سارسەنبى, 4 تامىز 2021
3409 1 پىكىر 3 تامىز, 2018 ساعات 09:46

قازاقستانداعى "ساياسي تۇتقىندار" ءتىزىمى جاڭاردى

قازاقستاندىق قۇقىق قورعاۋشىلار قازاقستانداعى "ساياسي تۇتقىن" دەپ تانىلعانداردىڭ جاڭارتىلعان ءتىزىمىن جاريالادى. قۇقىق قورعاۋشى باقىتجان تورەعوجينانىڭ Facebook-تەگى پاراقشاسىندا حابارلاۋىنا قاراعاندا، 25 شىلدە كۇنى قۇقىق قورعاۋشىلاردان قۇرالعان ساراپشىلار كەڭەسى ساياسي تۇتقىندار تىزىمىنە قاماۋدا وتىرعان بەلسەندىلەر مەن بلوگەرلەر - المات جۇماعۇلوۆ، كەنجەبەك ابىشەۆ، اۆلوباس جۇماەۆ، اسەت نۇرجاۋباي، مۇرات تۇڭعىشباەۆ جانە اسەت ابىشەۆتى قوسقان.

المات جۇماعۇلوۆ پەن كەنجەبەك ابىشەۆ 2017 جىلدىڭ 29 قاراشاسىنان بەرى الماتىدا تەرگەۋ اباقتىسىندا قاماۋدا وتىر. ولار "ارازدىق تۋدىردى" جانە "تەرروريزمدى ناسيحاتتادى" دەگەن كۇدىككە ىلىنگەن.

اقتاۋلىق بەلسەندى اۆلوباس جۇماەۆ دا "ارازدىق تۋدىردى" جانە "بيلىكتى باسىپ الۋعا شاقىردى" دەگەن كۇدىكپەن 2018 جىلدىڭ 11 مامىرىنان بەرى قاماۋدا وتىر.

الماتىلىق بەلسەندىلەر اسەت نۇرجاۋباي مەن اسەت ابىشەۆ جانە ازاماتتىق بەلسەندى ءارى بلوگەر مۇرات تۇڭعىشباەۆ "قىلمىستىق توپتى قارجىلاندىردى" جانە "سوت تىيىم سالعان ۇيىمنىڭ قىزمەتىنە قاتىستى" دەگەن كۇدىككە ىلىنگەن. تۇڭعىشباەۆ ماۋسىمنىڭ سوڭىندا قىرعىزستاننان ەكستراديتسيالانىپ، سودان بەرى الماتىدا قاماۋدا وتىر. اسەت نۇرجاۋباي ساۋىردە، اسەت ابىشەۆ شىلدەنىڭ 7-سىندە قاماۋعا الىنعان.

قۇقىق قورعاۋشىلار بۇعان دەيىنگى "ساياسي تۇتقىندار" ءتىىزىمى وزگەرگەنىن ايتادى. بۇعان دەيىن "ساياسي تۇتقىن" دەپ تانىلعان بەلسەندىلەر تالعات ايان، ءامين ەلەۋسىنوۆ، نۇربەك قۇشاقباەۆ پەن جۋرناليست اسەت ماتاەۆ جانە عالىم سايات ىبىراي قاماۋدان، ال اقمارال توبىلوۆا ۇيقاماقتان بوساتىلعان. ال شىمكەنتتىك بەلسەندى ارداق ءاشىم پسيحياترلىق ەمحانادا ءماجبۇرلى ەمدەۋدەن بوساعان. كەشە شىعىس قازاقستان وبلىستىق سوتى قۇقىق قورعاۋشى ۆاديم كۋرامشيندى مەرزىمىنەن بۇرىن شارتتى تۇردە بوساتۋ تۋرالى شەشىم شىعارعان.

دەگەنمەن، قۇقىق قورعاۋشىلار تىزىمدەگى باسقا دا ساياسي تۇتقىنداردىڭ جاعدايى وزگەرمەگەنىن، ال ءتىزىمنىڭ جاڭا ەسىمدەرمەن تولىعىپ جاتقانىن ايتادى.

قازاقستاندا العاشقى ساياسي تۇتقىندار ءتىزىمى 2013 جىلى جاسالعان. قۇقىق قورعاۋشىلار ساياسي تۇتقىن دەپ تانىعاندار قاتارىندا اقىن ءارى ديسسيدەنت ارون اتابەك، "قازاتوموندىرىس" كومپانياسىنىڭ بۇرىنعى باسشىسى مۇحتار جاكىشەۆ بار.

Abai.kz

1 پىكىر