استانا – الاشتىڭ اسقاق بەدەلى، تاۋەلسىز قازاقستاننىڭ تاريحىنداعى قول جەتكىزگەن ەڭ زور تابىسى.

ءوزىن قازاقپىن، قازاقستاندىقپىن دەپ سانايتىن ازامات ءۇشىن استانا – ەڭ ۇلكەن ماقتانىش!

بيىل قازان ايىنىڭ 24-ءتى مەنىڭ ەلگە ورالعانىما 20 جىل تولادى. سول ۋاقىت ارالىعىندا استانا كوز الدىمدا ءوسىپ، وركەندەدى. مەنىڭ ۇلى دالا ەلىندە جاساعان جانە اللا بۇيىرىپ، الدا جاسايتىن بارلىق ءومىرىم استانامەن زامانداس بولىپ قالا بەرەدى.

استانادا تۇراتىن ادام وزىنە كادىمگىدەي مىندەت، جاۋاپكەرشىلىك الۋعا ءتيىستى. سەبەبى، استانا – ۇلى ەلىمىزدىڭ اكىمشىلىك جانە ساياسي وتالىعى. بيلىكتىڭ بارلىق ۇشار باسى استانادا تۇرادى. ال، بار قازاقتىڭ شىققان جەرى – اۋىل! بيلىككە قولى جەتكەن ءار قازاق اۋىلىن ويلاۋى، ونىڭ كوركەيىپ، گۇلدەنۋى ءۇشىن تەر توككەنى ءجون. استانادا تۇراتىن مەن جانە مەنىمەن تاعدىرلاس «ارعى بەتتەن» ورالعان قانداستارىم ءۇشىن مەملەكەتىمىز بەن شەتتە جۇرگەن قازاقتاردىڭ تاعدىرى بىردەي – ءبىرىنشى ورىندا تۇرۋعا ءتيىس! قاي مينيسترلىككە كىرەيىك، قاي كوميتەتتىڭ ەسىگىن اشايىق، جەكە شارۋانى ونىنشى ورىنعا ىسىرىپ قويىپ، سولاردىڭ اتاجۇرتىنا ورالۋى، ورالعاندارىنىڭ ورنىعىپ قالۋى جايلى ايتۋعا مىندەتتىمىز! باسقا سالادا دا سولاي. شاما-شارقىمشا قانداستارىمنىڭ ءۇنىن اقوردا مەن ۇكىمەتكە جەتكىزىپ كەلەم! دەمەك، بۇل جاعىنان العاندا، ءوزىم جۇرت بەتىنە ءتۇزۋ قاراي الام! استانا مەنى بەتىمنەن قاققان جوق، ءسوزىمدى جەرگە تاستاعان ەمەس. كەرەكتىسىن ىلىككە الىپ، زاڭداستىرىپ كەلەدى.

سول ءۇشىن دە، استانا، مەن ساعان ريزامىن!

ادام بالاسى ءۇشىن ەڭ قىمبات قۇندىلىق – اللانىڭ ادام بالاسىنا بەرگەن ازاتتىعى مەن ەركىندىگى!

قۇدايعا تاۋبە، سول ەركىندىك پەن بوستاندىق مەنىڭ وتانىم قازاقستاندا بار، جەتكىلىكتى! جەتىسپەي جاتقان جەرى بولسا، اقىلدى ۇرپاق ەرتەڭ جىتىلدىرەدى، تولىقتىرادى!

«استانا» دەگەن ءسوز ايتىلا باستاعاندا، الدىمەن ويعا ورالاتىن، تىلىڭە تيەك بولاتىن ءبىر ەسىم بار. ول – ۇلت كوشباسشىسى نۇرسۇلتان نازارباەۆ!

تاۋەلسىز قازاقستاننىڭ، ونىڭ ەلورداسى بولعان استانانىڭ قۇرىلۋى، قالىپتاسۋى، بۇگىنگى دەڭگەيگە جەتۋى وسى ەسىممەن – نۇرسۇلتان ابىشۇلىمەن تىكەلەي بايلانىستى! ارىستان جۇرەكتى، قۇرىش جىگەرلى، نۇر كەلبەتتى نۇراعا تۋعان حالقى مەن ءوزى باستاپ قۇرعان تاۋەلسىز مەملەكەتى ءۇشىن بۇكىل سانالى عۇمىرى مەن  اقىل-پاراساتىن ارناپ كەلەدى!

ابىلاي مەن ءاليحاننىڭ ورىنداي الماي كەتكەن اسىل ارمانىن ورىنداۋ مىندەتى عاسىر توعىسىندا نۇرسۇلتان ءابىشۇلىنا جۇكتەلدى ءھام ول مىندەت، مىنە، تابىستى ورىندالدى. ءبىز سونىڭ كۋاگەرى بولىپ وتىرمىز...

دانا قازاق «جاقسىلىقتىڭ ەرتە-كەشى جوق!» دەيدى. ءبىزدىڭ قازاق – جومارت حالىق! استانانىڭ 20 جىلدىعىنا ارنالعان بۇگىنگى سالتاناتتى تويدا دا سول كەڭ-مولدىعىن كورسەتىپ، ءار وبلىس ءوز بايعازىسىن اكەلىپ، «ەسىل» دەيتىن ەركە سۇلۋ وزەننىڭ ەكى وڭىرىنە قاداپ جاتىر. ال، مەنىڭ بايعازىم بولەكتەۋ: ۋاقىتى مەن ورايى كەلىپ تۇر، استانانىڭ اتىن «نۇرسۇلتان» دەپ وزگەرتۋ كەرەك!

وركەنيەتتى ۇلتتار مۇنداي ءۇردىستى باياعىدا باستاپ كەتەكەن. قۇدايعا تاۋبە، تاۋەلسىزدىكتىڭ ارقاسىندا قازاق تا دۇيەگە تانىلدى، الپاۋىت ەلدەرمەن تىزە ءتيىستىرىپ قاتار وتىراتىن، مىنبەلەردەن ءبىرىنشى بولىپ ءسوز الىپ، پكىر ايتاتىن دەڭگەيگە جەتتى.

ەرتە مە، كەش پە، ءبارىبىر، «استانا» اتى «نۇرسۇلتان» بولىپ وزگەرەدى!

ەگەر، وسى 20 جىلدىقتان باستاپ استانا «نۇرسۇلتان» دەپ اتالسا، بۇل – ءبىزدىڭ ناعىز كورەگەن ۇلت ەكەنىمىزدىڭ ايعاعى بولماق. اينالامىزداعى باسەكەلەس ەلدەردىڭ قىزىعا دا، قىزعانا دا قارايتىنىنا مەنىڭ سەنىمىم كامىل. وعان ءبىزدىڭ ەلباسىمىزدىڭ ەسىمى، داۋ جوق، تاتيدى، لايىق! جانە وسى شەشىمى ءۇشىن قازاق ەشكىمنەن ۇيالمايدى!

ن.نازارباەۆقا دەگەن قۇرمەت – تاۋەلسىز قازاقستانعا جاسالعان قۇرمەت!

7-شىلدەدەن باستاپ مەنىڭ «نۇرسۇلتان قالاسىندا» تۇرعىم كەلەدى!

استانا، 20 جىلدىق تويىڭ قۇتتى، عۇمىرىڭ ماڭگىلىك بولسىن!!!

اۋىت مۇقيبەك

 05.07.2018

استانا

Abai.kz