جەكسەنبى, 24 ماۋسىم 2018
678 0 پىكىر 13 ناۋرىز, 2018 ساعات 08:40

تۇركىمەن تۇرمەلەرىندە حابارسىز كەتكەن تاعى ءبىر تۇتقىننىڭ قازا بولعانى ءمالىم بولدى

تۇركىمەن تۇرمەلەرىندە حابار-وشارسىز كەتكەن تاعى ءبىر تۇتقىن ايگىلى وۆادان-دەپە كولونياسىندا قازا بولعانى ءمالىم بولدى. بۇل تۋرالى "حرونيكي تۋركمەنيستانا" باسىلىمى ءوزىنىڭ دەرەككوزدەرىنە سىلتەمە جاساپ حابارلادى.

باسىلىم مالىمەتىنە قاراعاندا، تۇركىمەنستان ۇقك تەرگەۋ ءبولىمىنىڭ بۇرىنعى باسشىسى بەگمۋراد وتۋزوۆ اقپان ايىنىڭ باسىندا قايتىس بولعان. مارقۇمنىڭ دەنەسى تۋىستارىنا تاپسىرىلدى. "حرونيكي تۋركمەنيستانا" دەرەككوزىنىڭ مالىمەتىنە قاراعاندا، مارقۇمنىڭ دەنەسى بار بولعانى 45 كەلى بولعان.

وتۋزوۆ 2002 جىلى 25 جىلعا باس بوستاندىعىنان ايرىلعان.

"ولاردى تىرىدەي كورسەت!" حالىقارالىق ادام قۇقىقتارىن قورعاۋ ناۋقانىنىڭ مالىمەتىنە قاراعاندا، وتۋزوۆ ءىستى بولاردان بۇرىن لەباپ ءۋالاياتى باسشىسىنىڭ ءبىرىنشى ورىنباسارى قىزمەتىن اتقارعان. 2002 جىلى ساۋىردە ونى "تۇركىمەنستان ۇلتتىق قاۋىپسىزدىك كوميتەتىندە ىستەگەن جىلدارى جىبەرگەن كوپتەگەن ولقىلىقتارى ءۇشىن" سوتتادى، مەملەكەتتىك سىيلىقتارى مەن اسكەري شەندەرىنەن ايىردى.

تۇركىمەنستان بيلىگى 15 جىلدان استام ۋاقىتتان بەرى 2002 جىلى قاراشا وقيعاسىنان كەيىن ۇستالعان ونداعان ازاماتتىڭ تاعدىرى تۋرالى ەشقانداي حابار تاراتپاي وتىر. حالىقارالىق ۇيىمدار ولاردى زورلىق-زومبىلىق كورىپ، ءىز-ءتۇسسىز جوعالعاندار ساناتىنا جاتقىزعان.

Abai.kz

0 پىكىر