«جاۋ جوق دەمە جار استىندا». رەسەيمەن قازاقستان اراسىندا سوعىس بولماس، سەبەبى: سوڭعى ون جىلدا رەسەيدە ەكونوميكالىق ستاگناتسيا كۇشەيىپ كەلەدى، ال سوڭعى ءتورت جىلدا حالىقتىڭ تۇرمىس جاعدايى تومەندەپ كەتتى. رەسەي ەكى سوعىستى باسىنان وتكەرۋدە – سيريا مەن ۋكراينا. بىراق كەزىندە اسكەري قۋاتى سارقىلا باستاعان گيتلەرلىك گەرمانيا ءوزىنىڭ وداقتاسىنا – يتالياعا شابۋىل جاساعان. مۇمكىن رەسەي ءوزىنىڭ ءجايسىز جاعدايىن كەلەسى سوعىسپەن موبيليزاتسيالاۋعا ۇمتىلۋى مۇمكىن. قالاي بولعاندا دا، ءبىز ءوزىمىزدىڭ ۇلتتىق قاۋىپسىزدىگىمىزدىڭ جاعدايىن جان جاقتى ويلاستىرۋىمىز كەرەك. وسى رەتتە ايتارىم: حالىقتىڭ ەرىك جىگەرى، قۋاتتى اسكەر عانا ءبىزدىڭ وداقتاسىمىز بولا الادى. پۋتين ستراتەگ ەمەس، ول تاكتيك، ول قىسقا مەرزىمدى جەتىستىكتى قالايتىن قايراتكەر.

ۋكرايناعا رەسەيدىڭ جاساعان وككۋپاتسياسى جانە ونىڭ قاۋىپى بىزگە تونەگەن جاعدايدا قانداي ءىس-قيمىلدار بولۋى مۇمكىن. ەندى وسىعان بولجام ەتىپ كورەيىك.

1). ءبىزدىڭ بيلىكتى ىدىراتۋ ماقساتى ماڭىزدى دەپ ەسەپتەلەدى. ەلباسىن بۇرىس شەشىمدەرگە يتەرمەلەۋ ارقىلى اقپاراتتىق ارەكەتتەر ويلاستىرىلادى. ءسويتىپ، ءبىزدىڭ بيلىكتىڭ ىشىندەگى قازاق رەسەيشىلدەرىنىڭ ساتقىندىق ءارى وپاسىزدىق ارەكەتتەرى ءورشيدى;

2). قازاقستان بيلىگىنىڭ رەسەيشىل پەرسونالارى قازاقستاننىڭ اسكەري قوسىندارىنا رەسەيدىڭ اسكەري قوسىندارىنا اسكەري قارسىلىق كورسەتپەۋ تۋرالى تۇراقتى تۇردە بۇيرىق بەرىپ وتىرادى. ەستەرىڭىزدە بولسا، 2014 جىلى شەكارادا ۋكراين اسكەرى ورىس اسكەرىنە توسقاۋىل بولا العان جوق;

3).  رەسەي ماسس-مەدياسى اقپاراتتىق سوعىس جۇرگىزەدى: جالعان اقپاراتتار تاراتىپ، قازاق بيلىگىن حالىق الدىندا ديسكرەديتاتسيالاۋعا قاتتى كىرىسەدى;

4). قازاقستانداعى ورىس جۇرتشىلىعى «جانشىلىپ جاتىر، ولارعا قاتتى قىسىم جاسالىپ، تىلدىك «كەمسىتۋلەرگە» ۇشىراۋدا» دەپ كەلەتىن  تەلەسيۋجەتتەر رەسەي تەلەارنالارىندا قاپتايدى دا، بىزگە ترانسلياتسيالانادى;

5). نيەتى بوتەن ءباسپاسوز «رەسەي اسكەرىمەن قانتوگىسكە بارماڭدار، قارسىلىق كورسەتپەڭدەر» دەپ قايتالاي بەرەتىن بولادى;

6). رەسەيشىل كەمپىرلەر مەن ايەلدەردىڭ ارەكەتتەرى ۇيىمداستىلادى. ولار قازاقستان گارنيزوندارىن قورشاپ الىپ، قازاق اسكەرىنەن باۋىرلاس حالىق – ورىس اسكەرىمەن «قانتوگىسكە بارماۋدى تالاپ ەتەدى»، يستەريكالىق شابۋىل جاسايدى;

7). باتىس ەلدەرى ديپلوماتتارى مەن باسشىلارى رەسەيمەن قانتوگىسكە بارماي ىمىرالاسۋدى سۇرايدى;

8). ءبىزدىڭ اسكەري گارنيزوندار قالالاردا اسكەري گەريليا تاكتيكاسىن پايدالانۋى كەرەك. بۇل ءادىس شەشەنستاندا جانە سيريادا ورىن الدى. ياعني قالالارعا كىرگەن جاۋ اسكەرىنىڭ تەحيكاسىن ارنايى دايىندالعان توپتار ورتەپ جىبەرىپ وتىرادى.

....................................

بۇنى ءبىز قاۋىپ ەتكەننەن ايتىپ وتىرمىز. زادىندا، قازاق – بەيبىتشىل، ىمىراشىل حالىق.قازاق جەرى كەڭ بايتاق، شەكاراسى مىزعىماس. قازاق ءوز جەرىن قاحارمان ەرلىگىمەن قورعاعان. ال كەزدەيسوق اگرەسسياعا قازاقستان ۇشىراسا، قاۋىپ تونگەن كەزدەن باستاپ كومپلەكستىك شۇعىل شارالار تالاپ ەتەلەدى: اسكەري جاعداي ءجاريالاۋ. اسكەري جاعدايدىڭ ستاندارتتىق تالاپتارى بار. ول جەكە اڭگىمە. ازىرشە نۇرەكەڭنىڭ قازاقتى سولتۇستىك ولكەلەرگە كوشىرۋ، قالالاردا اسكەري گارنيزونداردى ورنالاستىرۋ، پاتەرلەردى كونتراكتا وتىرعان گارنيزون سەرجانتتارى مەن پراپورششيكتەرگە، وفيتسەرلەرگە بەرۋ شارالارى ماڭىزدى. تاعى ءبىر ماڭىزدى شارا – ناتو-نىڭ وزىق قارۋلارىن ساتىپ الۋ، ولاردىڭ ءبىر بولىگىن وزىمىزدە ءوندىرۋ جانە اسكەري تەحنيكانى وزىمىزدە قۇراستىرۋ تەحنولوگياسىن يگەرۋ. رەسەيمەن سوعىس بولا قالسا، ول ۇزاق مەرزىمگە سوزىلمايدى، مولشەرى: 1.5-2 جىل، بىراق، ىمىرالاسۋ كەزەڭى ۇزاققا سوزىلىپ كەتۋى مۇمكىن: 2.5-3.5 جىل. قۇداي قازاق ەلىن سوعىستاردان ساقتاسىن!..

ءازىمباي عالي

Abai.kz