الماتى وبلىسىنداعى 7552 اسكەري ءبولىمىنىڭ ساربازى ءتۇن ىشىندە وققا ۇشقان. اتىلعان 5 وقتىڭ ۇشەۋى 21 جاستاعى ەرتۋعان ومارحانوۆتىڭ باسىنا ءتيىپ، قازىر ول كومادا جاتىر. بۇل تۋرالى كتك تەلەارناسى حابارلادى.

ەرتۋعان ومارحانوۆ اسكەر قاتارىنا ءوزى سۇرانىپ كەلگەن. شىعىس قازاقستان وبلىسىنىڭ تۋماسى زارەچنىي كەنتىندەگى بولىمگە قاراشادا قابىلدانىپتى. ال، مۇنداعى ساربازدار كەزەك-كەزەكپەن جاقىن جەردەگى تۇرمەنى كۇزەتەدى. 2 كۇن بۇرىن ول ءوز بەكەتىن تاپسىرار كەزدە وققا ۇشقان. تۇنگى ساعات 1 شاماسىندا بولعان وقىس جاعدايدىڭ ءمان-جايىن قايعىدان قان جۇتقان اتا-انا ءالى دە تۇسىنە الار ەمەس.

جىگىتتىڭ اكەسى ەرجان احمەتوۆ ۇلىنىڭ اسكەرگە ءۇش اي بۇرىن كەتكەنىن ايتادى. "ۇلىم اسكەرگە كەلىپ، 3 ايدان كەيىن مىنا جاعداي بولىپ جاتىر.  بىلمەيمىن نە بولعانىن، تۇسىنىكسىز. وق باسىنا، جاقتان كىرىپ باستان شىققان عوي", - دەيدى ول.

وقتىڭ ەرتۋعاننىڭ قولىنداعى كالاشنيكوۆ اۆتوماتىنان اتىلعانى بەلگىلى. ونىڭ ۇشەۋى ساربازعا ءدال تيگەن. سوندىقتان، دارىگەرلەر دەرەۋ وتا جاساپتى. سوعان قاراماستان، جىگىتتىڭ جاعدايى تىم اۋىر.

اسكەري بولىمدەگى كامەراعا ساربازدىڭ اۆتوماتتى وقتاپ جاتقانى ءتۇسىپتى. ال، اتىلعان تۇسى ەش جەردە جوق. سول كەزدە قاسىندا بىرنەشە قارۋلاسى بولعانىمەن، ولار دا ماردىمدى ەشتەڭە ايتپاپتى. سوندىقتان، قازىر جۇمباق جاعدايدىڭ بولجامدارى عانا ايتىلۋدا.

جاقىندارى بولسا ەرتۋعانعا اسكەردە قىسىم كورسەتىلگەن دەپ ويلايدى. ءسويتىپ، ءوز-وزىنە قول جۇمساۋعا يتەرمەلەگەن بولۋى مۇمكىن. ويتكەنى، بۇعان دەيىن اناسىنا قوڭىراۋ شالعاندا، قينالىپ جۇرگەنىن جەتكىزىپتى.

ال، اسكەري بولىمدەگىلەر وزدەرىنە شاڭ جۋىتپادى. مۇندا ساربازدارعا ء"اي" دەپ تە داۋىس كوتەرىلمەيدى دەپ وتىر. سوندىقتان، جاس جىگىت وقتى ءوز-وزىنە ابايسىزدا اتىپ العان دەپ توپشىلايدى.

Abai.kz