حوش، حوش، «ماقاۋ» دەپۋتاتتار!
استانا. ۇكىمەت ءۇيىنىڭ الدىندا ءماجىلىس دەپۋتاتتارى قاز-قاتار ءتىزىلىپ تۇر.
باستارى سالبىراپ كەتكەن. شاشتارى جالبىراپ كەتكەن. «ءبىز داعدارىستىڭ قۇربانىمىز!» دەگەن لوزۋنگى كوتەرىپ تۇرعاندارى دا بار. دەپۋتات بولعاننان ۇيقىسى قانباعاندارى كوزدەرىن جۇمىپ، قالعىپ-مۇلگىپ تۇر. استانا ايازى ولاردىڭ بەتتەرىنەن شىمشىپ تا وياتا الار ەمەس. دەپۋتاتتاردىڭ ءبىرازى اۋىزدارىنا «سكوتچ» جابىستىرىپ الىپتى. مويىندارىنا «ءبىز ماقاۋ دەپۋتاتپىز. ۇندەمەي كەلدىك.ۇندەمەي كەتەمىز!» دەگەن انىقتامالار ءىلىپ الىپتى. سەناتورلار دا وسىندا. ءبىرازى ساعىز شايناپ تۇر.
ءبىر كەزدە ءماجىلىس توراعاسى كوز جاسىن كولدەتىپ، ورتاعا شىقتى:
– ۋا، حالايىق! - دەدى ونىڭ داۋىسى دىرىلدەپ، – بىزگە «كونەتس». داعدارىس بار، مىقتى جوسپارلار بار، سولاردى باعىندىرۋ ءۇشىن جاڭا دەپۋتاتتار سايلانسىن دەگەن شەشىمگە كەلدىك. ءبىز شارشادىق. سەكسەن زاڭ قابىلدادىق. جاڭا وتەتىن سايلاۋدى دا ساعىندىق... ەندى تارايمىز. حوش بولىڭىزدار، قازىر حالىقتىڭ دەپۋتاتتارمەن جاپپاي قوشتاسۋ ءراسىمى باستالادى!
سول ەكەن، ەڭىرەگەن حالىق بىرتىندەپ كەزەككە تۇرىپ، قاز-قاتار تۇرعان دەپۋتاتتارمەن قۇشاقتاسىپ قوشتاسا باستادى. ءبىرى: «ءۇش جىل بويى نە بىتىردىڭدەر ءوزى؟ حالقىڭا نە بەردىڭ؟» دەپ سۇراسا، ەكىنشىسى: «وڭكەي ماقاۋلار! ءبىرىڭ حالىق جاعدايىن ايتىپ سويلەدىڭدەر مە؟ سەكسەن زاڭنىڭ ءبىرازىن قابىلداماي، كەرى قايتاردىڭدار ما؟ ماقاۋسىڭدار! ۇكىمەتتىڭ ۇندەمەستەرىسىڭدەر!» دەپ جاتتى.
مەن دە قىسىلىپ-قىمتىرىلىپ، حالىقتىڭ ءبىر وكىلى بولىپ كەلە جاتىرمىن.
– سالەمەتسىز بە؟ - دەپ سۇرادىم ءبىر دەپۋتاتتان.
– حوش بول، حالقىمنىڭ ءبىر مۇشەسى! - دەپ جىلامسىرادى الگى دەپۋتات.
– كەشىرىڭىز، سىزدەردىڭ باستارىڭىز ىستەي مە ءوزى؟ جول قوزعالىسىنا قاتىستى زاڭدى ساعىزشا شاينادىڭىزدار. جول ەرەجەسىن بۇزعانى ءۇشىن تولەنەتىن ايىپپۇلدى ايعا ءىلىپ قويدىڭىزدار دا، ەندى سونى تۇسىرە الماي ۇكىمەتكە جۇگىردىڭىزدەر. ۇكىمەت كىرپىگىن دە قوزعالتقان جوق. اۆتو-ورىندىققا بايلانىستى «جىندى» زاڭدى قابىلداپ جىبەرىپ، ارتىنان اڭىرادىڭىزدار. سول تىرلىكتەرىڭىزگە ۇيالىپ تاراپ جاتىرسىزدار ما؟ - دەپ سۇرادىم مەن. ول قۇلاعىما سىبىرلادى: «كەتشى-ەي، موزگامدى مىجىماي!» ونىمەن قيماي قوشتاسىپ، كەلەسى دەپۋتاتتى قۇشاقتادىم. بايعۇس اڭقىلداق ەكەن: «مەن جوقتا دوستارىم سىرتىمنان سايلاپ جىبەرىپتى. شىنىمدى ايتسام، ساۋاتىم دا شامالى. تارايتىنىمىزعا قۋانىپ وتىرمىن. 600 مىڭ ايلىقتى بوسقا الىپ جۇرگەنىمە ۇيالۋشى ەدىم!» دەپ اقتالدى. ونى قۇشاقتاپ، ارقاسىنان قاعىپ، «ەركەك ەكەنسىز!» دەدىم. كەلەسى دەپۋتات اجەيمەن قۇشاقتاي كورىستىم. «پارتيالىق تىزىممەن سايلانىپ ەدىم، شىراعىم، حوش بول!» - دەدى. اجەي دەپۋتاتتىڭ اعارعان شاشىن تاراپ، قولىن قىستىم.
حالىق تۇگەل قوشتاسىپ بولدى. قۋانىشتان جىلاپ تۇردى. «ەندى ءبىزدى ويلايتىن جاڭا دەپۋتاتتار كەلەدى!» دەپ داۋىستاعاندار دا بار. ءبىر كەزدە ءماجىلىس توراعاسى اسپانعا پيستولەتپەن اتىپ قالدى دا:
– تاراڭدار! - دەپ بۇيىردى. سول ەكەن، دەپۋتاتتار تاراي باستادى. 107 دەپۋتاتتىڭ 30-ى تاراپ، شال-شاۋقان دەپۋتاتتار قايتا سايلانۋ ءۇشىن ورىندارىندا قالىپ قويدى. حالىق ودان بەتەر اياپ كەتتى. ءتىپتى ارامىزداعى بىرەۋ: «وسىدان اكەمدى ۇيدەن قۋىپ شىعىپ، ماجىلىستەگى «قارتتار ۇيىنە» وتكىزبەسەم بە؟» دەپ قالدى. ەندى سايلاۋدى كۇتەمىز. ەستۋىمىزشە، «ماقاۋ» كانديداتتار دايىندالىپ جاتىر دەيدى. تاعى ءبىر جىپ-جىلى جاڭالىق: كەلەسى دەپۋتاتتار ءۇشىن ءماجىلىس زالىندا ورىندىقتار بولمايدى ەكەن. ولار كورپە-جاستىقتارىن قوسا اكەلىپ، شالقالارىنان جاتىپ الىپ زاڭ قابىلدايتىن بولماق! قۋانىپ ءجۇرمىن، قالاي دەپۋتات بولسام ەكەن ا؟

مۇحتار شەرىمنىڭ facebook پاراقشاسىنان

Abai.kz