دۇيسەنبى, 30 ناۋرىز 2020
1455 0 پىكىر 25 اقپان, 2019 ساعات 15:38

ق.توقاەۆ: پارلامەنت ەلباسىنىڭ بەس الەۋمەتتىك باستاماسى بويىنشا اۋقىمدى جۇمىستاردى جالعاستىرادى

ەلباسى ن.نازارباەۆ وتكەن جىلدىڭ ناۋرىز ايىندا پرەزيدەنتتىڭ بەس الەۋمەتتىك باستاماسى اتتى قازاقستان حالقىنا ۇندەۋ جولداعان بولاتىن. ول ۇندەۋدە - باسپانا ماسەلەسىن شەشۋ، جۇمىسشىلاردىڭ جالاقىسىن كوتەرۋ، ءبىلىم الۋدىڭ ساپاسىن ارتتىرۋ، كاسىپكەرلەردى قولداۋ سياقتى ەل الەۋەتى ءۇشىن وتە ماڭىزدى باستامالار كوتەرىلگەن. 

ال، جۋىردا پارلامەنت سەناتىنىڭ توراعاسى قاسىم - جومارت توقاەۆ سەنات بيۋروسىنىڭ وتىرىسىندا پارلامەنت جوعارعى پالاتاسى جۇمىسىنىڭ نەگىزگى باعىتتارىن بەلگىلەدى.

پارلامەنت پرەزيدەنتتىڭ بەس الەۋمەتتىك باستاماسىن جانە كەشەندى الەۋمەتتىك-ەكونوميكالىق ءىس-شارالاردى قامتاماسىز ەتۋگە باعىتتالعان اۋقىمدى زاڭ جوبالارى بويىنشا جۇمىستاردى جالعاستىراتىن بولادى. سونىمەن قاتار، ينفراقۇرىلىمدىق جانە يندۋستريالىق باعدارلامالاردى ىسكە اسىرۋعا باعىتتالعان زاڭ جوبالارى دا بار. اقتاۋدا وتكەن كاسپي ماڭى مەملەكەتتەرىنىڭ V سامميتىندە بەس مەملەكەتتىڭ پرەزيدەنتتەرى قول قويعان كاسپي تەڭىزىنىڭ قۇقىقتىق مارتەبەسى تۋرالى كونۆەنتسيا دا راتيفيكاتسيالاناتىن بولادى. جالپى العاندا قازىرگى كەزدە پارلامەنتتە ەلۋدەن استام زاڭ جوباسىمەن جۇمىستار جۇرگىزىلىپ جاتىر. تەك سەناتتىڭ قورجىنىندا 8 زاڭ جوباسى بولسا، ونىڭ ىشىندە ءدىن ماسەلەلەرى، جارناما، ستاندارتتاۋ تۋرالى قۇجاتتار بار.

بيۋرو جۇمىسىن اياقتاي كەلىپ سەنات توراعاسى دەپۋتاتتار جۇمىسىنىڭ ساپاسىن ارتتىرۋعا، سونداي-اق پارلامەنتتىك باقىلاۋدىڭ ءرولىن كۇشەيتۋگە ارىپتەستەرىنىڭ نازارىن اۋداردى. «ءاربىر پارلامەنتتىك تىڭداۋدا قابىلدانعان ۇسىنىستاردىڭ ورىندالۋى كوميتەتتەردىڭ تۇراقتى باقىلاۋىندا بولۋى ءتيىس»، - دەپ اتاپ ءوتتى ق.توقاەۆ.

Abai.kz

0 پىكىر