جۇما, 22 قاڭتار 2021
قوعام 3077 1 پىكىر 10 ءساۋىر, 2018 ساعات 09:28

قازاقستان ليۆانعا بىتىمگەرلىك كۇشى رەتىندە 120 سارباز جىبەرۋى مۇمكىن

قازاقستان ليۆانعا بىتىمگەرلىك ميسسياسى قۇرامىندا اسكەري قىزمەتكەرلەرىن جىبەرمەك دەپ حابارلادى قورعانىس ءمينيسترىنىڭ ورىنباسارى تالعات مۇحتاروۆ.

ماجىلىستەگى ۇكىمەت ساعاتىندا سويلەگەن مۇحتاروۆ قازاقستان بىتىمگەرلىك ميسسياسى قۇرامىندا اسكەري ءبولىمدى جىبەرۋگە دايىندىق جاساعانىن ايتتى.

ء"بىز بارلىق قاجەتتى پروتسەدۋرادان وتتىك. ەندى بۇۇ تالاپ ەتەتىن ستاندارتتى پروتسەدۋرالار قالدى. بيىل قىركۇيەك، قازان ايلارىنا قاراي شامامەن 120 ادام، ءبىر روتانى ميسسيالاردىڭ بىرىنە جىبەرەمىز. بولجام بويىنشا ولار ليۆانداعى ميسسياعا بارادى" دەدى مۇحتاروۆ.

قازاقستاندا 2015 جىلى قابىلدانعان "بىتىمگەرشىلىك قىزمەتى تۋرالى" زاڭعا سايكەس، پرەزيدەنتتىڭ اسكەري قىزمەتكەرلەردى الدەبىر وپەراتسيالارعا قاتىستىرۋ تۋرالى ۇسىنىسىن پارلامەنت پالاتالاردىڭ بىرلەسكەن جيىنى تالقىسىنا سالادى. پرەزيدەنتكە قارۋلى كۇشتەردى پايدالانۋ تۋرالى ۇسىنىستى ۇكىمەت تۇسىرەدى. ميسسياعا قاتىسۋشىلار قۇرامىن، سانىن جانە مەرزىمىن دە ۇكىمەت انىقتايدى. پرەزيدەنت ۇلتتىق كونتينگەنتتىڭ بىتىمگەرشىلىك وپەراتسياسىنا قاتىسۋىن اياقتاۋ، مەرزىمىنەن ەرتە شاقىرىپ الۋ جانە شۇعىل ەۆاكۋاتسيالاۋ تۋرالى شەشىم قابىلداي الادى. قازاقستاندىق بىتىمگەرلەردىڭ الدەبىر وپەراتسياعا قاتىسۋ ماسەلەسى حالىقارالىق ۇيىمنىڭ شەشىمى نەمەسە استانا راتيفيكاتسيالاعان حالىقارالىق كەلىسىم-شارت نەگىزىندە قارالادى.

Abai.kz

1 پىكىر