ۋكرايناداعى جانجالدى رەتتەۋ بويىنشا بەيبىت كەلىسسوزدەر مينسكىدە ءوتىپ كەلگەن. قاڭتاردىڭ 19-ىندا ماكەي كەلىسسوزدەردى جاڭا ورىنعا اۋىستىرعاننان وزگەرىس بولمايدى دەپ مالىمدەدى.

"ەگەر تابىسقا جەتەدى دەگەن نىق سەنىم بولسا وندا ۋكراينا بويىنشا كەلىسسوزدەردى ءتىپتى انتاركتيداعا اۋىستىرۋعا بولادى", - دەگەن ماكەي. ونىڭ مالىمدەۋىنشە، وزگەلەرمەن سالىستىرعاندا بەلارۋس "بىتىمگەر اتاعى ءۇشىن تىراشتانبايدى".

ماسكەۋدىڭ مالىمدەمەسىندە 2015 جىلى جاسالعان مينسك كەلىسىمدەرىنە بەيىلدىلىك ۋكرايناداعى جانجالدى رەتتەۋ جونىندەگى كەلىسسوزدەر ورنىنان ماڭىزدىراق ەكەنى ايتىلعان.

مينسك مەن ماسكەۋ بۇل مالىمدەمەلەرىن قازاقستان پرەزيدەنتى نۇرسۇلتان نازارباەۆتىڭ ۋكراينا جونىندەگى بەيبىت كەلىسسوزدەردىڭ تىعىرىققا تىرەلگەنىن ايتىپ، بۇل كەلىسسوزدى ەندى استانادا وتكىزۋدى ۇسىنعاننان كەيىن جاسادى. اقش-قا ساپارى بارىسىندا نازارباەۆ اق ۇيدە پرەزيدەنت دونالد ترامپپەن كەزدەسۋدە ۋكراينا تاقىرىبىن تالقىلاعاندارىن، ترامپ ول كەلىسسوزدەردى باسقا جەرگە اۋىستىرۋدى ۇسىنعانى تۋرالى ايتقان بولاتىن.

بۇعان دەيىن مينسكىدە ۋكرايناداعى جانجالدى رەتتەۋگە باعىتتالعان بەيبىت كەلىسسوزدەردىڭ بىرنەشە كەزەڭى وتكەن. 2014 جىلى كوكتەمدە ۋكراينانىڭ شىعىسىندا ۇكىمەت اسكەرى مەن رەسەي قولدايتىن سەپاراتيستەر اراسىندا قارۋلى جانجال باستالعالى بەرى 10 مىڭنان اسا ادام قۇربان بولعان.

Abai.kz