"بۇگىنگى قازاق رۋشىل" دەگەن ساندالعان ءسوز! قازاقتىڭ رۋشىل ەمەس ەكەنىنە اسىرەسە سوڭعى كۇندەرى كوزىم ابدەن جەتتى.

مەكتەپ وقۋشىلارى اراسىندا باتىرلار جىرىن جاتقا ايتۋدان "جاقسىلار، داستان ايتايىن..." اتتى بايقاۋدى بيىل ەكىنشى جىل قاتارىنان وتكىزگەلى وتىرمىز. وكىنىشكە قاراي، ەلباسىنىڭ "بولاشاققا باعدار: رۋحاني جاڭعىرۋ" باعدارلامالىق ماقالاسىنىڭ اياسىندا وتەتىن وسىناۋ ومىرشەڭ جوبانى بيىل دا بيۋدجەتكە ەندىرە المادىق.

بيۋدجەتكە ەندىرە الماعاننان كەيىن نە ىستەيمىز؟ ارينە، دەمەۋشىلەردىڭ قولداۋىنا ارقا سۇيەگىمىز كەلەدى. ال، بۇگىندە دەمەۋشى تابۋ قۇدايدىڭ ىرزاشىلىعىن تابۋدان كەيىنگى ۇلكەن پروبلەمالاردىڭ ءبىرى بولىپ تۇر. قالتالى اعايىننىڭ الدىنا ۇلت رۋحانياتى جايلى اڭگىمە ايتا بارساڭ ءوزىنىڭ جاعدايىن ايتىپ، مەسەلىڭدى قايتارادى. سوسىن "الپامىس باتىر" جىرىنداعى:

"جيدەلى-بايسىن جەرىندە،

قوڭىرات دەگەن ەلىندە..." دەگەن ولەڭ جولدارى ەسىڭە سارت ەتە قالادى دا ء"بىر مىرزالىق تانىتسا، وسى كىسى مىرزالىق تانىتادى" دەگەن ويمەن قالتالى-اۋ دەگەن قوڭىرات اعايىنداردىڭ اۋىلىن بەتكە الاسىڭ. "وسىنداي دا وسىنداي، اتاڭىزدىڭ اتىن جاڭعىرتۋعا ۇلەس قوسساڭىزشى" دەپ اڭگىمەڭدى تۇيىندەيسىڭ.

اڭگىمە باعىشتاپ وتىرعان كىسىڭ "مۇنىڭ ماعان نە قاتىسى بار؟" دەگەندەي ساعان اڭتارىلا قارايدى. اتاسى ءۇشىن ارقالانىپ سالا بەرمەيدى! انىق رۋشىل بولسا، اتاسىن ايتىپ تۇرعاندا ارقاسى قوزىپ كەتەر ەدى عوي.

الپامىس ءوزىنىڭ اتاسى ەكەنىن ومىرىندە ءبىرىنشى رەت سەنەن ەستىپ تۇرعانىن ايتىپ قالاتىندار دا كەزدەسەدى. ء"بىز پالەن دەگەن رۋمىز، بىزدەن مىناداي باتىرلار شىققان" دەگەندى ايتسا، اشەيىن بايقاماعاننان ايتىپ قالۋى مۇمكىن، رۋشىلدىقپەن، اتاسىن جاقسى كورگەننەن ايتپايدى.

ال، ءبىز قازاق رۋشىل دەپ ويلايمىز... قايداعى رۋشىل؟..

اباي بالاجاننىڭ Facebook-تەگى پاراقشاسىنان

Abai.kz