قازاقتىڭ ماڭدايالدى اقىنى حاميت ەرعاليەۆتىڭ ەركە قىزى، بەلگىلى قوعام قايراتكەرى گۇلجان ەرعاليەۆا تاعى دا بۇيرەكتەن سيراق شىعاردى. ول دەنيس تەننىڭ مەزگىلسىز قازاسىنا قاتىستى ويىن ايتا كەلىپ، الماتى قالاسىن بىرنەشە جىل جابىق ۇستاۋ كەرەكتىگىن ۇسىندى.

"شىندىقتى جالاڭاش شەشىنىپ تاستاپ ايتامىن" دەگەن جەلەۋمەن لىپاسىن ىسپىرىپ، بەينەروليككە تۇسەتىن اجەمىز بۇ جولى تۇراقتى جۇمىسى مەن تىركەۋى جوق ازاماتتاردى الماتىدان قۋىپ جىبەرۋ كەرەك دەيدى.

تۇراقتى جۇمىسى جوق كىمدەر؟ قازاقتار! تىركەۋى جوق شە؟ تاعى دا اۋىلدان كەلگەن قازاقتار!

گۇلجان اجەي الماتىدان "جەر اۋدارىلعان" ادامداردى "جەرگىلىكتى اكىمدەر جۇمىسپەن قامتىپ، تاعدىرىنا جاۋاپكەرشىلىكپەن قاراۋ كەرەك" دەپ كوسەمسيدى. جەرگىلىكتى اكىمدەردە ونداي مۇمكىندىك بولسا، قازىرگىندەي ميگراتسيالىق ءدۇمپۋ بولماس ەدى. بۇل - ءبىر.

ەكىنشىدەن، بۇل كەشەگى مەزگىلسىز قازاعا قاراپايىم اۋىلدان، شەتتەن كەلگەن قازاقتى تىكەلەي ايىپتى دەپ كىنالاۋ ەمەس پە؟

ۇشىنشىدەن، چەمپيوننىڭ قازاسىنان كەيىن نەلىكتەن اۋىلدان كەلىپ قالالىق بولعالى جۇرگەن ميلليونداعان قازاق جاپا شەگۋى كەرەك.

تورتىنشىدەن، اجەمىز ايتىپ وتىرعان "مەملەكەتتەگى باقىلاۋدان شىعىپ كەتكەن ميگراتسيانى توقتاتۋ" دەگەن ءسوز قازاقتىڭ قالالىق ۇلت بولۋىنا تىكەلەي قارسى بولۋدى بىلدىرەدى.

دەمەك، ورىسشا سويلەپ، ورىسشا ويلايتىن گۇلجاندار عانا الماتى مەن استانانى بيلەپ-توستەۋى كەرەك تە، قالعانىمىز اۋىلعا قايقايۋىمىز، ولاردىڭ جاقسى ءومىر سۇرۋىنە بوگەت بولماۋىمىز كەرەك ەكەن.

الماتىنىڭ حالقى ەكى ميلليون ادامنان اسىپ كەتتى دەپ "شىرىلداعان اجەمىز" ەندى قازاقتاردىڭ تۋىنا قارسىلىق بىلدىرەتىن شىعار.

ءتۇيىن

راس. گۇلجان اجەمىز ءوز سوزىندە قازاقتار دەگەن ءبىر اۋىز ءسوز ايتپايدى. بىراق، ءسوزدىڭ ىڭعايى، ىمىراسى - سول قازاقتار ەكەنىن ايتپاي تۇسىنۋگە بولادى. "الماتىنى بىرنەشە جىل جابىق قالا ەتۋ يدەياسى" اجەمىزدىڭ بەت پەردەسىن تاعى ءبىر اشىپ بەردى. 

ءبىز وسىنداي وتە-موتە ەرەكشە ويلايتىن اجەلەرىمىزدەن قاشان ادا بولار ەكەنبىز!

نۇرشاش نۇراي

Abai.kz