پارلامەنت سەناتى اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى جەڭىس نۇرعاليەۆ پەن ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ مۇشەسى ەدىل مامىتبەكوۆ تاشكەنت قالاسىندا وتكەن «دەموكراتيالاندىرۋ جانە ساياسي جۇيەنى جاڭعىرتۋ جاعدايىنداعى زاڭ شىعارۋ جانە پارلامەنتتىك باقىلاۋ: وزبەكستان تاجىريبەسى» اتتى حالىقارالىق دوڭگەلەك ۇستەل وتىرىسىنا قاتىستى.

شاراعا بىرقاتار ەلدەردىڭ پارلامەنتشىلەرى، ساراپشىلار، ءتۇرلى مەملەكەتتىك ورگانداردىڭ، حالىقارالىق ۇيىمداردىڭ جانە بۇقارالىق اقپارات قۇرالدارىنىڭ وكىلدەرى قاتىستى.

دوڭگەلەك ۇستەلدىڭ ماقساتى زاڭ شىعارۋدىڭ حالىقارالىق تاجىريبەسىن تالقىلاۋ، اتقارۋشى ورگانداردى پارلامەنتتىك باقىلاۋدى تالداۋ جانە وزبەكستاندا جۇزەگە اسقان رەفورمالاردىڭ تيىمدىلىگىن قاراستىرۋ بولدى.

شاراعا قاتىسۋشىلار زاڭ شىعارۋ قىزمەتىنىڭ قازىرگى زامانعى ادىستەرى مەن قاعيداتتارى، مەملەكەتتىك باسقارۋ جۇيەسىندەگى ساياسي پارتيالاردىڭ ءرولى مەن ورنى، قازاقستان، اقش، ۇلىبريتانيا، گەرمانيا، يتاليا، جاپونيا، كانادا جانە باسقا ەلدەردەگى پارلامەنتتىك باقىلاۋ تاجىريبەسىن سالىستىرمالى تالداۋ تۋرالى بايانداما جاسادى.

ج.نۇرعاليەۆ ءوز سوزىندە دوڭگەلەك ۇستەلگە قاتىسۋشىلاردى ەلىمىزدىڭ قوعامدىق-ساياسي جانە الەۋمەتتىك-ەكونوميكالىق جاڭعىرتۋ جونىندەگى ەلباسى نۇرسۇلتان نازارباەۆتىڭ باستاماسىمەن تانىستىردى. دەپۋتات قازاقستاننىڭ ىشكى ساياساتىنىڭ نەگىزگى باعىتتارى، نەگىزگى ستراتەگيالار مەن باعدارلامالىق قۇجاتتارى تۋرالى ايتىپ بەردى.

ج. نۇرعاليەۆ پرەزيدەنتتىك وكىلەتتىگىنىڭ ءبىر بولىگىن بيلىكتىڭ اتقارۋشى جانە زاڭ شىعارۋشى تارماقتارىنا بەرۋ تۋرالى مەملەكەت باسشىسى باستاماسىنىڭ ماڭىزىنا توقتالا كەلىپ، قازاقستان پارلامەنتىنىڭ قىزمەتى تۋرالى حاباردار ەتتى. اتاپ ايتقاندا، دوڭگەلەك ۇستەلگە قاتىسۋشىلار ءبىزدىڭ ەلىمىزدە جۇزەگە اسقان كونستيتۋتسيالىق رەفورما جايىندا تانىستىرىلدى، ونىڭ ناتيجەسىندە پارلامەنتتىڭ باقىلاۋ مىندەتتەرى ارتا تۇسكەنى جانە الەۋمەتتىك-ەكونوميكالىق ساياساتتى جۇزەگە اسىرۋ مەن ەلدىڭ جاي-كۇيىنە ۇكىمەتتىڭ جاۋاپكەرشىلىگى كۇشەيتىلگەنى ايتىلدى.

دوڭگەلەك ۇستەلگە قاتىسۋشىلار تالقىلانعان ماسەلەلەرگە كوزقاراستارى ۇقساس ەكەنىن ايتا كەلىپ، كوپجاقتى پارلامەنتارالىق ىنتىماقتاستىقتى جالعاستىرۋدى جاقتادى.

Abai.kz