قازاقستان رەسپۋبليكاسىنىڭ ۇجىمدىق قاۋىپسىزدىك تۋرالى شارت ۇيىمىنا (ۇقشۇ) توراعالىعى اياسىندا الماتىدا ۇقشۇ سىرتقى ىستەر مينيسترلەرى كەڭەسىنىڭ كەزەكتى وتىرىسى ءوتتى، - دەپ حابارلايدى اباي-اقپارات.

ءىس-شاراعا ۇقشۇ-عا مۇشە بارلىق مەملەكەتتەردىڭ – ارمەنيا رەسپۋبليكاسىنان سىرتقى ىستەر ءمينيسترى زوگراب مناتساكانيان، بەلارۋس رەسپۋبليكاسىنان سىرتقى ىستەر ءمينيسترىنىڭ ورىنباسارى اندرەي داپكيۋناس، قازاقستان رەسپۋبليكاسىنان سىرتقى ىستەر ءمينيسترى قايرات ءابدىراحمانوۆ، قىرعىز رەسپۋبليكاسىنان سىرتقى ىستەر مينيسترلىگىنىڭ ستاتس-حاتشىسى ايبەك وموكەەۆ، رەسەي فەدەراتسياسىنان سىرتقى ىستەر ءمينيسترى سەرگەي لاۆروۆ، تاجىكستان رەسپۋبليكاسىنان سىرتقى ىستەر ءمينيسترى سيرودجيددين مۋحريددين، سونداي-اق ۇقشۇ باس حاتشىسى يۋري حاچاتۋروۆ قاتىستى.

ولار حالىقارالىق كۇن ءتارتىبى جانە ۇيىم اياسىنداعى سىرتقى ساياسي ىنتىماقتاستىقتىڭ ودان ءارى دامۋى تۋرالى پىكىر الماستى.

كەڭەس قورىتىندىسى بويىنشا باياندالعانداي، كەزدەسۋ قاتىسۋشىلارعا اۋعانستانداعى اعىمداعى احۋال جانە ونىڭ دامۋ پەرسپەكتيۆالارىن باعالاۋدى سالىستىرۋعا مۇمكىندىك بەردى.

وتىرىس بارىسىندا سيرياداعى داعدارىس تەك ساياسي جانە ديپلوماتيالىق شارالار ارقىلى شەشىلۋى مۇمكىن ەكەندىگى تۋرالى جالپى ۇستانىم راستالدى. وسىعان بايلانىستى سيرياداعى جاعدايدى تۇراقتاندىرۋداعى استانا پروتسەسىنىڭ ءرولى ەرەكشە اتاپ ءوتىلدى.

تاراپتار اقش پەن كحدر باسشىلارى اراسىنداعى الداعى كەلىسسوزدەر سولتۇستىك كورەيا يادرولىق باعدارلاماسى، قارۋسىزداندىرۋ جانە الەمدەگى جاپپاي جويۋ قارۋىن تاراتپاۋ ماسەلەلەرىن شەشۋدە ماڭىزدى قادام بولاتىنىنا ءۇمىت ارتادى.

سونىمەن قاتار، كۇن تارتىبىنە ۇقشۇ مەن حالىقارالىق قۇرىلىمدار اراسىنداعى ىنتىماقتاستىقتى دامىتۋ جانە نىعايتۋ ەنگىزىلگەن. قازاقستاننىڭ ۇقشۇ-عا توراعالىق ەتۋى بۇۇ قاۋىپسىزدىك كەڭەسىنە مۇشە بولۋىمەن سايكەس كەلدى. وسىلايشا، قازاقستان اتالعان ەكى ۇيىم اراسىنداعى كۇن ءتارتىبىن جاقىنداستىرۋ بويىنشا جۇمىس جاسايدى.

ءوز سوزىندە ق.ءابدىراحمانوۆ پرەزيدەنت ن.ءا.نازارباەۆتىڭ وتكەن جىلعى قاراشادا مينسك قالاسىندا وتكەن مەرەيتويلىق سامميتتە ۇسىنعان باسىم باعىتتاردى ىسكە اسىرۋ كەڭەس وتىرىسىنىڭ باستى تاقىرىبى بولعاندىعىن اتاپ ءوتتى.

اسكەري جانە اسكەري-تەحنيكالىق ىنتىماقتاستىقتى دامىتۋ مەن نىعايتۋ، جاھاندىق تەرروريزمگە قارسى كۇرەس حالىقارالىق جۇيەسىن قالىپتاستىرۋعا ۇيىمنىڭ قاتىسۋى، كيبەرقاۋىپسىزدىك سالاسىنداعى قاۋىپتەرگە قارسى تۇرۋدىڭ بىرلەسكەن تاسىلدەرىن ازىرلەۋ جانە ەسىرتكىنىڭ زاڭسىز اينالىمىمەن كۇرەسۋدىڭ ناقتى شارالارىن ازىرلەۋ سياقتى وزەكتى ماسەلەلەر باسىم باعىتتاردىڭ قاتارىندا.

قازاقستان ۇقشۇ، تمد، ورتالىق ازيالىق ايماقتىق اقپاراتتىق ۇيلەستىرۋ ورتالىعى، اوسشك جانە باسقا دا حالىقارالىق ۇيىمدار جانە قۇرىلىمدارمەن ىنتىماقتاستىقتى ودان ءارى نىعايتۋ قاجەت دەپ سانايدى.

ۇقشۇ سىرتقى ىستەر مينيسترلەرى كەڭەسىنىڭ بۇگىنگى وتىرىس قاتىسۋشىلارىنىڭ كوپشىلىگى الماتىعا شىۇ ءسامميتى وتكەن تسينداو قالاسىنان كەلگەندىگىن اتاپ ءوتۋ قاجەت.

قازاقستان رەسپۋبليكاسىنداجانە بۇۇ قاۋىپسىزدىك كەڭەسىندە بەلسەندى ىلگەرىلەپ كەلە جاتقان قازاقستان پرەزيدەنتىنىڭ تەرروريزمسىز الەمگە قول جەتكىزۋ جونىندەگى ارەكەت ەتۋ كودەكسىن قۇرۋ جونىندەگى باستاماسىن ودان ءارى جۇزەگە اسىرۋ ۇقشۇ سەرىكتەستەرىمەن ىنتىماقتاستىقتىڭ تاعى ءبىر ماڭىزدى باعىتى بولىپ تابىلادى. وسى قۇجاتتىڭ نەگىزگى ماقساتتارى بۇۇ ءجۇز جىلدىعىنا وراي 2045 جىلى كونترتەرروريزم جانە دامۋ بويىنشا تەرروريزمسىز الەمگە قول جەتكىزۋ جونىندەگى سەرىكتەس ەلدەردىڭ كەڭ حالىقارالىق كواليتسياسىن قۇرۋ بولىپ تابىلادى.

سىرتقى ىستەر مينيسترلەرىنىڭ كەڭەسى ۇيىمدى ينستيتۋتسيونالدىق تۇرعىدا نىعايتۋ ماسەلەلەرىنە ەرەكشە نازار اۋداردى. اتاپ ايتقاندا، ۇجىمدىق قاۋىپسىزدىك تۋرالى شارت ۇيىمىنىڭ قۇقىقتىق مارتەبەسى تۋرالى كەلىسىمگە وزگەرىستەر ەنگىزۋ تۋرالى حاتتاما جوباسى ماقۇلداندى.

كەزدەسۋ بارىسىندا تاراپتار ورتا جانە كىشى قاشىقتىقتى زىمىرانداردى جويۋ تۋرالى شارتتىڭ كۇشىنە ەنۋىنىڭ 30 جىلدىعىنا ارنالعان بىرلەسكەن مالىمدەمەنى قابىلدادى. «قازاقستان وسى تاريحي كەلىسىمنىڭ قاتىسۋشىسى رەتىندە اتالعان قۇجاتقا دەگەن تولىق اينىماستىعىن راستايدى جانە بارلىق تاراپتاردى ونى ورىنداۋعا جانە ساقتاۋعا شاقىرادى»، - دەدى ق.ءابدىراحمانوۆ.

جالپى، ۇقشۇ سىرتقى ىستەر مينيسترلەرىنىڭ كەڭەسى بىرقاتار قۇجاتتار بويىنشا ۋاعدالاستىقتارعا قول جەتكىزدى. ولاردىڭ ەڭ ماڭىزدىلارى اعىمداعى جىلى كۇزدە قازاقستاننىڭ توراعالىعىمەن استانادا وتەتىن ۇقشۇ سامميتىندە مەملەكەت باسشىلارىنىڭ قاراۋىنا ۇسىنىلاتىن بولادى.

Abai.kz