جەكسەنبى, 16 جەلتوقسان 2018
981 91 پىكىر 12 ناۋرىز, 2018 ساعات 09:56

ۇقك توقماديدىڭ "قاتەلىك" جايلى ايتقان ۆيدەوسىن جاريالادى

 قازاقستان ۇلتتىق قاۋىپسىزدىك كوميتەتى (ۇقك) ءوز سايتى مەن YouTube-تەگى پاراقشاسىنا تارازدا "كۇزەت استىنان قاشۋ" ارەكەتىنەن كەيىن ۇستالعان مۇراتحان توقماديدىڭ سوزىنەن ءۇزىندى كەلتىرىلگەن ۆيدەونى جاريالادى.

48 سەكۋندتىق ۆيدەودا 2004 جىلى قازاقستاندىق بانك باسشىسى ەرجان تاتىشەۆتى "تاپسىرىس بويىنشا ولتىرگەن" دەگەن ايىپ بويىنشا سوتتا ءىسى قارالىپ جاتقان 52 جاستاعى كاسىپكەر مۇراتحان توقمادي جالاڭ قابىرعالى بولمەدەگى ۇستەل باسىندا وتىرىپ سويلەگەن سوزىندە ء"وزىن جاقسى سەزىنەتىنىن، دەنساۋلىعىنا شاعىمى جوق ەكەنىن" ايتادى.

"2004 جىلى ءابليازوۆتىڭ تاپسىرىسى بويىنشا ەرجان تاتىشەۆتى ولتىرگەنىم ءۇشىن جاۋاپقا تارتىلدىم. كىنامدى مويىندايمىن، ونى سوتتا ايتقانمىن. ۇكىمدى توسىپ وتىرىپ، 8 ناۋرىزدا قاشۋعا ارەكەت جاسادىم. بىراق قۇقىق ورگاندارى قىزمەتكەرلەرى ۇستاپ الدى. تەرگەۋ اباقتىسىنا قامادى. كىنامدى مويىندايمىن جانە بۇنىم قاتەلىك بولدى دەپ سانايمىن", - دەيدى توقمادي ۇقك جاريالاعانۆيدەودا.

بۇعان دەيىن ۇقك تارازداعى وبلىستىق اۋرۋحانادان تۇتقىن توقماديدىڭ بەيسەنبى كەشكىسىن قاشىپ كەتكەنى تۋرالى الەۋمەتتىك جەلىلەردە تاراعان اقپاراتتى راستاعان. ۇقك مالىمەتىندە ءوزىن ءالسىز سەزىنەتىنى تۋرالى شاعىمدانعان توقماديدىڭ اۋرۋحاناعا اپارىلعاننان كەيىن قاشىپ كەتكەنى، بىرنەشە ساعات وتكەندە ۇستالعان سوڭ جامبىل وبلىستىق ىشكى ىستەر دەپارتامەنتىنىڭ تەرگەۋ اباقتىسىنا قامالعانى ايتىلعان.

اقپان ايىنان بەرى جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 2004 جىلى وق ءتيىپ قازا بولعان قازاقستاندىق "تۇرانالەم بانكتىڭ" باسشىسى ەرجان تاتىشەۆتىڭ ولىمىنە قاتىستى ايىپ تاعىلعان توقماديدىڭ ءىسى قارالىپ جاتىر. تەرگەۋ بولجامى بويىنشا، توقماديگە ادام ولتىرۋگە تاپسىرىستى تاتىشەۆ قازاعا ۇشىراعان سوڭ بىرنەشە ايدان كەيىن "تۇرانالەم بانك" باسشىلىعىنا كەلگەن مۇحتار ءابليازوۆ بەرگەن دەلىنەدى. 2009 جىلى بتا بانكتى (بۇرىنعى "تۇرانالەم بانك") مەملەكەت قاراماعىنا العاننان كەيىن شەتەلگە كەتىپ قالعان وپپوزيتسيالىق تۇلعا، بۇرىنعى بانكير مۇحتار ءابليازوۆ بۇل ايىپتاۋلاردى "شىلعي وتىرىك" دەپ اتاپجوققا شىعارادى جانە ءوزىن قازاقستان پرەزيدەنتى نۇرسۇلتان نازارباەۆ ساياسي سەبەپپەن قۋعىنداپ جاتىر دەپ سانايدى. ءابليازوۆ ءوزىن "بانكتەن ميللياردتاعان دوللار ۇرلاعان" دەپ سىرتتاي 20 جىلعا سوتتاعان قازاقستان بيلىگىنىڭ تاققان ايىبىن دا تەرىسكە شىعارىپ، پرەزيدەنت نازارباەۆتى ۇنەمى سىناپ كەلەدى.

2017 جىلعى كۇزگە دەيىن ەرجان تاتىشەۆتىڭ قازاسى سول كەزدە جۇرگىزىلگەن رەسمي تەرگەۋ قورىتىندىسى نەگىزىندە "اڭشىلىق كەزىندەگى جازاتايىم وقيعا" دەپ سانالىپ كەلگەن. ال بىلتىر جازدا اۋەلى تۇتقىندالىپ، كەيىن بيزنەس-ارىپتەسىنەن "اقشا بوپسالاعان" جانە "زاڭسىز قارۋ ساقتاعان" دەگەن ايىپتار بويىنشا ءۇش جىلعا سوتتالعان سوڭ تۇرمەدە وتىرعان توقماديدىڭ وسىدان 13 جىل بۇرىنعى "تاپسىرىسپەن ادام ءولتىرۋ" قىلمىسىن موينىنا العانى تۋرالى اقپارات تاراعان. رەسپۋبليكالىق تەلەارنا ەفيرىنەن بەرىلگەن فيلمدە توقمادي تاتىشەۆتىڭ قازاسى "قاساقانا جاسالعان قىلمىس ەكەنىن مويىندايتىنى" تۋرالىمالىمدەمە جاساعان. كەيىن قازاقستان بيلىگى "بايقاۋسىزدا ادام ءولتىرىپ الۋ" تۋرالى ءىس بويىنشا شىعارىلعان ۇكىمنىڭ كۇشىن جويىپ، جاڭادان تەرگەۋ باستاعان. اشىق دەرەك كوزدەرىنەن الىنعان اقپاراتقا قاراعاندا، الگى تەرگەۋ تاتىشەۆتى "تاپسىرىسپەن ولتىرگەن" دەگەن قورىتىندى جاساعان.

توقمادي تۇتقىندالعاننان كەيىن ونىڭ ايەلى قاماۋداعى جۇبايىنا "قىسىم جاساپ، ۇرىپ-سوققانى" تۋرالى مالىمدەگەن. بىراق سوڭعى كەزدەرى كوممەنتاري بەرۋدەن باس تارتىپ جۇرگەن ءجاميلا ايىمبەتوۆا-توقمادي مۇنى قاماۋداعى ەرىنىڭ وتىنىشىنە بايلانىستى دەپ تۇسىندىرەدى.

Abai.kz

91 پىكىر