ونىڭ ايتۋىنشا، بىشكەك جەس-ءىن جەتىلدىرۋگە بولىنگەن قاراجاتتىڭ جۇمسالۋىن زەرتتەگەن دەپۋتاتتىق كوميسسيانىڭ قورىتىندىسىندا بىرقاتار مەملەكەتتىك قىزمەتكەرلەردىڭ، دەپۋتاتتاردىڭ ەسىمدەرى كەلتىرىلگەن.

"ەكس-پرەزيدەنت المازبەك اتامباەۆتى قىلمىستىق قۋدالاۋدان بوساتاتىن قۇقىعىنان ايىرۋدى ۇسىنامىن. ول زاڭ الدىندا بارلىعى تەڭ ەكەنىن، قاجەت بولسا جاۋاپكەرشىلىكتى موينىنا الۋعا دايىن ەكەنىن تالاي رەت ايتتى. سوندىقتان وسىنداي ۇسىنىس بىلدىرەمىن. ءبىز بۇل ماسەلەنى قۇقىققورعاۋ ورگاندارىنىڭ ءوزى شەشۋىنە مۇمكىندىك بەرۋىمىز كەرەك. ەگەر تازا بولسا، تازا دەپ ايتۋىمىز كەرەك. تازا بولماسا، جاۋاپقا تارتۋىمىز كەرەك. ەگەر نەگىزگى كىنالىنى تاپساق، بۇرىنعى پرەمەرلەر ۇندەمەي قالعانىن وزدەرى ايتادى. 6 جىلدا جەتى پرەمەر بولسا، قايسىسىنان سۇرايمىز؟" - دەدى ماساليەۆ پارلامەنت وتىرىسىندا.

بۇل ساۋالعا بۇرىنعى پرەمەر-مينيستر ساپار يساكوۆ جاۋاپ بەرىپ، اتامباەۆ بىشكەك جەس-ءىن جەتىلدىرۋ اياسىندا ەشقانداي تاپسىرما بەرمەگەنىن مالىمدەدى.

پارلامەنت 10 مامىر كۇنى بىشكەك جەس-ىندەگى اپات سەبەبىن جانە ونى مودەرنيزاتسيالاۋعا بولىنگەن قارجىنىڭ ورىندى جۇمسالعانىن تەكسەرەتىن دەپۋتاتتىق كوميسسيا قورىتىندىسىن قارادى. وتىرىسقا بۇرىنعى پرەمەرلەر جانتورو ساتىبالديەۆ، تەمىر ساريەۆ پەن ساپار يساكوۆ قاتىستى.

2013 جىلى قىرعىزستان قىتايدىڭ ەكسيمبانكىنەن بىشكەك جەس-ءىن مودەرنيزاتسيالاۋعا 386 ميلليون دوللار نەسيە العان. جەتىلدىرۋ جۇمىستارى 2017 جىلى اياقتالعان. 2018 جىلدىڭ 26 قاڭتارىندا جەس-تە اپات بولىپ، قالانىڭ كوپ بولىگى جىلۋسىز قالعان.

Abai.kz اقپاراتتىق پورتالىندا جاريالانعان ماقالاعا پىكىر ايتىپ، ويىڭىزدى بىلدىرگىڭىز كەلسە، مىنا پاراقشاعا جازىپ قالدىرىڭىز!

Abai.kz