سەنبى, 3 جەلتوقسان 2022
الاڭ 13350 41 پىكىر 25 ماۋسىم, 2018 ساعات 22:49

وبلىستىق اۋرۋحانادا جاتقان سايراگۇلدىڭ ميى شايقالعان

قىتايدان قاشىپ كەلگەن سايراگۇل ساۋىتبايدىڭ دەنساۋلىعىنا قاتىستى اقپاراتتار انىقتالدى. 25-ماۋسىم 2018 جىل. ياعني، بۇگىن كەشكى ساعات 21:13-تە «Abai.kz» اقپاراتتىق پورتالىندا  «قىتايدان قاشىپ كەلگەن سايراگۇل اۋرۋحاناعا ءتۇستى» اتتى ماقالا جاريا بولدى. وندا سايراگۇلدىڭ اۋرۋحاناعا تۇسكەندىگى جايلى بەيرەسمي اقپاراتتىڭ الەۋمەتتىك جەلىدە تارالعاندىعى ايتىلدى.

ءبىز بۇل اقپاراتتىڭ راس وتىرىگىن انىقتاۋ ءۇشىن تالدىقورعان قالاسىنداعى بىرنەشە اۋرۋحاناعا حابارلاستىق.

اۋەلى الماتى وبلىستىق اۋرۋحاناسىنا حابارلاسقان ەك. ءوزىن مەدبيكەمىن دەپ تانىستىرعان تۇراقوۆا الميرا نۇرسۇلتانقىزى (اتالعان اۋرۋحانانىڭ قىزمەتكەرى) سوڭعى 1 اپتانىڭ ىشىندە  (19-25 ماۋسىم ارالىعىندا) سايراگۇل ساۋىتباي ەسىمدى ازاماتشانىڭ تۇسپەگەنىن ايتىپ انت-سۋ ءىشتى. «اۋرۋحانانىڭ كومپتەرلىك بازاسىندا سايراگۇل ساۋىتباي ەسىمدى ادام تىركەلمەگەن»،- دەگەن ەدى.

سودان №2-تالدىقورعان قالالىق اۋرۋحاناسىنا حابارلاستىق. سايراگۇل وندا دا جوق بولىپ شىقان. كەيىن سايراگۇلدى ىزدەپ، تالدىقورعان قالالىق كوپسالالى اۋرۋحاناسىنا حابارلاستىق. توقتاسىن ەراسىل ەسىمدى ازامات تەلەفون تۇتقاسىن كوتەردى. ءوزى كەزەكشى دارىگەر (مەدبرات) ەكەن. سايراگۇل ساۋىتباي ەسىمدى ازاماتشانىڭ اۋرۋحانادا جاتقان ادامدار تىزىمىندە جوقتىعىن ايتتى.

ارتىنشا تالدىقورعانداعى ۋاقىتشا تەرگەۋ يزولياتورىنا قوڭىراۋ شالدىق. سايراگۇلدىڭ قايدا ەكەندىگىن سۇرادىق. ەسىم-سويى ماقسات ەڭسەباەۆ دەگەن ۋتي  قىزمەتكەرى، قابىلداۋ ءبولىمىنىڭ مامانى بىزگە سايراگۇلدىڭ تەرگەۋ يزولياتورىندا جاتقانىن ايتتى.

دەگەنمەن جوعارىداعى ماقالادا قۇزىرلى ورگان تاراپىنان سايراگۇل ساۋىتبايدىڭ دەنساۋلىعىنا قاتىستى كەيبىر مالىمەتتەر جاسىرىن ۇستالۋى مۇمكىن ەكەنىن دە جازدىق. جازعانىمىز سول-اق ەكەن، سايراگۇلدىڭ قايدا ەكەنى انىقتىلدى.

«اتاجۇرت جاستارى» ەرىكتىلەر بىرلەستىگىنىڭ جەتەكشىسى سەرىكجان ءبىلاشۇلىنا تالدىقورعانداعى بەلسەندى ازاماتتار حابارلاسىپ، سايراگۇلدىڭ وبلىستىق اۋرۋحانادا جاتقانىن ايتتى. بەلسەندىلەر سايراگۇلدىڭ سوڭىنان اتالعان اۋرۋحاناعا ىزدەپ بارعان. انىقتالعان اقپارات مىنە:

سايراگۇل ساۋىتباي وبلىستىق اۋرۋحانادا جاتىر. نەيروحيرۋرگيا ءبولىمى. 3-قابات، 12-بولمەدە. ەسىگىندە قارۋ اسىنعان ەكى ساقشىسى تاعى بار. ەشكىمدى كىرگىزبەيتىن كورىنەدى. ىزدەپ بارعان ازاماتتار جولىعا الماعان. ال اۋرۋحاناداعى كەزەكشى دارىگەرلەر «سايراگۇلگە قاتىستى اقپاراتتى ۋتي  دارىگەرىنەن الا الاسىزدار»، دەپ جاۋاپ بەرگەن ەكەن.

ءبىز العاشقىدا «سايراگۇل ەسىمدى ەشكىم جوق» دەگەن اۋرۋحانا مەدبيكەسى الميرامەن سويلەسپەككە، وبلىستىق اۋرۋحانانىڭ قابىلداۋ بولىمىنە قايتا قوڭىراۋ شالدىق. بۇل جولى تەلەفون تۇتقاسىن ساۋلە احاتقىزى ەسىمدى سانيتار كوتەردى. «مەن ەشقانداي اقپارات بەرە المايمىن. الميرا نۇرسۇلتانقىزى ۇيىنە قايتىپ كەتكەن. ەرتەڭ كەلەدى. قازىر بىزدە كەزەكشى دارىگەر بار. سالتانات جاناتقىزى. سول كىسىنى شاقىرىپ كەلەيىن. جارتى ساعاتتان سوڭ حابارلاسىڭىز»، دەپ جاۋاپ قايتاردى.

ءبىز ارادا جارتى ساعات وتكەندە وبلىستىق اۋرۋحاناعا قايتا حابارلاستىق. تەلەفون تۇتقاسىن ابدىقاسىموۆا كۇلاش نۇرداۋلەتقىزى كوتەردى. وبلىستىق اۋرۋحانانىڭ قابىلداۋ بولىمىندەگى كەزەكشى مەدبيكە ەكەن. سايراگۇل ساۋىتبايدىڭ اۋرۋحانادا جاتقانىن راستاپ بەردى.

«ول بىزدە جاتىر. 23-ماۋسىم كۇنى كەلىپ تۇسكەن. قازىر نەيروحيرۋرگيا بولىمىندە جاتىر. ول تۋرالى ناقتى اقپاراتتى ەرتەڭ انىقتاپ بىلە الاسىزدار. نەيروحيرۋرگيا ءبولىمىنىڭ باس دارىگەرى، ءبولىم باسشىلار ەرتەڭ كەلەدى. مەن سىزگە باسقا اقپارات بەرە المايمىن»، دەپ قىسقا قايىردى.

كۇلاش نۇرداۋلەتقىزى ءسوز اراسىندا سايراگۇلدىڭ ميى شايقالعانىن ايتىپ قالدى. «جو-جوق، وعان وپەراتسيا جاسالعان جوق. ول بىزدە سوترياسەنيەمەن جاتىر عوي. ايتتىم عوي. ول تۋرالى ەرتەڭ حابارلاسىپ ءبىلىڭىز»، - دەدى.

ايتا كەتەيىك، وسىعان دەيىن، «قۇزىرلى ورگان وكىلدەرى سايراگۇلدىڭ دەنساۋلىعىنا قاتىستى كەيبىر اقپاراتتى جاسىرىن ۇستاۋى دا مۇمكىن دەگەن كۇدىگىمىز دە جوق ەمەس» دەپ جازعان ەك. ايتقانىمىزداي-اق، بولدى.

دەگەنمەن، سايراگۇلدىڭ ىسىنە قاتىستى «Abai.kz» اقپاراتتىق پورتالىندا دۇركىن-دۇركىن ماقالا جازىلدى. وسى ماقالالار ارقىلى ءبىز سايراگۇلدىڭ ماسەلەسىن قوعام تالقىسىنا ۇسىندىق. «ءبىر ادامنىڭ تاعدىرى - ۇلتتىڭ تاعدىرى» ەكەنىن بۇقاراعا دالەلدەدىك. سايراگۇلدىڭ ماسەلەسى، ونىڭ تاعدىرى، ونىڭ دەنساۋلىعىنا قاتىستى كەز كەلگەن مالىمەت اشىق بولۋى كەرەك. قىتايدىڭ ساياسي سۇرگىنىنەن ساۋعا سۇراپ، شەكارانى زاڭسىز كەسىپ ءوتىپ، بالالارى ءۇشىن قاراقان باسىن قاتەرگە بايلاپ كەلگەن سايراگۇلدىڭ ماسەلەسى ءبۇتىن قازاق جۇرتىنىڭ نازارىندا ەكەنىن قۇزىرلى ورگان نازارىنا جانە ءبىر مارتە ەسكەرتكەندى ءجون سانايمىز.

وسى رەتتە ايتا كەتەيىك، سايراگۇل ساۋىتباي قىتايدا قىتاي تىلىنەن ساباق بەرگەن. بالاباقشا ديرەكتورى بولعان. شي توراعانىڭ شىرعالاڭى باستالعان كەزدە ساياسي وقىتۋ لاگەرىنە ادام اپارعان. قىتاي كومپارتياسىنا قىزمەت ەتكەن ادام. ءبىر سوزبەن ايتقانداي، قىتاي بيلىگىنىڭ ساياسي قۇپيالارىنىڭ شەتىن بىلگەن ادام.

سايراگۇلدىڭ ەرلىككە پارا-پار «قىلمىسى» - ءدۇيىم جۇرتتىڭ تالقىسىندا. ءبىر عانا سايراگۇلدىڭ جايى - بۇكىل قىتايداعى قازاقتىڭ تاعدىرىن كوز الدىمىزعا كەلتىرەدى. سوندىقتان دا، ءبىزدىڭ قۇزىرەتتى ورگاندار سايراگۇل ساۋىتبايعا كەشىرىممەن قاراپ، بوستاندىققا شىعارۋعا ءتيىس. سايراگۇل سەكىلدى ازاماتتاردىڭ بارىنە ازاماتتىقتى جىلدام جاساپ، ءوز قازاعىمىزعا قورعان بولا الساق، ۇرپاق الدىنداعى مىندەتىمىزدىڭ ورىندالعانى...

نۇرگەلدى ابدىعانيۇلى

Abai.kz

41 پىكىر

ۇزدىك ماتەريالدار

قۇيىلسىن كوشىڭ

قانداستار قازاققا، قازاقستانعا نە بەردى؟

رايىس ءارىپجانۇلى 2145
الاشوردا

تۇركىلىك تەك جانە تۇركى-موعول بىرلىگى

ءجادي شاكەنۇلى 941
قاۋىپ ەتكەننەن ايتامىن

گازدىڭ گەوساياسي «گەموررويى»

ءامىرجان قوسان 1137