ورالدا ۇلكەن داۋ بولىپ تۇرعان يساتاي-ماحامبەت ەسكەرتكىشى ماسەلەسى جانە ونىڭ بولاشاقتا ورنالاسۋى تۋرالى اقجايىقتىڭ ابىزى، ارداگەر جۋرناليست تيحون الىپقاليەۆ اعامىزبەن كەزدەسۋدىڭ ءساتى ءتۇستى. وبلىسقا تانىمال قالامگەر تيحون اعامىز «Abai.kz» اقپاراتتىق پورتالىنا «كولگىنوۆ يساتاي مەن ماحامبەتكە ماي قىزمەتكەرىنىڭ مىندەتىن جۇكتەمەك پە?» اتتى كولەمدى سىني ماقالاسىن جازعان-دى.

اۋزى دۋالى، ءسوزى ءۋالى اعامىزدان ءوزىنىڭ سىني ماقالاسىنداعى ءمان-جايدى تولىعىراق ءبىلۋ ءۇشىن جانە يساتاي-ماحامبەت ەسكەرتكىشى تۋرالى ءوزىنىڭ وي-پىكىرىن سۇراعان ەدىم. تيحون اعامىز ءوز ءسوزىن تاعى دا قايتالاپ يساتاي-ماحامبەتتىڭ ەسكەرتكىشى ورال قالاسىنىڭ ورتاسىندا، ناقتىراعى تەمىرجول ۆوكزالى الدىندا ورنالاسۋ كەرەك. قوس باتىردىڭ ءمۇسىنىن قوياتىن ورنىندى ەش تالقىلاۋدىڭ جانە ەش قورقۋدىڭ قاجەت جوق. چاپاەۆ ەسكەرتكىشى يدەولوگيالىق تۇرعىدا ەسكىردى، ونى قالانىڭ وزگە جەرىنە كوشىرۋمىز كەرەك دەپ قاداپ ايتتى.

قوس باتىر مۇسىندەرى قالا ورتالىعىندا اسقاقتاپ تۇرۋى ءتيىس. بۇل جەرگە حالىق كەلىپ دەمالىپ بالا-نەمەرەلەرىنە ۇلت-ازاتتىق كوتەرىلىس كوسەمدەرىنىڭ قازاق حالقى الدىنداعى ەرەن ەرلىكتەرىن ماقتانىشپەن ايتىپ، ەسىمدەرىن ءار ازامات دارىپتەۋلەرى كەرەك. ال وقۋ ورىندارىنىڭ ستۋدەنتتەرى مەن مەكتەپ وقۋشىلارىن وسى جەرگە اكەلىپ رۋحاني-تاربيەلىك شارالاردى ءجيى وتكىزىپ تۇرۋلارى قاجەت، سوندا عانا حالىق رۋحتانىپ، جاستاردىڭ پاتيوتتىق سەزىمدەرى ارتادى دەيدى. ايتپەسە، وبلىس اكىمدىگى يساتاي-ماحامبەت ەسكەرتكىشىن ايدالاعا زاپراۆكا قاسىنا سالدىرىپ قوس باتىردىڭ رۋحتارىن بەنزينگە ۋلاتىپ، ولارعا گاي قىزمەتىن جۇكتەمەكشى مە؟! قۋ ايدالاعا ەشكىم بارمايدى جانە جۇرت بارمايتىن ايدالاعا قارجى شىعىنداپ دەمالىس باعى سالىنبايتىنى بەلگىلى. ۇرپاقتارى ءبىز ءۇشىن جاندارىن قيعان باتىرلاردىڭ رۋحتارىن قورلاتىپ، مىناداي كەلەڭسىزدىككە حالىق بولىپ جول بەرمەيمىز دەپ اشىنا ويىن جەتكىزدى. جانە باتىرلاردىڭ مۇسىندەرىن جاساۋعا جەرگىلىكتى جەردىڭ جوعارى بىلىكتى ساۋلەتشى، سۋرەتشى، تاريحشى ماماندارىن وسى ىسكە جۇمىلدىرۋ كەرەك، سوندا عانا ول ءمۇسىننىڭ حالىقتىڭ كوڭىلدەرىنەن شىعارى ءسوزسىز دەپ ءسوزىن تۇيىندەدى.

10 قىركۇيەكتە وسى ماسەلە بويىنشا بقو اكىمىنىڭ ورىنباسارى، وبلىستىق تاريحي-مادەني مۇرالارىن، تاريح جانە مادەنيەت ەسكەرتكىشتەرىن قورعاۋ جانە مەموريالدىق تاقتالاردى ورناتۋ ماسەلەلەرى جونىندەگى كوميسسياسىنىڭ توراعاسى گ.وسپانقۇلوۆتىڭ قابىلداۋىنا بىرگە كىرىپ حالىقتىڭ ۇسىنىس-تالابىن جەتكىزەتىن بولىپ شەشتىك. ەگەر حالىقتىڭ ۇسىنىس-تالابىنا وبلىس اكىمدىگى كوڭىل بولمەي، ءىسىمىز وڭىنان شەشىلمەگەن جاعدايدا يساتاي-ماحامبەت ەسكەرتكىشىن ورال قالاسىنىڭ تج ۆوكزالى الدىندا چاپاەۆ ەسكەرتكىشى ورنىنا ورنالاستىرۋ ءۇشىن جەرگىلىكتى تۇرعىنداردان قول جيناپ، قر پرەزيدەنتىنە حات جازامىز جانە اقپاراتتىق قۇرالداردى قاتىستىرىپ جينالىس پەن ءباسپاسوز ءماسليحاتىن جاسايتىن بولىپ كەلىستىك.

ءسوز اراسىندا تيحون اعامىز جەرگىلىكتى جەردىڭ كوپشىلىك زيالىلارى قارا باستارىن عانا ويلاپ، يساتاي-ماحامبەت ەسكەرتكىشىنىڭ ورنى داۋ بولىپ جاتىرعاندا ءۇنسىز وتىرعاندارىنا قىنجىلىس ءبىلدىردى. كەتەردە اقجايىقتىڭ ابىزى وسى ماسەلەنى كوتەرگەن ءۇشىن ماعان، سىني ماقالامىزدى ەش قايمىقپاي جاريالاعان "Abai.kz» اقپاراتتىق پورتالىنىڭ باسشىسى مەن ۇجىمىنا ريزاشىلىعىن ءبىلدىرىپ، اق باتاسىن بەردى، جۇمىستارىنا تابىس تىلەدى. ابىز اعانىڭ اق باتاسى قابىل بولسىن دەي وتىرىپ، «ءاۋمين!» دەپ بەتىمدى سيپادىم.

شىنىندا جەرگىلىكتى جەردىڭ اق شاعالاسى، مەملەكەتتىك ماراپاتتى ءۇيىپ العان كەيبىر ايتىس اقىندارى مەن عالىمدارى، جازۋشىلارى مەن جۋرناليستەرى وسىنداي ۇلى ىستە نەگە ءۇنسىز وتىر؟! الدە ولاردى ۇلت مۇددەسى ەش قىزىقتىرماي ما؟ انشەيىندە، جاستاردىڭ الدىندا ۇلتجاندى بولىپ كورىنىپ پاتريوتتىق تاربيە تۋرالى بۇلبۇلداي سايرايدى. ءسوزى مەن ىستەرى ەكى جاقتا بولسا، مىنداي زيالىلاردىڭ قۇندارى جاستار مەن حالىق ءۇشىن ءبىر تيىن.

تالعات قاتاۋوۆ

Abai.kz