«ءاي، سەن ادام بولماسسىڭ!»
ءبىر اكە بالاسىنىڭ جايسىز قىلىقتارىن كورگەن سايىن كەيىپ «ءاي، سەن ادام بولماسسىڭ!» – دەپ ۇرسا بەرەتىن كورىنەدى. اكەسىنىڭ قايتالاپ ايتا بەرەتىن الگى سوزىنە ىشتەي ەرەگەسكەن بالاسى بار ىنتاسىن وقۋعا سالىپ، وسكەندە ۇلكەن ءبىر اۋدانعا اكىم بولۋعا جاراپتى.
اكەمنىڭ اۋزىنا ەندى قۇم قۇيىلار دەپ ويلاعان بالاسى كرەسلودا شالقايىپ-شالقىپ وتىرعان كۇيى قىزمەتكەرلەرىنە اۋىلداعى اكەسىن الدىنا الىپ كەلۋدى بۇيىرىپتى. اكىمنىڭ ءبىر ءسوزىن ەكى ەتپەستەن جىبەرگەن قىزمەتكەرلەرى جايباراقات بەس قويىن جايىپ جۇرگەن شالدى ءاي-شايعا قاراتپاي دەدەكتەتىپ قالاعا الا جونەلىپتى. «اكىمگە اپارامىز!»، - دەپ قورقىتقانعا ەسى شىققان قارت كرەسلودا ءشانتيىپ وتىرعان ءوز بالاسىن كورگەندە عانا جۇرەگى ورنىنا ءتۇسىپتى.
اياعىن ءبىر-بىرىنە ايقاستىرىپ، الاقاندارىن قوزى قارنىنىڭ ۇستىنە سالىپ ىرس-ىرس ەتىپ دەم الا الماي وتىرعان بالاسى اكەسىنە قاراپ ميىعىنان كۇلە:
– اكە، باياعىدا ماعان «ادام بولمايسىڭ» دەپ ۇرسا بەرەتىن ەدىڭ، ەندى ول ويىڭنان ەرىكسىز قايتقان بولارسىڭ. ادام بولمايدى دەگەن ۇلىڭ اناۋ-مىناۋ ەمەس، ۇلكەن اكىم بولدىم ەمەس پە؟! – دەپتى.
سوندا اكەسى بالاسىنىڭ مىنا قىلىعىنا تاعى دا كۇيىنىپ:
– ءاي، بالام، مەن ساعان «اكىم بولمايسىڭ» دەپ ەمەس، «ادام بولمايسىڭ» دەپ ۇرساتىنمىن. سەن اكىم بولساڭ دا، ءالى ادام بولا الماپسىڭ. ەگەر ادام بولساڭ اكەڭدى دەدەكتەتىپ الدىڭا كەلتىرمەي، ءوزىڭ ىزدەپ كەلىپ امانداسار ەدىڭ. سىيلايتىن ەدىڭ. ادام بولۋ ءبىر باسقا، اكىم بولۋ ءبىر باسقا. مەن ساعان سوندىقتان «ادام بولمايسىڭ» دەپ ۇرساتىنمىن. اكىم بولۋدى ادام بولدىم دەپ ۇقساڭ، سەن ءالى شيكىسىڭ، بالام، – دەپ بۇرىلىپ شىعىپ كەتكەن ەكەن.
گۇلشان نۇربەكوۆانىڭ Facebook-تەگى پاراقشاسىنان
Abai.kz
