بەيسەنبى, 19 قىركۇيەك 2019
بيلىك 1096 2 پىكىر 12 قىركۇيەك, 2018 ساعات 14:12

ءبىرتانوۆ: جاڭا زاڭ جوباسى قابىلدانسا، ماسەلەنىڭ ءبارى رەتتەلەدى

ورتالىق كوممۋنيكاتسيا قىزمەتىندە وتكەن بريفينگتە دەنساۋلىق ساقتاۋ ءمينيسترى ەلجان ءبىرتانوۆ تەگىن مەديتسينالىق كومەكتىڭ كەپىلدىك بەرىلگەن كولەمىنىڭ شەڭبەرىندە حالىقتى دارىلىك زاتتارمەن قامتاماسىز ەتۋ مەن قازاقستان رەسپۋبليكاسىندا فارماتسەۆتيكا سالاسىنىڭ جاعدايى جانە دامۋى تۋرالى ايتتى.

"وتكەن جىلدىڭ باسىندا ەلباسىمىز نۇرسۇلتان نازارباەۆ دەنساۋلىق ساقتاۋ مينيسترلىگىنە تەگىن ءدارى-دارمەكپەن قامتۋ ماسەلەسىن جانە ءدارى-دارمەكتەردىڭ باعاسىن رەتتەۋ بويىنشا ناقتى تاپسىرما بەردى. ەكىنشى تاپسىرما بويىنشا ارنايى زاڭ ازىرلەندى. ول قازىرگى ۋاقىتتا پارلامەنتتە قارالىپ جاتىر، جىلدىڭ اياعىنا دەيىن شەشىم قابىلدانادى دەپ سەنەمىز", - دەدى ءبىرتانوۆ.

سونداي-اق، ول 2019 جىلدىڭ قاڭتار ايىنان باستاپ ەلىمىزدەگى بارلىق دارىحاناداعى ءدارى-دارمەكتەردىڭ باعاسىن رەتتەۋ مەحانيزمى ەنگىزىلەتىنىن ايتتى.

"وزدەرىڭىز بىلەسىزدەر، ءبىر ءدارىنىڭ باعاسى ەكى ءدارىحانادا ەكى ءتۇرلى بولاتىن جاعدايلار بولادى. كەي ءدارى-دارمەكتىڭ باعاسى جازدا باسقا، قىستا باسقا باعادا ساتىلادى. جاڭا زاڭ جوباسى قابىلدانسا، بۇل ماسەلەنىڭ ءبارى رەتتەلەدى", - دەدى ول.

وتكەن جىلدان باستاپ ءدارى-دارمەكتەردى ساتىپ الۋ تۋرالى بىرنەشە جاڭا نورماتيۆتىك-قۇقىقتىق اكتىلەر قابىلداندى. تەگىن ءدارى-دارمەكتەردى ساتىپ الۋ پروتسەسى ورتالىقتاندىرىلعان، ياعني قازىرگى ۋاقىتتا بۇكىل ءدارى-دارمەك "سق-فارماتسيا" كومپانياسى ارقىلى ساتىپ الىنادى.

"بيىل 8 اي ىشىندە 1,5 ميلليوننان استام ادام تەگىن دارىمەن قامتىلدى. جىل سوڭىنا دەيىن 3,5 ميلليون ادام تەگىن دارىمەن قامتىلادى دەپ جوسپارلانعان. تۇسىنىكتى بولۋى ءۇشىن تاعى ءبىر قايتالاپ ايتا كەتەيىن، تەگىن ءدارى-دارمەكتەر تىزىمىنە كىرەتىن دارىلەر عانا تەگىن بەرىلەدى. ول ەمدەلۋ ءۇشىن قاجەتتى 100% ءدارىنىڭ 30-ى دەپ اتاۋعا بولادى. ەگەر تەگىن بەرىلەتىن ءدارى-دارمەكتى جىمقىرۋ نە ساتۋ سياقتى زاڭسىز جاعداي بولسا، فارماتسيا كوميتەتىنىڭ جەرگىلىكتى دەپارتامەنتىنە حابارلاپ ايتۋ كەرەك. ونداي جاعدايدا قاجەتتى اكىمشىلىك نەمەسە قۇقىقتىق شەشىمدەر قابىلدايمىز", - دەيدى ەلجان ءبىرتانوۆ.

Abai.kz

2 پىكىر