مۇحاممەدوۆ اكىمدىك الدىنا نارازىلىق تانىتۋعا بەس بالاسى جانە ايەلىمەن بىرگە شىقتى. بالالارى قولدارىنا ء"بىز قۇل ەمەسپىز. قۋدالاۋدى توقتات" دەپ جازىلعان اق پاراقتار ۇستاپ شىقتى.

مۇحاممەدوۆ 10 مامىردا "ساياسي تۇتقىنداردى بوساتۋ تالابىمەن ميتينگىگە شىققانى" ءۇشىن اۋەلى ەسكەرتۋ الىپ، كەيىن مامىردىڭ 25-ىندە 10 تاۋلىك اكىمشىلىك قاماۋعا الىنعان، 4 ماۋسىمدا بوساپ شىققان. ول سودان بەرى پوليتسيا قىزمەتكەرلەرىنىڭ ءوزىن اڭدىپ، ءتۇرلى قىسىم كورسەتە باستاعانىن ايتىپ، ءوزىن قالا اكىمىمەن كەزدەستىرۋدى تالاپ ەتتى. بىراق ول وزىنە قىسىم جاسالا باستاعانى تۋرالى ەش جەرگە شاعىمدانباعان.

قالا اكىمى شىقپاعان سوڭ، نۇرجان مۇحاممەدوۆ اكىمدىك الدىندا وزىمەن الا كەلگەن بەنزينىن ۇستىنە قۇيىپ، ورتەمەك بولعان. قولىنا وتجاققىش الىپ العان بەلسەندى قاسىنا ەشكىمنىڭ جولاماۋىن تالاپ ەتتى.

وسى ۋاقىتتا قالا اكىمىنىڭ ورىنباسارى قايرات نۇرتاي شىعىپ، بەلسەندىمەن اڭگىمەلەستى، وعان ىشكە كىرىپ سويلەسۋدى ۇسىندى. قايرات نۇرتاي بەلسەندىنىڭ شاعىمىنا بايلانىستى پوليتسەيلەرگە قىزمەتتىك تەكسەرۋ جۇرگىزىلەتىنىن ايتتى.

بەلسەندى ءوزىنىڭ قالا شەتىندەگى ىقشام اۋداندا پاتەر جالداپ تۇرىپ جاتقانىن، بىراق تاياۋدا پاتەر يەسى ۋچاسكەلىك پوليتسەي وزىنە ايىپپۇل سالاتىنىن ايتقان سوڭ بەلسەندىنىڭ وتباسىن پاتەردەن شىعارىپ جىبەرگەنىن ايتتى. ولار قازىر وزدەرى جۇمىس ىستەيتىن دۇكەننىڭ قويماسىندا تۇرىپ جاتىر.

Abai.kz