.

كەڭەس ۇيشىكتەن كۇرەك الىپ كەلەدى. ەكەۋى ساحنانىڭ سول جاق شەتىنە بارادى. كەڭەس جەردى قازا باستايدى

كەڭەس (جەردى قازىپ جاتىپ). ويماقتاي تار جەرگە قامالىپ ءومىرىمىز وتپەك پە؟

كەڭەس. ۋايىمداما، ءبىز شىعىپ كەتەمىز؟

كەڭەس توپىراق اراسىنان جاس بالانىڭ  اياق كيىمىن الىپ شىعىپ كەڭەسكە ۇستاتادى.

كەڭەس. ءبىز كىمبىز سوندا دەگەن سۇراق مەنى مازالايدى.

كەڭەس (اياق كيىمدى اۋدارىستىرىپ قاراپ). بۇل اياق كيىمدى جوعالتىپ الىپ، اكەمنەن سوگىس ەستىگەن ەدىم.

كەڭەس. سوندا نە ىستەدى ساعان؟

كەڭەس. قاراڭعى بولمەگە ءبىر كۇن بويى قاماپ قويدى.

كەڭەس تەرەڭدەتىپ قازا باستايدى. وردىڭ ىشىنەن سۋرەت الىپ شىعادى.

كەڭەس (سۋرەتتى كورسەتىپ). مۇندا سۋرەت تە بار ەكەن.

كەڭەس ( سۋرەتتى قولىنا الىپ). بەس جاس كەزىمدەگى سۋرەت عوي.

كەڭەس. بۇل سەنبىسىڭ؟

كەڭەس. ءيا، مەنمىن.

كەڭەس. قاسىڭداعى كىم؟

كەڭەس (سۋرەتكە ءۇڭىلىپ). اكەم سەكىلدى. ونىڭ بەينەسى تولىق ەسىمدە قالماپتى.

كەڭەس وردىڭ ىشىنەن ارقان الىپ شىعىپ،كەڭەسكە ۇستاتادى.

كەڭەس (ارقاندى قولىنا الىپ). بۇل اكەم اسىلىپ ولگەن ارقان عوي. شەشەم جىلاپ ءجۇرىپ، ءوز قولىمەن ورتەپ جىبەرىپ ەدى بۇل ارقاندى. مەن وندا كىشكەنەمىن، ەمىس-ەمىس ەسىمدە.

كەڭەس. نەگە اسىلىپ ءولدى؟

كەڭەس. نەگە اسىلىپ ولگەنى ءالى بەلگىسىز.

كەڭەس. توقسانىنشى جىلدارى كوپ ادام اسىلىپ ءولدى عوي.

كەڭەس وردى تەرەڭدەتىپ قازا باستايدى. وردىڭ ىشىنەن كىسەن الىپ شىعادى.

كەڭەس ( كىسەندى كورسەتىپ). مىنانى قارا؟

كەڭەس ( قورقىپ، ايقايلاپ، كوزىن باسىپ الادى). تاستا ارى قاراي. كورسەتپە ماعان.

كەڭەس ( كىسەندى ورعا تاستاپ). نەگە سونشا قورىقتىڭ؟

كەڭەس. مىناۋ ءدال سول كىسەن عوي.

كەڭەس. قايسى كىسەن دەيسىڭ مۇنى؟

كەڭەس. بالا كەزىمدە ءۇيدىڭ الدىندا ويناپ جۇرگەندە قول- اياعىنا كىسەن سالعان ءبىر ادامدى الىپ بارا جاتتى. كىسەن قولدارىن قيىپ كەتكەن. انا ادامنىڭ قولىنداعى كىسەن سىلدىر- سىلدىر ەتەدى. مەنىڭ قاسىمنان جاناپ ءوتتى.

كەڭەس. مىناۋ ءدال سول كىسەن ەكەنىنە سەنىمدىسىڭ بە؟

كەڭەس. ءدال سول كىسەننىڭ ءوزى. سىلدىرلاعان داۋىسى دا اۋمايدى.

كەڭەس. ( وردان  تاعى ءبىر سۋرەت الىپ كەڭەسكە بەرەدى ). مۇندا تاعى ءبىر سۋرەت بار ەكەن.

كەڭەس (سۋرەتكە قاراپ). مىناۋ سول كىسەندەۋلى ادامنىڭ  ءدال ءوزى عوي.

كەڭەس وردى تەرەڭدەتىپ قازىپ، ءارتۇرلى زاتتاردى سىرتقا قاراي لاقتىرا باستايدى.

كەڭەس. مىندا كىتاپ، كيىم، نە دەگەن كوپ زاتتار ەدى.

كەڭەس. مەنىڭ  ومىردە كورگەن، قولدانعان، ەستىگەن، ءدامىن تاتقان زاتتارىم عوي.

(كەڭەس زاتتاردى لاقتىرۋىن توقتاپايدى). مۇلدە قوقىسىققا تولىپ كەتكەن.

كەڭەس. اتامنان قالعان ءبىر مۇرا بار ەدى، ونى كەيىن جوعالتىپ الدىم. ءيا، جوعالتىپ الدىم. سول جوق پا ەكەن قاراشى.

كەڭەس. ول قانداي زات ەدى؟

كەڭەس ( ويلانعان بولىپ). ايتەۋ ءبىر ەسكى زات، بابامىزدان قالعان مۇرا ەدى.

كەڭەس. اتىن ايتساڭشى.

كەڭەس. اتىن دەيمىسىڭ. اتى قالاي ەدى، قۇداي-اۋ! اتىن ۇمىتتىم، ول وتە ەسكى زات بولاتىن.

كەڭەس (وردى ءتىنتىپ). مىندا ونداي ەسكى زاتتار جوق. تۇگەلدەي جيىرماسىنشى عاسىردىڭ زاتتارى عانا.

كەڭەس. قانداي وكىنىشتى

كەڭەس وردان قوقىسىقتاردى ۇزدىكسىز قازىپ شىعارا بەرەدى.  ءارتۇرلى زاتتار ارالاسقان قوقسىق ءۇيىلىپ قالادى.

كەڭەس. قوقسىقتاردى تازالاپ ءبىتۋ مۇمكىن ەمەس. قازعان سايىن شىعىپ جاتىر.

كەڭەس. سەبەبى مەن ومىرىمدە كوپ نارسەلەردى كوردىم، قولداندىم، تىڭدادىم عوي.

كەڭەس. ءىشى قوقىسقا تولعان، قانشا قازسام دا تەرەڭدەيتىن ەمەس.

كەڭەس. قوقسىق دەمە، ولار مەنىكى عوي؟

كەڭەس. سەنىكى بولعانىمەن تۇگەلدەي قوقىس جينالىپ قالىپتى.

ءيتتىڭ ۇرگەن داۋىسى ەستىلگەندەي بولادى.

كەڭەس ( سەلىك ەتىپ). نەنىڭ داۋىسى؟

كەڭەس ( اينالاسىنا قاراپ). ەشتەمە ەستىپ تۇرعام جوق.

كەڭەس. يت ۇرگەندەي بولدى.

كەڭەس. كورشى اۋىلدىڭ يتتەرى شىعار.

ءيتتىڭ ۇرگەن داۋىسى وكوپتىڭ ىشىنەن انىق ەستىلەدى.

كەڭەس (شوشىنا). كوماندير قايتىپ كەلگەن بە؟

كەڭەس. مۇمكىن ەمەس. ول مۇندا قالاي كىرەدى؟

كەڭەس. ءدال سونىڭ ءيتىنىڭ داۋىسى.

ءيتتىڭ ۇرگەن داۋىسى تاعى دا قايتالانادى.

كەڭەس (شوشىنا). ءدال سونىڭ ءوزى.

كەڭەس (شوشىنا). ءدال سونىڭ ءوزى.

كەڭەس ( كەڭەسكە سىبىرلاپ). ەندى نە ىستەيمىز؟

كەڭەس ( ول دا سىبىرلاپ). ەندى نە ىستەيمىز؟

كەڭەس. قاماۋدا قالعانىمىزدى مالىمدەيىك.

كەڭەس ( قورىققان داۋىسپەن). مەن وعان ايتا المايمىن. ول يتىنە تالاتادى.

كەڭەس. ءبىزدى نەگە قاماپ قويعانىن سۇرايىق؟

كەڭەس. ءبىز كىمبىز دەپ سۇرايىق.

كەڭەس. ءبىزدىڭ قانداي كۇنامىز بارىن دا سۇرايىق.

كەڭەس. بۇل مۇمكىن ەمەس. ولاي ايتۋ دا، سۇراۋ دا كۇنا. وسى سۇراعىمىز ءۇشىن ازاپتايدى ءبىزدى.

كەڭەس (قورقىنىشپەن). وتقا قاقتايدى.

كەڭەس. دەنەمىزدەن ءىرىڭ اققانشا ازاپتايدى.

كەڭەس. وعان ارتىق سۇراق قويۋعا بولمايدى.

ءيتتىڭ ۇرگەن داۋىسى مەن بىرگە كومانديردىڭ اياق دىبىسى ەستىلەدى.

كەڭەس. شىعىپ كەلە جاتىر.

كەڭەس ( قورقىنىشپەن). ەندى نە ىستەيمىز؟

كەڭەس. كۇزەتكە تۇرۋعا دايىندال.

كەڭەس ( تۇسىنبەي). نە قىلعان كۇزەت؟

كەڭەس. شەكارا كۇزەتىندە تۇرعانىمىزدى ۇمىتتىڭ با؟

كەڭەس. شەكارا كۇزەتىندە تۇرعانىمىزعا سەنىمدىسىڭ بە؟

كەڭەس. ەندى قايدامىز دەپ ويلايسىڭ؟

كەڭەس. شەكارا كۇزەتىندە تۇرساق نەگە قاماۋدا تۇرمىز وندا؟

كەڭەس. قاماۋدا تۇرمىز دەپ قالاي ايتامىز وعان؟

ءيتتىڭ ۇرگەن داۋىسى شىعىپ، ادامنىڭ اياق دىبىسى ۇدەي تۇسەدى. ەكى كەڭەس تە جۇگىرە جونەلەدى دە، ەكەۋى دە قاراۋىلدىڭ باسىنا شىقپاق بولىپ ۇمتىلادى. ولارىنان تۇك شىقپايدى. اقىرى ەكى ەلدى ءبولىپ تۇرعان قورعاننىڭ تۇبىنە كەلىپ ەكەۋى ەكى جەرگە كۇزەتتە تۇرعان ادامشا قاقيىپ تۇرا قالادى.

كەڭەس (سىبىرلاپ). ءبىز قايدا تۇرمىز؟

كەڭەس ( ول دا سىبىرلاپ). ءبىز قايدا تۇرمىز؟

كەڭەس. ءبىز كىمبىز؟

كەڭەس. ءبىز تۇتقىن بىز... جوق.... جوق  ءبىز شەكارا كۇزەتىندە تۇرعان اسكەرلەرمىز.

ءيتتىڭ ۇرگەن داۋىسى مەن بىرگە كومانديردىڭ شىعىپ كەلە جاتقان اياق دىبىسى ەستىلىپ تۇرادى. پەردە جابىلادى.

سوڭى.

Abai.kz