جامبىل وبلىسى مەركى اۋدانىنداعى جەر داۋى ءالى باسىلاتىن ەمەس. ەل-جۇرت وزدەرىن تاقىرعا وتىرعىزىپ، ءبۇتىن ءبىر كووپەراتيۆتى تالان-تاراجعا سالعان بۇرىنعى باسشى جازادان قۇتىلىپ كەتە مە دەپ الاڭداۋلى. ايتۋلارىنشا، الاياقتىق بابى بويىنشا ايىپتالىپ، ۋاقىتشا قاماۋعا الىنعان توراعانىڭ بوستاندىققا شىعۋ قاۋىپى بار ەكەن. ەگەر راسىمەن سولاي بولسا باقىت ادامساپيەۆ ارىز جازعاندارعا تىقىر تاياندى دەيدى نارازى توپ. بۇل تۋرالى كتك ارناسى حابارلادى.

قىرىق-كىسى مەن قىڭىر كىسى اراسىندا داۋ تۋىنداعانىنا وسىمەن 5 جىلعا جۋىقتادى. جۇرتتىڭ ايتۋىنشا، ەلدىڭ سەنىمىنە كىرىپ «اقارال» وندىرىستىك كووپەراتيۆىنە باسشى بولىپ العان باقىت ادامساپيەۆ مۇنداعى دۇنيە –مۇلىك پەن جەر تەلىمدەرىن «قازاگرو» قارجىلىق ۇيىمىنا كەپىلگە قويىپ، قىرۋار قارجىنى ءوزى يەمدەنگەن. بۇل قۇيتىرقىلىعى ءۇشىن ەل نارازىلىق ءبىلدىرىپ، ۇستىنەن ارىز ءتۇسىرىپ، اقىرى توراعا جۋىردا ۋاقىتشا قاماۋعا الىنعان. ال ەندى سول ادامساپيەۆ بوساندىققا شىعادى دەگەندى ەستىگەن ەلدەن مازا قاشتى.

اسقار وماروۆ، «اقارال» وندىرىستىك كووپەراتيۆىنىڭ مۇشەسى:

-بوستاندىققا شىقسا، ۇيمە ءۇي ارالاپ، 50 مىڭ بەرەمىن، 100 مىڭ بەرەمىن، تۇسىنىكتەمەلەرىڭىزدى وزگەرتىڭىزدەر دەپ كەلىپ ءجۇر.  جانىنا ەكى-ءۇش ادامدى ىلەستىرىپ الادى. سودان ءبىز قاۋىپتەنەمىز.

الاياقتىق بابى بويىنشا قاماۋعا الىنعان كۇدىكتى قىلمىستىق ءىس اياقتالعانشا تەرگەۋ قاپاسىندا جاتۋى كەرەك دەيدى تۇرعىندار. ول ەركىندىككە شىقسا، تەرگەۋگە كەدەرگى كەلتىرەدى دەگەن كۇدىك بار. ءتىپتى قاشىپ كەتۋى دە مۇمكىن ەكەن. سوندىقتان جۇرت سۋديادان ونىڭ «ءۇي قاماعىنا جىبەرۋ» جونىندەگى ءوتىنىشىن قاناعاتتاندىرماۋدى تالاپ ەتەدى.

جاقان بازيلوۆ، «اقارال» وندىرىستىك كووپەراتيۆىنىڭ مۇشەسى:

-بۇنىڭ تۇراقتى مەكەنجايى جوق. تازا  الاياق. ءار قالادا ءۇيى بار، قاي جەردە تۇرىپ، قايدا جۇرگەنىن ەشكىم بىلمەدى. سوندىقتان مۇنى كەپىل اقىمەن جىبەرسە ونى تاپپاي قالۋىمىز مۇمكىن.

نارازى توپتىڭ سوزىنشە، باقىت ادامساپيەۆ كووپەراتيۆكە تيەسىلى كىرپىش پەن شاراپ زاۋىتى، گاراج، اكىمشىلىك عيماراتى سىندى نىساندار مەن 450 گەكتارعا جۋىق جەر تەلىمىن كەپىلگە تىگىپ 69 ملن. تەڭگە نەسيە العان. ۇزاق جىلدان بەرى ونىڭ ۇستەمە پايىزى ءوسىپ قارىز 109 ملن. تەڭگەگە جەتكەن. «قازاگرو» قارجى ۇيىمىنا سان جىلدان بەرى كوك تيىن تولەنبەگەندىكتەن ەندى كووپەراتيۆ مۇشەلەرىنە جەر مەن مۇلىكتەن تەگىس ايىرىلۋ قاۋىپى بار.

ازات ءشارىپوۆ، «اقارال» وندىرىستىك كووپەراتيۆىنىڭ توراعاسى:

-قازىر ادامساپيەۆكە قاتىستى 30 ءىس بار. ءبىر ادامعا ءالى ءبىر تيىن قايتارماعان. سوندىقتان بۇنى ازاماتتىق ىسپەن ەمەس قىلمىستىق ىسپەن قاراپ جابۋ كەرەك. سوندا عانا ناتيجە بولادى. 

باقىت ادامسپيەۆ قولدى بولعان قارجىنىڭ جارىمىن كەزىندە ءوزىنىڭ ورىنباسارى بولعان وسى ازات ءشارىپوۆ ەسەپشى اپكەسى ەكەۋى قالتاعا باستى دەپ ايىپتاعان. بىراق ونىڭ قىلمىسى دالەدەنبەگەن. ال وبلىستىق سوت توراعاسىنىڭ قابىلداۋىندا بولعان كوپشىلىك كوڭىلدى شىقتى. سەبەبى سۋديا كۇدىكتىنى ءۇي قاماعىنا شىعارۋعا جول بەرىلمەيدى دەپ كەسىپ ايتىپتى.

Abai.kz