پرەزيدەنت نازارباەۆ مىنگەن «Airbus A330-243 Prestige» لاينەرى
اقش استاناسىنا قوندى بۇگىن.  رەسمي ساپار بارىسىندا پرەزيدەنت نازارباەۆ اقش-تىڭ 45-پرەزيدەنتى دونالد ترامپپەن اق ۇيدە كەزدەسەدى. سونداي-اق، اقش-تىڭ رەسمي جانە ىسكەر توپ وكىلدەرىمەن جيىن وتكىزۋ، بۇۇ قاۋىپسىزدىك كەڭەسىنىڭ وتىرىسىنا قاتىسۋ جوسپارلانعان، دەپ حابارلايدى ۆاشينتونعا ارنايى بارعان «Abai.kz» ءتىلشىسى.

وسىعان دەيىن جازعانىمىزداي، ۆاشينگتوندا ەكى ەل پرەزيدەنتى ايماقتىق قاۋىپسىزدىك، ەكونوميكالىق ماسەلەلەر مەن اقش-قازاقستان اراسىنداعى قارىم-قاتىناستى تالقىلايدى جانە بىرنەشە حالىقارالىق ماسەلەلەردى، سونىڭ ىشىندە اۋعانستانداعى جاعدايدى ءسوز ەتەدى. بۇل اقش ماسس-مەدياسىنىڭ كونتەنتىندەگى اقپارات.

ال قازاقستاننىڭ بۇقارالىق اقپارات قۇرالدارى وسى جولعى كەزدەسۋدە رەسەي مەن اقش اراسىنداعى ديالوگ جانە سيرياداعى سوعىس ماسەلەلەرى ءسوز بولاتىنىن حابارلاپ جاتىر.

ءسويتىپ قازاقستان پرەزيدەنتى ۆاشينگتوندا ءجۇر. بۇل نازارباەۆتىڭ 2018 جىلعى العاشقى رەسمي جۇمىس ساپارى. جانە ول اقش-تان باستالىپ وتىر.

ال اۋەجايدان قازاقستان پرەزيدەنتىن قازاقستاننىڭ اقش-تاعى ەلشىسى ەرجان قازىحانوۆ پەن اقش-تىڭ قازاقستانداعى ەلشىسى جورج كرول جانە اق ءۇيدىڭ وكىلدەرى كۇتىپ العان بەينە جازبا جاريا بولدى. مۇحيتتىڭ ارعى بەتىندەگى جيىننان بەلگىلى بولعانى وسى ازىرگە.

رەسەيدىڭ پوزيتسياسى

دەگەنمەن، رەسەيلىك شەنەۋنىكتەر، اسىرەسە، كرەملدىڭ توڭىرەگىندەگى توپ اقش پەن ورتالىق ازيا ەلدەرىنىڭ ديپلوماتياسىنا الاڭداۋشىلىق ءبىلدىرىپ جاتقانعا ۇقسايدى.

رەسەيدىڭ سىرتقى ىستەر ءمينيسترى سەرگەي لاۆروۆ كەشە 2017 جىلدا نە ىستەپ، نە قويعانىن تۇيىندەپ، ءباسپاسوز جيىنىن وتكىزىپتى. مىناۋ «تاسس» اگەنتتىگىنىڭ اقپاراتى: «لاۆروۆ: اقش  وا ەلدەرىنىڭ «س5+1» جوباسىن تەرىس پيعىلدا پايدالانباق».

«ءبىز ورتالىق ازياداعى كورشىلەرىمىزدىڭ كەڭ اۋقىمدى سىرتقى ساياسات ۇستانعانىنا قارسىلىعىمىز جوق. تەك، ول قارىم-قاتىناستار ءبىزدىڭ ارامىزداعى كەلىسىمدەرگە كەدەرگى كەلتىرمەسە بولعانى.  الايدا ءبىز اقش-تىڭ بۇل ارىپتەستىكتى تەرىس پيعىلدا پايدالانعىسى كەلەتىنىن، ءتىپتى بۇرىنعى پرەزيدەنتتىڭ اكىمشىلىگى كەزىندە باستالعان «ۇلكەن ورتالىق ازيا» جوباسىنداعى يدەيالاردى قايتا كوتەرمەكشى بولىپ وتىرعانىن ەستىدىك.  بۇل جوبانىڭ تۇپكى ماقساتى – ورتالىق ازيا ەلدەرىنە قاتىستى وڭتۇستىككە باعىتتالعان بارلىق جوبالاردى رەسەيدىڭ قاتىسۋىنسىز وتكىزۋ»،- دەپتى لاۆروۆ الگى جيىندا.

ەڭ باستىسى، اقش ورتالىق ازيا ەلدەرىمەن جۇرگىزەتىن كەلىسسوزدەرىندە ەكونوميكالىق ەمەس، گەوساياسي ماسەلەلەردى العا تارتاتىن بولسا، مۇنىڭ اقىرى ۇلكەن شىعىنعا اكەلىپ سوقتىراتىن ايتقان.

«ەگەر بۇل سولاي بولاتىن بولسا، امەريكالىق ارىپتەستەرىمىز وا-داعى دوستارىمىزبەن كوزدەسۋىندە ەكونوميكا ەمەس گەوساياسات تۇرعىسىندا كەلىسسوزدەر جۇرگىزەتىن بولسا، وندا ولاردىڭ بارلىعى بۇنىڭ جاقسىلىققا اپارمايتىنىن كورەتىن بولادى. ءبىزدىڭ «ۇلكەن ەۋرازيا» جوبامىز اتالمىش يدەولوگياعا كەرەعار. ونىڭ نەگىزىندە اشىقتىق پەن بىرتىندەپ بىرىگۋ يدەياسى جاتىر. وسىنىڭ ناتيجەسىندە ءبىز بۇكىل ەۋرازيا قۇرلىعىن بىرىكتىرمەكپىز» - دەگەن.

نۇرگەلدى ابدىعانيۇلى

Abai.kz