وڭتۇستىك كورەيانىڭ پحەنچحان قالاسىندا ءححىىى قىسقى وليمپيادا ويىندارىنىڭ الاۋى جاعىلعانىنا ءبىراز ۋاقىتتىڭ ءجۇزى بولدى. ازىرشە شىعىسقازاقستاندىق فريستايلشىمىز يۋليا گالىشەۆادان باسقا سپورتشىمىز مەدالگە قول جەتكىزگەن جوق. يۋليا قىزىمىز قولا مەدالدى قانجىعاسىنا بايلاپ، ءسونىپ بارا جاتقان ءۇمىتىمىزدى جاققانداي بولدى. ال قالعان سپورتشىلارمىز قارا ءۇزىپ، ۇزدىكتەردىڭ قاتارىنا قوسىلعان جوق.

ايتپاقشى، اق وليمپيادا باستالعان ساتتە پحەنچحان قالاسىنا سپورتشىلارىمىزبەن بىرگە بارىپ، ولارعا باس-كوز بولىپ جۇرگەن قازاقستاننىڭ ۇلتتىق وليمپيادا كوميتەتى سپورت ديرەكتسياسىنىڭ باسشىسى ەلسيار قاناعاتوۆ اعامىزدىڭ "قازاقپارات" اگەنتتىگىنە بەرگەن "قازاقستاندىق سپورتشىلار پحەنچحانعا قازى-قارتا الا كەلدى" دەگەن سۇحباتىن وقىپ، سپورتشىلارىمىز بايراقتى باسەكەگە اس ءىشىپ، اياق بوساتۋ ءۇشىن بارادى ما دەگەن ويعا قالعانىمىزدى جاسىرىپ قايتەمىز...

قازاقستاندىق سپورتشىلاردىڭ شەتەلگە شىقسا، سومكەسىن قازى-قارتاعا تولتىرىپ، ازىعىن ارقالاپ جۇرەتىنى ءبىز ءۇشىن جاڭالىق ەمەس. سوڭعى ۋاقىتتارى قىسقى، جازعى وليمپيداعا اتتانىپ بارا جاتقان سپورتشىلارىمىز "قازى-قارتا مەن جال-جايامىزدى الىپ بارا جاتىرمىز" دەپ رەتى كەلسە دە، كەلمەسە دە اڭگىمە ايتاتىن ادەت پايدا بولدى. بۇل نە؟ ەت جەپ، سورپا سوراپتاۋ ۇلتتىق ءپاتريوتيزمنىڭ ءبىر نىشانى ما؟ 

مەملەكەت سپورتشىلارىمىزدى مەشكەيلەردىڭ جارىسىنا جەبىرگەندەي ىشكەن-جەگەنىن ءسوز قىلاتىنىن ادەتتەرىن تۇسىنە الماي ءجۇرمىز. ولاردىڭ اڭگىمەسىن ەستىگەندە اۋىلداعى تۋعان-تۋىسقاننىڭ باسىن قوسىپ، سوعىم باسىن بەرەتىن سارسەمباي كوكەمىزدىڭ ارەكەتى ەسكە تۇسەتىنىن جاسىرىپ قايتەيىن. 

ولار قىستا قازىنى كەرتىپ جەپ، ۇزاق تۇندە جىلقى باعاتىن جىلقىشى ەمەس قوي. سوڭعى كەزدەرى سپورتشىلاردىڭ "جارىسقا قازى-قارتا مەن جال-جايانى الا كەتتىك. ۇلتتىق تاعامىمىز بىزگە كۇش-قۋات بەرەدى" دەپ لەپىرە سويلەگەنىنە كۇدىكپەن قارايتىن بولدىم. ولاردىڭ بوتەن جەرگە جارىسقا بارعاندا ەت اسىپ، ارقا-جارقا بولىپ وتىراتىن جاعدايى بولا ما، دەسەڭىزشى؟ الدە سپورت سالاسىنا جاۋاپتى شەندىلەرىمىز ەت اساتىن قازان-وشاعىن الدىن الا اپارىپ، سايلاپ قويا ما ەكەن؟ كىم ءبىلسىن؟ ءبىر بىلسە "قازاقستاندىق سپورتشىلار پحەنچحانعا قازى-قارتا الا كەلدى" دەپ سۇحبات بەرگەن ەلسيار اعامىز بىلەتىنى انىق. 

نۇرلان جۇماحان

Abai.kz