بەيسەنبى, 15 ءساۋىر 2021
دەپ جاتىر 2083 3 پىكىر 12 قىركۇيەك, 2018 ساعات 10:35

حيدجاپ كيگەن وقۋشىلاردىڭ اتا-انالارى اكىمشىلىك جاۋاپقا تارتىلدى

تۇركىستان وبلىسىنىڭ ماقتارال اۋدانىندا فەرداۋسي اتىنداعى مەكتەپتە ورامالىن شەشۋدەن باس تارتقان وقۋشى قىزداردى قولداپ، مەكتەپ الدىندا نارازىلىق بىلدىرگەن سەگىز اتا-انا اكىمشىلىك جاۋاپقا تارتىلدى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى.

دەپارتامەنت مالىمەتىنشە، ءبىلىم جانە عىلىم مينيسترلىگىنىڭ مەكتەپ فورماسىن كيۋ ءتارتىبىن ساقتاۋ جايلى بۇيرىعىن وقۋشىلارعا جانە ولاردىڭ اتا-انالارىنا ءتۇسىندىرۋ جۇمىسى جۇرگىزىلگەن. بۇل جۇمىس بارىسىندا فەرداۋسي اۋىلىنىڭ سەگىز تۇرعىنىنا اكىمشىلىك شارا قولدانىلعان.

ءتورت ادامعا اكىمشىلىك قۇقىق بۇزۋشىلىق تۋرالى كودەكستىڭ "بيلىك وكىلىنىڭ زاڭدى وكىمىنە نەمەسە تالابىنا باعىنباۋ" بابى بويىنشا، ءتورت ازاماتقا، "ۇساق بۇزاقىلىق" بابى بويىنشا اكىمشىلىك حاتتامالار تولتىرىلىپ، سوت قاۋلىسىمەن ءتۇرلى جازا كەسىلگەن.

فەرداۋسي مەكتەبىنىڭ ديرەكتورى جانار مامىروۆانىڭ قىركۇيەكتىڭ 11-ءى كۇنى ازاتتىققا ايتۋىنشا، قازىر ورامال تارتاتىن ءتورت وقۋشى قىز ساباقققا كەلمەي ءجۇر. ولاردىڭ ەكەۋىنىڭ اتا-اناسىنا وبلىستىق ءبىلىم سالاسىنداعى باقىلاۋ دەپارتامەنتى ايىپپۇل سالعان.

“جاڭا وقۋ جىلىنان باستاپ ءارتۇرلى سەبەپپەن 15 وقۋشى باسقا مەكتەپتەرگە اۋىستى. مەكتەپتە 10 پسيحولوگ ورامالىن شەشكەن وقۋشى قىزدارمەن ءجۇمىس جۇرگىزىپ، ورامالسىز جۇرۋگە بەيىمدەپ جاتىر" دەيدى ديرەكتور.

قىركۇيەكتىڭ 6-سى كۇنى فەرداۋسي اۋىلىندا مەكتەپكە ورامالىن شەشىپ بارۋدا باس تارتقان 13 وقۋشى قىزدىڭ اتا-اناسىنا بەس ايلىق ەسەپتىك كورسەتكىشكە ء(بىر ايلىق ەسەپتىك كورسەتكىش - 2405 تەڭگە) تەڭ ايىپپۇل سالىنعان.

​فەرداۋسيدەگى ورامال داۋى ءبىلىم جانە عىلىم مينيسترلىگىنىڭ 2016 جىلى قاڭتاردا شىعارعان بىرىڭعاي مەكتەپ فورماسى ەرەجەسى تۋرالى №26 بۇيرىعىنان كەيىن تۋىنداي باستاعان. قۇجاتتا مەكتەپتە قانداي دا ءبىر ءدىندى ناسيحاتتايتىن كيىم كيۋگە تىيىم سالىنعان. بيلىك بۇيرىقتىڭ ورىندالۋىن تالاپ ەتسە، اتا-انالار ءداستۇردى العا تارتىپ، قىزدارىنىڭ مەكتەپكە ورامالسىز بارۋىنا قارسى شىقتى.

Abai.kz

3 پىكىر