جۇما, 29 ناۋرىز 2024
بارەكەلدى! 11676 10 پىكىر 13 قىركۇيەك, 2018 ساعات 10:05

يساتاي-ماحامبەت ەسكەرتكىشى قالانىڭ ىشىندە ورناتىلاتىن بولدى

رەداكتسيا: 22 تامىزدا «Abai.kz» اقپاراتتىق پورتالىنا بەلگىلى قوعامدىق بەلسەندى تالعات قاتاۋوۆتىڭ  "پۋشكينگە ەسكەرتكىش قويعان ورال ماحامبەتكە بيۋست تە ورناتقان جوق"اتتى ماقالاسى جاريالاعان ەدى. سول ماقالاعا باتىس قازاقستان وبلىسى اكىمدىگىنىڭ ءباسپاسوز قىزمەتى  «ورالدا يساتاي مەن ماحامبەتكە ەسكەرتكىش تۇرعىزىلادى» دەگەن جاۋاپ بەردى. ىلە-شالا تالعات قاتاۋوۆ "كولگىنوۆتىڭ يساتاي-ماحامبەت ەسكەرتكىشىن «زاپراۆكانىڭ» قاسىنا ورناتۋى - ارۋاقتى قورلاۋ!" دەگەن ۇندەۋ جاريالادى. ارتىنشا باتىس قازاقستان وبلىستىق مادەنيەت باسقارماسى قوعامدىق بەلسەندىگە جانە جاۋاپ بەردى. "ەسكەرتكىشتى قالا قاقپاسىنا ورناتۋ - الەمدىك تاجىريبە" اتتى ماقالا جاريا بولدى.

بۇگىن رەداكتسيامىزدىڭ ەلەكتروندى پوشتاسىنا بەلگىلى قوعام بەلسەندىسى تالعات قاتاۋوۆتان ءۇشبۋ حات كەلىپ ءتۇستى. وندا باتىس قازاقستان وبلىسى جانە ورال قالاسى اكىمدىگى شۇعىل جيىن وتكىزىپ، يساتاي-ماحامبەت ەسكەرتكىشىن قالا ىشىنە ورنالاستىراتىنىن سۇيىنشىلەدى.

ءبىز ماحامبەت پەن يساتايدىڭ ەسكەرتكىشى ويداعىداي ورناتىلۋى ءۇشىن ەكى تاراپتىڭ دا تىزگىنىن تارتپايتىنىمىزدى ەسكەرتەمىز. 


Abai.kz اقپاراتتىق پورتالى

وسى كەزگە دەيىن ۇلت-ازاتتىق كوتەرىلىس كوسەمدەرى يساتاي-ماحامبەت باتىردىڭ ەسكەرتكىشى ورال قالاسىنان 20 كم جەردەگى قۋ ايدالاعا ورنالاسادى دەپ كەلگەن باتىس قازاقستان وبلىسى جانە ورال قالاسىنىڭ اكىمدىگى  12 قىركۇيەكتە شۇعىل جيىن وتكىزىپ، حالىقتىڭ نارازىلىعىنان سەسكەنىپ،  اۋەلگى شەشىمدەرىن وزگەرتىپ، قوس باتىردىڭ ءمۇسىنىن قالانىڭ ىشىنە ورنالاستىراتىن بولىپ شەشتى.

"مەن ىستەدىم دەگەنشە،

مىڭ ىستەدى دەسەڭشى.

ەر ىستەدى دەگەنشە، "

ەل ىستەدى دەسەڭشى" دەپ باتىر باۋىرجان مومىشۇلى ايتقانداي، بۇل بارشا حالىقتىڭ ۇلتتىق مۇددەدەگى ۇلى جەڭىسى. قۋانىش قۇتتى دا ۇزاعىنان بولسىن!

ەل-جۇرت حالىقتىڭ كۇن ەكەنىن، كۇننەن اسقان بيىك جوق ەكەنىن جانە حالىق جينالسا كۇش، بىرىكسە المايتىن قامالى جوعىن، ءبىر جەڭنەن قول شىعارعاندا جەڭىس بولارىن  تاعى دا دالەلدەدى.

ەل پرەزيدەنتى نۇرسۇلتان نازارباەۆ ماحامبەت وتە­مىس­ۇلىنىڭ تۋعانىنا 200 جىل تولۋىنا ارنالعان جيىندا: «قازاق حالقىنىڭ ءوزىنىڭ جەر بەتىنەن جوعا­لىپ كەتپەي، ىرگەلى ەل رەتىندە ساقتالىپ قالعانى – ونىڭ ەركىندىك ءسۇي­گىش ەرىك-جىگە­رىنىڭ، اسقاق رۋحىنىڭ ارقاسى. وسى جولدا ارعى-بەرگى زامان­داردا ورىن العان باس كوتەرۋلەردىڭ، قوزعالىس – كوتەرىلىستەردىڭ ارقاسى. ەلى مەن جەرى ءۇشىن جانىن پيدا ەت­كەن بوز­داقتاردىڭ ارقاسى. يساتاي مەن ماحامبەت باسقارعان حالىق قوزعالىسى سولار­دىڭ ءبىرى ەمەس، بىرەگەيى»، – دەپ باعا بەر­گەن بولاتىن. ەندەشە، ۇرپاقتارى يساتاي تايمانۇلى مەن ماحامبەت وتەمىسۇلىنىڭ بيىك رۋحى ال­دىندا با­سى­مىز­دى يە وتىرىپ، وتكەنگە سالاۋات ايتىپ، قوس باتىر ارمانداعان ازاتتىق زامان­دا ولاردىڭ ايباتتى مۇسىندەرى ورال قالاسىنداعى بارلىق ەسكەرتكىشتەردەن اسا جوعارى بولىپ، باس ەسكەرتكىش رەتىندە ويىپ تۇرىپ ورىن الادى دەپ سەنەمىز.

يساتاي-ماحامبەت ەسكەرتكىشىنىڭ داۋلى ماسەلەسىنە ۇلەس قوسقان بارشا قازاق حالقىنا، قولداۋ كورسەتىپ، ءۇن قاتقان Facebook قولدانۋشىلارىنا، ورالداعى ۇلتشىلدار مەن قوعام بەلسەندەرىنە جانە وسى ماسەلەنى ەشكىمنەن قايمىقپاي جاريالاپ كەلگەن «Abai.kz» اقپاراتتىق پورتالىنا  حالىق اتىنان العىس بىلدىرەمىز!  سىزدەردى اتا-بابا جانە قوس باتىردىڭ ارۋاقتارى قولداسىن! «Abai.kz» ۇجىمىنا شىعارماشىلىق تابىس تىلەي وتىرىپ، ۇلتتىق مۇددە ماسەلەسىنە اتسالىسىپ، حالىقتىڭ العىسىن الا بەرىڭزدەر دەگىم كەلەدى. «ەشتەن كەش جاقسى» دەمەكشى حالىقتىڭ نارازىلىعى مەن تالاپتارىن ورىنداعان وبلىس جانە قالا اكىمدىگىنە جانە مادەنيەت باسقارماسىنا دا ريزاشىلىعىمىزدى بىلدىرەمىز.

تالعات قاتاۋوۆ

ورال قالاسى

Abai.kz

10 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3563