سارسەنبى, 24 شىلدە 2024
ساڭلاق 4844 0 پىكىر 17 تامىز, 2018 ساعات 12:53

«قايراتقا» بىلىكتى باپكەر كەرەك

«قايرات» فۋتبول كلۋبى بيىل ەۋروپا ليگاسى اياسىنداعى جورىعىن ىرىكتەۋ كەزەڭىنىڭ ءۇشىنشى اينالىمىندا اياقتادى. الماتىلىقتاردىڭ جولىن كەسكەن چەحيانىڭ «سيگما» كومانداسى.

باۋىرجان يسلامحان باستاعان جىگىتتەر ەكىنشى اينالىمدا ازۋلى «از الكمار» كومانداسىن ارتقا تاستاعان بولاتىن. الايدا، بۇل الدامشى ناتيجە بولىپ شىقتى. جاڭا ماۋسىم باستالعالى الا-قۇلا ونەر كورسەتىپ جۇرگەن الماتىلىق كوماندا جانكۇيەرلەرىن جەرگە قاراتىپ كەتتى.

باپكەرلەرى مەن ويىنشىلارى ميلليونداعان جالاقى الاتىن «قايرات» كومانداسىن جولدان شىعارعان چەح ەلىنىڭ شەبەرلەرى جايلى ايتا كەتەيىك. «سيگما» - تۋرا ءبىر عاسىرلىق تاريحى بار كلۋب. بىراق، بۇل كوماندا ەۋروپانىڭ ۇزدىكتەرى قاتارىنان سانالمايدى. گەرمانيانىڭ اتاقتى transfermarkt سايتىنىڭ مالىمەتىنە سۇيەنسەك، كوماندا ساپىنداعى ويىنشىلاردىڭ ترانسفەر نارىعىنداعى جالپى قۇنى 9,45 ملن ەۋرونى قۇرايدى. ەڭ قىمبات ويىنشىسى — ياكۋب پلشەك (1,3 ملن). ال الماتىلىق كوماندا ويىنشىلارىنىڭ قۇنى 15.8 ملن.

چەحيالىق كوماندانىڭ ءبىر ەرەكشەلىگى كوماندا ساپىندا جالعىز لەگيونەر بار. ال وزگەسى ءوز ەلىنىڭ ۇلاندارى. ءبىزدى قىزىقتىرعانى دا ءدال وسى جاعداي. كوماندا شەتەلدىك شەبەرلەرگە ەمەس، جەرگىلىكتى ويىنشىلارعا سەنىم ارتادى. سالىستىرۋ ءۇشىن ايتا كەتەيىك، «قايرات» ساپىندا 9 لەگيونەر دوپ تەبەدى. كەشە «سيگماعا» قارسى ويىندا بۇلاردىڭ جەتەۋى جاسىل الاڭدا ونەر كورسەتتى. باسقاشا ايتقاندا، «قايراتتىڭ» قىرۋار قارجىعا شاقىرعان شەتەلدىك ويىنشىلارى، تەك چەحيالىق فۋتبولشىلاردان قۇرالعان ورتاڭقول كوماندانى جەڭە المادى. جەڭە المادى دەيمىز-اۋ، قوس ويىننىڭ قورىتىندىسى بويىنشا 4:1 ەسەبىمەن ماسقارا بولىپ جەڭىلدى.

ال بۇل جەڭىلىسكە ءىشى اشىپ، ءوزىن كىنالاپ وتىرعان باپكەردى كورگەن جوقپىز. باپكەر دەپ «قايرات» كومانداسى يسپانيادان اتتاي قالاپ الدىرعان كارلوس الوس فەررەر جايلى ايتىپ وتىرمىز. بۇعان دەيىن بىردە-ءبىر كاسىپتىك كلۋبتىڭ تىزگىنىن ۇستاپ كورمەگەن كارلوس باپكەر ءوزىنىڭ بىلىكسىزدىگىن بايقاتىپ ءجۇر. ساردارى ايباتتى، ساربازى قايراتتى الماتىلىق كوماندانىڭ تالتىرەكتەپ ەكى اياعىن تەڭ باسا الماي جۇرگەنىنە وسى يسپان مامانى كىنالى.

كەشە ماتچتان كەيىنگى ءباسپاسوز ءماسليحاتىندا جۋرناليستەردىڭ «كەلەسى كەزەڭگە وتە الماۋىمىزعا ءسىزدىڭ باپكەرلىك تاجىريبەڭىزدىڭ ازدىعى سەبەپ بولدى ما» دەگەن سۇراعىنا، ءوزىنىڭ شىنىمەن دە «سيگما» كومانداسىنىڭ باپكەرىمەن سالىستىرعاندا تاجىريبەسىز ەكەنىن ايتتى. سوعان قاراعاندا، كارلوس باپكەر ەۋروپا ليگاسى سىندى ءىرى تۋرنيردە كوماندانى ۇلكەن جەتىستىككە جەتكىزۋگە دارمەنسىز ەكەنىن مويىندايتىن سەكىلدى.

ەندەشە، وزىنە دە، ويىنشىلارىنا دا سەنىمسىز تاجىريبەسىز شەتەلدىك مامانعا سەنىم ارتۋدىڭ قانشا قاجەتى بار. ەۋروكۋبوكتاردا ەل ءۇمىتىن اقتايدى دەگەن «قايراتتىڭ» تىزگىنىن قالايدا بىلىكتى باپكەر ۇستاعانى ءجون.

قۋانىش قاپپاس

Abai.kz

0 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1399
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 2195
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2216