قىتاي حالىق رەسپۋبليكاسىنان باباقونىسىنا ورالعان بەلسەندى، وقىعان ازاماتتار «جەبەۋ» رەسپۋبليكالىق قوعامدىق بىرلەستىگىن قۇرىپ، ورالمان مارتەبەسىن يەلەنگەن باۋىرلارىمىزعا بارىنشا قول ۇشىن سوزىپ، الەۋمەتتىك ءام زاڭدىق، قۇقىقتىق ماسەلەلەر تۇرعىسىنان جاردەم جاساپ كەلە جاتقانى بەلگىلى. جۋىردا اتالعان بىرلەستىك قحر-دىڭ الماتىداعى باس كونسۋلىنا حات جازىپ، ارعى بەتتەگى ەلدىڭ باسىنداعى احۋالدى اقتارىپ سالدى. «ارعى بەت» دەپ وتىرعانىمىز – قحر-دىڭ شىڭجاڭ ۇيعىر اۆتونوميالى رايونى (شۇار). شۇار-دا قازىر جەرگىلىكتى قازاقتار عانا ەمەس، قازاقستان ازاماتتىعىن العان قانداستارىمىز دا بارىس-كەلىس بارىسىندا قىسپاققا ءتۇسىپ، ساياسي ۇيرەتۋلەرگە جىبەرىلىپ جاتىر. وسى جانە وزگە دە جايتتاردى تىزبەلەي كەلىپ  «جەبەۋ» رەسپۋبليكالىق قوعامدىق بىرلەستىگى بىلاي دەدى:

قۇرمەتتى قحر-دىڭ الماتىداعى باس كونسۋلى چجان ۆەي مىرزا!

اۋەلى، بىرلەستىگىمىز اتىنان وزدەرىڭىز ۇيىمداستىرعالى وتىرعان  ناۋرىز مەرەكەسىنە ارنالعان ساۋىق كەشكە شاقىرعاندارىڭىزعا العىس ايتامىن! بۇل شارانى ۇيىمداستىرۋ  كونسۋلدىقتىڭ ەلىمىزگە، ۇلتىمىزدىڭ ءداستۇرلى مەرەكەسىنە دەگەن ۇلكەن قۇرمەت،  شىنايى تىلەك دەپ بىلەمىز. سونىمەن بىرگە، وقۋدا ۇزدىك، وتباسىلىق جاعدايى تومەن ستۋدەنتتەرگە جاردەماقى تاعايىنداپ، ولارعا جاقىننان جاردەمشى بولعاندارىڭىزعا بارلىق قانداستارىمىزدىڭ اتىنان راحمەتىمىزدى ايتامىز.

بىرلەستىگىمىز قۇرىلعالى بەرى، قازاقستان-قىتاي ارا بۇقارالىق بارىس-كەلىستىڭ نىعايۋى، مۇعاجىرلار مۇددەسىنىڭ قورعالۋى، ەكىجاقتى بايلانىستىڭ نىعايۋىنا پايدالى جۇمىستار اتقارىپ كەلدى، ونى ءوز كەزەگىندە وزدەرىڭىز دە جوعارى باعالاپ، جىلى لەبىز بىلدىرگەنسىزدەر. ءبىزدىڭ بىرلەستىكتىڭ ماقساتىنىڭ ءوزى مۇعاجىرلارعا، وتە-موتە قانداستارعا زاڭدىق كەڭەس جانە گۋمانيتارلىق كومەك بەرۋ، جەرگىلىكتى ورتاعا ۇيلەسىپ كەتۋىنە دانەكەر بولۋ بولىپ تابىلاپدى.

باس كونسۋلدىق ورالمانداردىڭ قازىرگى جاعدايلارىنان ءبىرشاما حاباردار. 2017 جىلدىڭ باسىنان باستاپ، شۇار-داعى ءار دارەجەلى ۇكىمەت نەمەسە سالالىق مەكەمەلەر قحر كونستيتۋتسياسى مەن قاتىستى زاڭ ەرەجەلەرىنە قايشى، ءتىپتى، قىتاي ورتالىق ۇكىمەتىنىڭ ساياساتىنا كەرەعار بىرقىدىرۋ جەرگىلىكتى ساياسات، ەرەجەلەر شىعارىپ، ورالمانداردىڭ ەكى جاققا قالىپتى بارىپ-كەلۋى مەن كوشى-قونىنا وراسان قيىندىقتار تۋدىردى. اسىرەسە، ولاردىڭ قىتايداعى تىركەۋىن ءوشىرۋ ماسەلەسىندە ادەيى كەدەرگى جاساپ، قاساقانا قيناپ، اۋرە-سارساڭعا سالدى. قاتتى ايتساق ايىپ ەتپەڭىز، قازىر ەكى ەلدىڭ قالىپتى بۇقارالىق بارىس-كەلىسى مەن ساۋدا-ساتتىعى وسى شۇار-دىڭ  (شىڭجاڭ ۇيعىر اۆتونوميالى رايونى. - رەد) جەرگىلىكتى  ساياساتىنىڭ كەسىرىنەن توقىراۋعا جاقىن. قازاقستان حالقى وسىنى تۇسىنە الماي الەك: «قازاقستان مەن قىتاي باسشىلارىنىڭ سونشاما جىلداردان بەرى اقىل-پاراساتى مەن ەڭبەگىنىڭ ارقاسىندا قالىپتاسا باستاعان تاتۋ كورشىلىك، دوستىق قاتىناسى مەن ستراتەگيالىق ارىپتەستىگى ءبىر ساتتە وزگەرىپ شىعا كەلدى مە؟ ەكى ەل بايلانىسى ارىقاراي نە بولادى؟»، - بۇل سۇراق بارلىق دوستىق نيەتتەگى سانالى ادامداردى تولعاندىرىپ وتىر.

بىرلەستىگىمىز ەكى ەل قارىم-قاتىناسىن ويداعىداي ەسكەرىپ، كەزىندە كونسۋلدىقتارىعىزعا، جانە سىزدەر ارقىلى شۇار ۇكىمەتىنە اتالعان ماسەلەلەرگە جولىققان كىسىلەردىڭ ارىز-شاعىمدارىن ناقتى دالەلمەن جەتكىزگەن بولاتىنبىز. الايدا، وتكەن جىلدىڭ سوڭعى جارىمىنان بەرى قاراي ناقتى نەمەسە قاناعاتتانارلىق جاۋاپ الا الماي وتىرمىز. جاسى ۇلعايعان ناۋقاس زەينەتكەرلەردىڭ شۇار-دا قامقورشىسىز قالىپ قويۋى، اتا-اناسى كەلە الماعان بالالاردىڭ قازاقستاندا ءتىرى جەتىمنىڭ كۇيىن كەشۋى، ول از دەسەڭىز، قازاقستان ازاماتتىعىن العان كىسىلەردىڭ ەشقانداي سەبەپ-سىلتاۋسىز “ساياسي ۇيرەنۋ ورتالىقتارىنا” جىبەرىلۋى سياقتى ادام ساناسىنا كىرمەيتىن جايتتەر شاش ەتەكتەن. بيىل جىل باستالعالى بۇل اڭگىمە سايابىرسىعاننىڭ ورنىنا، ءورشىپ بارادى. قىستىق كانيكۋلعا كەتكەن وقۋشىلار مەن ستۋدەنتتەردىڭ باسىم كوپشىلىگى قايتىپ كەلە الماعاندىقتان، وقۋلارىن تاستاۋعا ءماجبۇر بولدى. ءبىزدىڭ بىرلەستىگىمىز قازاقستانداعى ورالمانداردىڭ قۇقىقتىق مۇددەسىن قورعاۋدا وزىندىك ورىنى بار، سونداي-اق، سىزدەرمەن سەلبەسىپ جۇمىس ىستەپ كەلە جاتقان ۇكىمەتتىك ەمەس ۇيىم. سوندىقتان دا، ورالمان قاۋىمى، ءتىپتى، قازاقستان قوعامى بىزگە ءۇمىت ارتىپ وتىر، سىزدەر ارقىلى اتالعان ماسەلەلەردى شەشىپ بەرەدى، نەمەسە سۇراقتارىمىزعا تولىققاندى جاۋاپ بەرەدى دەپ كۇتەدى. شاراسىزدىق ءبىزدى ىرىقسىز جاعدايعا يتەرمەلەپ وتىر. وتكەن ايدا سىزدەردىڭ باستامالارىڭىزعا سەلبەسىپ، ءبىراز ورالمان ازاماتتاردى الماتىداعى قىتايدىڭ ەسكى جاڭا جىل كەشىنە قاتىسۋعا ۇيىستىرعان ەدىك. وسىعان تۇسىنبەۋشىلىك ءبىلدىرىپ جاتقاندار بار: “سونشاما قانداستارىمىز شۇار-دا زاڭسىز قىسپاققا ءتۇسىپ، قينالىپ جاتقاندا، سول ەلدىڭ كونسۋلدىعى ۇيىمداستىرعان مەرەكەلىك شاراعا قاتىسۋ اقىلعا سىيمايدى، ءتىپتى ساتقىندىق” دەپ باعالاپ، جەبەۋ بىرلەستىگى “كونسۋلدىق ارقىلى ەشتەڭەنى شەشە الماسا، نە ءۇشىن جۇمىس ىستەيتىن ۇيىم؟” دەپ سۇراق قويۋدا. وسىلايشا ءبىزدىڭ بىرلەستىگىمىزگە قاتىستى قوعامدا تەرىس پىكىر قالىپتاسىپ وتىر. بىرلەستىك جاعىنان سىزگە جازعان حاتتار مەن ارىزدارىمىزعا جاۋاپ الا الماي وتىرمىز. وسىلاردى ەسكەرە وتىرىپ، بىرلەستىك مۇشەلەرىنىڭ ساۋىقكەشكە قاتىسا المايتىندىن بىلدىرەمىز. تۇسىنىستىكپەن قاراۋىڭىزدى سۇرايمىن.

مەرەكەلىك ساۋىقكەش ءساتتى ءوتسىن!

"جەبەۋ" رەسپۋبليكالىق قوعامدىق بىرلەستىگىنىڭ توراعاسى               ءومارالى ادىلبەك

حاتتىڭ حانزۋ تىلىندەگى نۇسقاسى:

حاتتا باياندالعانداي، ناۋرىز ايىنىڭ باسىندا قحر-دىڭ الماتىداعى باس كونسۋلدىعى تاراپىنان ساۋىق كەشكە شاقىرتۋ العان «جەبەۋ» رەسپۋبليكالىق قوعامدىق بىرلەستىگىنىڭ كەڭەس مۇشەلەرى اقىلداسا كەلە بۇل كەشكە قاتىسۋدان باس تارتىپتى. ساۋىق كەشى   جامبىل اتىنداعى فيلارمونيادا وتەتىن بولىپ بەلگىلەنگەن ەكەن. وسىدان كەيىن قحر-دىڭ السماتىداعى كونسۋلدىق ىستەر ءبولىمىنىڭ  باسشىسى دۋ چجيان حانىم بىرلەستىك توراعاسى ءومارالى ادىلبەككە تەلەفون شالىپ، باس كونسۋلدىقتىڭ بۇل ماسەلەگە ايىرىقشا نازار اۋدارىپ وتىرعانىن، بىرلەستىك كەڭەس مۇشەلەرىن 11 ناۋرىزدا باس كونسۋلدىققا كەلىپ ەمىن-ەركىن پىكىر الماسۋعا قايتادان ۇسىنىس جاسايدى. الايدا جەبەۋلىك جىگىتتەر اقىلداسا كەلە كەزدەسۋدى «جەبەۋدىڭ» كەڭسەسىندە وتكىزۋدى ءارى باس كونسۋلدىڭ كەلىپ قاتىسۋىن تالاپ ەتكەن.

ناۋرىزدىڭ 11 كۇنى ساعات 11:00- دە باس كونسۋلدىڭ ورىنباسارى مياو حونبو مىرزا، كونسۋلدىق ىستەرى ءبولىمىنىڭ باسشىسى دۋ چجيان حانىم جانە سول ءبولىمنىڭ قىزمەتكەرى حاي لا حانىم «جەبەۋ» رەسپۋبليكالىق قوعامدىق بىرلەستىگىنىڭ كەڭەسەسىنە كەلىپ، بىرلەستىكتىڭ كەڭەس مۇشەلەرىمەن قالىپتاسقان ماسەلەلەر جونىندە ەمەن-جارقىن پىكىر الماسقان كورىنەدى. كەزدەسۋدى بىرلەستىك توراعاسى ءومارالى ادىلبەك جۇرگىزدى. بۇل تۋراسىندا http://jebeu.kz سايتى جازىپ وتىر.

الدىمەن ءسوز العان ءومارالى مىرزا: «ۇسىنىسىمىزدى جەرگە تاستاماي، دەمالىس ۋاقىتتارىڭىزدى قيىپ، پىكىر الماسۋعا كەلگەندەرىڭىزگە كوپ راقمەت!» - دەپ ءسوز باستادى دا، بىلاي دەدى:

-شۇار-دا قالىپتاسقان كۇردەلى احۋال بارلىق ازاماتتاردى الاڭداتىپ وتىر. ءبىز بىلتىر جىل باسىنان باستاپ سىزدەرگە، استاناداعى ەلشىلىككە، قىتايداعى قاتىستى مەكەمەلەرگە كوپتەگەن حات جازدىق. كەي ماسەلەلەر شەشىلدى، كەي سۇراقتارعا جاۋاپ كەلدى. بۇگىن جەبەۋدىڭ كەڭەس مۇشەلەرى 95% تولىق جينالىپ وتىر. ەندى ەمىن-ەركىن پىكىر الماسىپ، قالىپتاسقان ماسەلەلەردىڭ دۇرىس شەشىلۋىنە تۇرتكى بولساق دەيمىن. وسىدان كەيىن ءسوز العان مياو حونبو مىرزا: «حاتتارىڭىزدى تاپسىرىپ الدىق، باس كونسۋل بۇل ىسكە وتە ءمان بەرىپ وتىر. نەگىزى جيىنعا ءوزى كەلمەكشى ەدى، تىعىز شارۋالارى شىعىپ، ورىنا مەن كەلدىم. بىلتىر جىل باسىنان باستاپ ءومارالى، تالعات، راحىم، قۇرمەت مىرزالارمەن 5,6 رەت كەزدەسىپ، ءبىرتالاي ماسەلەلەردى تالقىلادىق. سىزدەر جىبەرگەن حاتتاردى، ارىز شاعىمداردى ءتيىستى ورىندارعا جىبەردىك. ءبىز تەك ۇسىنىس بەرە الامىز، كۇشتىك قۇرلىمدار مەن اتقارۋشى ورگاننىڭ بيلىگىنە ارالاسا المايىمز. ال جاۋاپ حاتتىڭ كەشىگۋىنە كەلسەك، پەكيندە ەكى قۇرىلتاي اشىلىپ، ۇكىمەتتىك قۇرلىمداردا وزگەرىس بولىپ جاتىر. كونستيتۋتسياعا وزگەرىستەر ەنگىزىلدى. ال شۇار-دىڭ جاعدايىن مەنەن جاقسى بىلەسىزدەر، مەملەكەتتىك قۇرلىمداعى كادرلەردىڭ 1/3-ءى تومەنگە ءتۇسىپ كەتكەن. وسىدان كوپتەگەن جۇمىستار اقساپ جاتىر. سىزدەر قوعامدىق ۇيىم رەتىندە قانداستارىڭىزدىڭ زاڭدى قۇقىن قورعاۋ جولىندا مىندەتتەرىڭىزدى دۇرىس اتقاردىڭىزدار. ءبىز دە ديپلوماتيالىق جۇمىسىمىزدى تيىسىنشە اتقارىپ جاتىرمىز. ەندى سابىر كەرەك، ءار ءىستىڭ شەشىمى بولادى دەپ ۇمىتتەنەمىز. قر ازاماتتارىنىڭ قىتايعا بارىپ ۇستالىپ قالۋى و لادام قر ازاماتتىعىن الۋدان بۇرىن قحر ازاماتتىعىنان شىقاپاعاندىقتان ءتيىستى ەرەجەلەردى بۇزۋى مۇمكىن، سوندىقتان وسى جايتتەردى انىقتاۋ ءۇشىن ۋاقىتشا قالدىرىلىپ وتىرعان بولۋى كەرەك دەپ ويلايمىن. قحر-دىڭ ازاماتتىعى تۋرالى زاڭىنىڭ 3 باپ 9 تارماعىندا شەتەل ازاماتتىعىن قابىلداعان كىسىلەردىڭ قحر ازاماتتىعى سول ساتتەن باستاپ اۆتوماتتى تۇردە جويىلادى دەگەنمەن، وسى زاڭنىڭ 12 بابىندا  اسكەري ادامدار مەن مەملەكەتتىك قىزمەتكەرلەر ۇكىمەتتىڭ رۇقساتىنسىز شەتەلدىڭ ازاماتتىعىن الۋعا بولمايدى دەلىنگەن. ول ازاماتتار وسى تالاپتى ورىنداماعان بولسا كەرەك. قر ىقتيارحاتىنىڭ الىنۋىن زاڭسىزدىق ءارى جەرگىلىكتى اتقارۋشى ورگانداردىڭ اسىرا سىلتەۋى دەپ بىلەم». وسى جەردە راحىم ايىپۇلى: «زەينەتكە شىققان ادامدار وسى ساناتقا كىرەدى مە؟»،- دەپ سۇرادى. مياو حونبو: «بۇل جونىندە تالاس بار. بىرەۋلەر كىرەدى دەيدى، بىرەۋلەر كىرمەيدى دەيدى».

راقىم ايىپۇلى: مەن ءۇش نارسەنى اتاپ وتەيىن: ءبىرىنشى، قازاقستان پاسپورتىن العان ازامات قىتاي ەلشىلىگىنىڭ رۇقساتىمەن ۆيزا الىپ، سول ەلگە بارادى. حالىقارالىق زاڭ بويىنشا ولاردى 4 ساعاتتان ارتىق ۇستاۋعا بولمايدى. ال ولار نە ءۇشىن ساياسي ۇيرەنۋگە جىبەرىلەدى؟ قىلمىسى بولسا دالەلدەپ  قىتاي زاڭىمەن سوتتاسىن، ساياسي ۇيرەنۋگە كىرگىزۋدىڭ ەشقانداي نەگىزى جوق دەپ بىلەمىن. ەكىنشى، تىركەۋدەن شىعۋ تۋرالى ايتايىن، مەنىڭ شەشەم 85 جاستا، ول قايتىپ بارىپ تىركەۋىن وشىرەدى؟ ال ءبىزدىڭ مىنا كەڭەس مۇشەلەرى سابىرجان مۇحامەتحان، جەڭىس امىربەكتەر كەزىندە جاتاقحاناعا تىركەلگەن. ال بۇگىن ول جاتاقحانالار جوق. ولار تىركەۋدەن قايتىپ شىعادى؟ ىقتيارحات جونىندەگى پىكىرىڭىزگە ريزا بولدىم. جالپى شۇار-دا كوشى-قون زاڭى تولىق كەمەلدەنبەگەن. وسىنى ءبىر جۇيەگە ءتۇسىرىپ، حالىقتى قيىندىقتان قۇتقارۋلارىڭىزدى ءۇمىت ەتەمىن.

مياو حونبو: قىتاي قوس ازاماتتىقتى قولدامايدى. ارينە، قۇقىق قورعاۋ ورگاندارى مەن سوت جۇيەسىنىڭ ءوز بەلگىلەمەلەرى مەن ءباتۋالارى بولۋى كەرەك. سىزدەر وسى ىسكە ۇشىراعان  تۇلعالاردىڭ جەكە پىكىرىن قايتالاپ وتىرسىزدار. بۇل ءىستى جان-جاقتى زەرتتەۋ كەرەك. تىركەۋدەن شىعۋدى قىتاي ۇكىمەتى بۇرىن قۋزاماسا، قازىر قۋزاپ جاتىر. بايقاعان شىعارسىزدار، قحر-دا قازىر كوپتەگەن وزگەرىس بولىپ جاتىر. كەشەگى ولشەمدەر بۇگىنگە جارامايدى. بۇرىن مەملەكەتتىك قوناقاسىلاردا اراق استاتوك قۇيىلاتىن، كورۋپتسياعا قارسى كۇرەس باستالعاننان كەيىن مۇلدە قۇيىلمايتىن بولدى. وسىعان ءاۋ باستا ادامدار سەنبەگەن. قازىر ءبارى ۇيرەنىپ كەتتى. پارتيالىق ءتارتىپ تە كۇشەيدى.

ءومارالى ادىلبەكۇلى: بىلتىر جازدا «ساياسي ۇيرەنۋ دەگەن نە؟» دەپ وزىڭىزدەن سۇراعانمىن، كەيىن پەكينگە جينعا بارعاندا قحر مۇحاجىرلار مينيسترلىگىنىڭ دەپارتامەنت باستىعى شىن مىرزاعا وسى سۇراقتى قويدىم. ارينە، سىزدەر اتقارۋشى ورگان نە قۇقىق قورعاۋ ورگاندارى ەمەسسىزدەر. بىراق، قالىپتاسقان جاعدايعا بايلانىستى حالىقتىڭ ارىز ارمانىن جەتكىزەدى دەپ ويلايمىن. قوس ازاماتتىق ماسەلەسىنە كەلسەك، قازاقستان دا سوتسيaليستىك لاگەردەن شىققاندىقتان تىركەۋگە قاتتى ءمان بەرەدى. جەكە تۇلعا ازاماتتىق العاندا بۇرىنعى ەلدىڭ پاسپورتى مەن جەكە كۋالىگىن تاپسىرماي جاڭا قۇجات الا-المايدى. ەۆروپا، كانادا، سينگاپۋر، اۆستراليا ازاماتتىعىن العان قىتاي ازاماتتارى ەكى پاسپورتتى قاتار قولداناتىن جاعداي ىشكى ولكەدە كوپتەن كەزدەسەدى. ءبىزدىڭ قانداستارىمىزدى تولعاندىراتىن جايت –  تەك تىركەۋدەن شىعۋ ماسەلەسى. ولاردىڭ جاعدايىن قوس ازاماتتىق دەپ تانۋعا كەلمەيدى. قاتىستى ورىندارمەن پىكىر الماسىپ، وسى ماسەلەلەردىڭ جەڭىل جولىن قاراستىرساڭىزدار دەپ وتىنەمىن. شۇار-داعى جەرگىلىكتى كادرلاردىڭ زاڭ جونىندە تانىمى، ساياسي مادەنيەت ورەسى، تومەن بولعاندىقتان كوپتەگەن كەلەڭسىزدىكتەرگە جول بەرىپ وتىر.

وسى پىكىر الماسۋلاردان كەيىن تالعات مامىرۇلى ورالمان ستۋدەنتتەر مەن وقۋشىلاردىڭ قىستىق كانيكۋلعا بارىپ، قايتا الماي وتىرعانىن قىتايعا بارىپ، قايتىپ كەلە الماي وقۋىنان قالعان ءۇش ستۋدەنتتىڭ باسىنداعى احۋالدى مىسالعا الا وتىرىپ جەتكىزدى. قۇرمەت قابىلعازىۇلى تىركەۋدەن شىعۋ مەن زەينەتكەر ماسەلەسىندە كەرەعارلىقتىڭ بولعانىن، زەينەتكەرلەرگە نە تىركەۋدەن شىعىپ زەينەتاقىڭدى المايسىڭ، نە زەينەتاقىڭدى الساڭ تىركەۋدەن شىقپايسىڭ دەپ جەرگىلىكتى بيلىك تاراپىنان زاڭسىز تالاپ قويلىپ جاتقانىن ايتتى. سەرىك سادۋاقاس 2017 جىلدان باستاپ ەكى ەلدىڭ اراسىنداعى بارىس-كەلىستىڭ توقىراۋعا ۇشىراعانىن، قانداستارىمىزدىڭ قۇجاتتارىن جيناپ العاننان كەيىن ەلگە كەلۋ ماسەلەسى قيىنداسا، مۇنداعى قازاقتاردىڭ قىتايعا بارۋعا، ۆيزا الۋعا كەدەرگىگە ۇشىراعانىن، ۆيزاسى بولعانىمەن وندا بارۋعا قر ازاماتتارىنىڭ ءوزىن ساياسي ۇيرەنۋگە اكەتۋ ىستەرى بولعاندىقتان بارۋعا جۇرەكىسىنەتىندىگىن، وسىنىڭ سالدارىنان ەكى ەل اراسىنداعى ساۋدا-ساتتىق، تۋريزم جاقتارىنىڭ دا توقىراۋعا ۇشىراپ كەلە جاتقانىن ايتىپ ءوتتى. ءادىل وسىنداعى قانداستارىمىزدى شاقىرۋ ءۇشىن ول جاقتاعى باۋىر تۋىستارىنا ءتۇرلى قىسىمدار جاسالىپ جاتقانىن ناقتى فاكتىلەرمەن تىلگە تيەك ەتتى.

جيىن بارىسىندا كەزەكتى رەت ءسوز العان مياو حونبو مىرزا بۇل كەزدەسۋدىڭ وتە ماعىنالى بولعاندىعىن، وسىنداعى بارلىق پىكىرلەردى ەسكەرىپ ءتيىستى جەرلەرگە جەتكىزەتىنىن، بۇدان كەيىن دە ءجيى كەزدەسىپ، پىكىر الماسۋ كەرەكتىگىن اتاپ ءوتتى. ءارى ەكى ەل قارىم-قاتىناسىنىڭ جوعارى دەڭگەيدە دامىپ كەلە جاتقانىن، ۇلكەن باعىتتىڭ دۇرىس ەكەنىن، بارلىق ورالماندار ارىز ارمانى، قيىنشىلىعى بولسا، الماتىداعى كونسۋلىق پەن استاناداعى ەلشىلىككە كەلۋىن، ولارعا ەسىك اشىق ەكەنىن ايتتى. بوگدە كۇشتەردىڭ ارالاسۋى، ەكى ەلگە دە ءتيىمسىز، ءبارىن زاڭمەن، اقىلمەن شەشەيىك دەپ قورتىندىلادى. سوڭىندا دۋ زجيان حانىم قازاقستانداعى كاسىپكەرلەرگە قىتايداعى ارىپتەستەرى ارناۋلى شاقىرۋ جىبەرسە، ءبىر جىلعا كوپ مارتە ۆيزا الۋعا بولاتىندىعىن ەسكەرتتى.

كەزدەسۋ ەكى ساعاتقا سوزىلعان.

 تاقىرىپقا وراي:

«جەبەۋ» بىرلەستىگى قحر-دىڭ ەلشىسىمەن كەزدەستى

2018 جىلى 20 ناۋرىز كۇنى  «جەبەۋ» رەسپۋبليكالىق قوعامدىق بىرلەستىگىنىڭ توراعاسى ءومارالى ادىلبەكۇلى، دۇنيەجۇزى قازاقتارى قاۋىمداستىعىنىڭ باس حاتشىسى، «جەبەۋدىڭ» كەڭەس مۇشەسى راحىم Aيىپۇلى، كەڭەس مۇشەلەرى جەڭىس امىربەكۇلى، ساۋلەن توققازىۇلى استانا قالاسىندا قحر-دىڭ قازاقستانداعى توتەنشە جانە وكىلەتتى ەلشىسى چجاڭ حانحۋەي مىرزانىڭ  قابىلداۋىندا بولدى. كەزدەسۋگە ەلشىلىك كونسۋلدىق باسقارماسىنىڭ باستىعى Gu Ming مىرزا، ەلشىلىك قىزمەتكەرلەرى Liu Jiangping حانىم مەن Zhou Jianjun مىرزا قاتىستى. ەلشى مىرزا جينعا قاتىسۋشىلاردى ناۋرىز مەرەكەسىمەن قۇتتىقتاي كەلە، ەكى ەل اراسىنداعى ەكونوميكالىق-مادەني قارىم-قاتىناستاردىڭ ماڭىزى مەن دامۋىنا توقتالىپ ءوتتى. سونىمەن بىرگە، شۇار-دا قالىپتاسقان جاعداي جونىندە اشىق-جارقىن بۇكپەسىز پىكىر الماسۋ بولدى. باس ەلشى الدا، ءساۋىر ايىندا، شۇار-عا ەلشىلىكتىڭ قىزمەت توبى باراتىندىعىن ايتتى. شۇار-داعى قالىپتاسقان جاعداي بويىنشا ءبولىنىپ-جارىلعان وتباسىلاردىڭ ارىز-ارمان، ءمۇڭ-زارى بولسا، استاناداعى ەلشىلىك پەن الماتىداعى باس كونسۋلدىققا جولداۋىن ەسكەرتتى.

Abai.kz