استانا كۇنىنە ورايلاستىرىلعان شارادان كەۋدەڭىزگە  وردەن تاعىپ كەتەم دەسەڭىز 1 ميلليون 750 مىڭ تەڭگە اقشا تولەيسىز.

قاراعاندى وبلىسىنا قاراستى اقتوعاي اۋىلىنان "جاس الاش" سايتىنا مانارگۇل ءمۇتالىپ ەسىمدى وقىرمانىمىز حابارلاستى. جۋىردا شاعىن كاسىپپەن اينالاساتىن كۇيەۋىنىڭ ەلەكتروندى پوشتاسىنا استانادا ورنالاسقان «وبششەستۆەننايا ناگرادا» جشس-نەن حات كەلگەن.

«ءسىزدىڭ ءمىنسىز بەدەلىڭىزدى، ايرىقشا كاسىبي جەتىستىكتەرىڭىزدى جانە ەكونوميكانى دامىتۋعا قوسقان جەكە ۇلەستەرىڭىزدى، ءوز سالاسىنداعى ناعىز كاسىپقوي مامان، تالانتتى ۇيىمداستىرۋشى ءارى باسشى رەتىندە ءسىزدىڭ ءسوزسىز ابىرويىڭىزدى ەسكەرە وتىرىپ – «قازاقستان رەسپۋبليكاسىنىڭ قوعامدىق ناگرادالار مەن اتاقتار جونىندەگى كوميەتتىڭ» ساراپتاۋ كەڭەسى ءسىزدىڭ كانديداتۋراڭىزدى «قازاقستاننىڭ قۇرمەتتى ازاماتى» جوعارعى قوعامدىق مويىنداۋ وردەنىمەن ماراپاتتاۋعا شەشىم قابىلداندى»، — دەلىنگەن ەكەن ەلوردادان كەلگەن حاتتا.  

قوعامدىق ۇيىم شالعايدا ەڭبەك ەتىپ جاتقان كاسىپكەرگە تولتىرۋ ءۇشىن ءتىپتى ماراپاتتاۋ پاراعىن دا جىبەرگەن.

«العاشىندا قۋانىپ قالعان ەدىك. الايدا، وردەندى الۋ ءۇشىن 1 ميلليون 750 مىڭ تەڭگە تولەۋ كەرەكتىگىن بىلگەندە تاڭقالدىق. كورسەتىلگەن نومىرلەرگە سەنبەي حابارلاسىپ ەدىك، ولار سول سوممانى تولەۋ كەرەكتىگىن راستادى. قىسقاسى، بۇل اتاق ساتۋ. سولكەباي ساۋدالاۋ»، — دەيدى مانارگۇل ءمۇتالىپ.

"جاس الاش" ءتىلشىسى «وبششەستۆەننايا ناگرادا» جشس-نە حابارلاسقان ەدى. الايدا، ساراپتاۋ-ىرىكتەۋ كوميتەتىنىڭ توراعاسى يگور نازينمەن تىلدەسە المادى. اتالعان مەكەمەنىڭ مەنەدجەرىمىن دەپ ءوزىن تانىستىرعان تاتيانا (تەگىن ايتۋدان باس تارتتى) ەسىمدى قىزمەتكەر باسشىلىقتىڭ قاشان بولاتىنىن بىلمەيمىن دەپ قىسقا قايىردى. جانە وردەنگە لايىقتى تۇلعالاردىڭ قالاي ىرىكتەلەتىنەن دە بەيحابار ەكەنىن ايتتى.

«بىزدىكى مەملەكەتتىك ماراپات ەمەس. وردەن يەگەرلەرىنىڭ قالاي ىرىكتەلىپ الىناتىنىن بىلمەيمىن. نەگە اقشاسى كوپ دەيسىز عوي. سەبەبى شىعىن كوپ. جانە ءبىز بۇدان تۇسكەن قاراجاتتىڭ ءبىر بولىگىن قايرىمدىلىق شارالارىنا جۇمسايمىز»، — دەدى تاتيانا. 

1 ميلليون 750 مىڭ تەڭگەگە وردەن الۋشى كۇتىپ الۋ مەن مەيمانحاناعا ءبىر كۇندىك ورنالاستىرۋ، ەسترادا جۇلدىزدارىمەن وتەتىن كونتسەرت، شاراعا باق وكىلدەرىن شاقىرۋ، فوتو مەن ۆيدەوعا ءتۇسىرۋ قىزمەتتەرى كىرەدى ەكەن.

«قازاقستاننىڭ قۇرمەتتى ازاماتى» وردەنى ءۇش جىلدان بەرى بەرىلىپ كەلە جاتىر ەكەن.

قانات تىلەۋحان

دەرەككوزى: "جاس الاش" گازەتى

Abai.kz