پارلامەنت سەناتىندا ەلىمىزدىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى، III-V شاقىرىلعان پارلامەنت ءماجىلىسىنىڭ دەپۋتاتى ەلەنا تاراسەنكونىڭ «جايىق - ءومىر وزەنى» كىتابىنىڭ تۇساۋكەسەرى ءوتتى.

سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى بىرعانىم ءايتىموۆا شارانى اشا كەلىپ، جايىق وزەنىنىڭ بويىمەن 22 جىل جۇرگىزىلىپ جاتقانىن بىرلەسكەن ەكسپەديتسيا ءبىزدىڭ ولكەمىزدىڭ تاريحى مەن مادەنيەتىن زەرتتەۋگە، جاستارعا پاتريوتتىق تاربيە بەرۋگە جانە جايىق وزەنى ايدىنىنىڭ ەكولوگيالىق ماسەلەلەرىن كوتەرۋگە ءوز ۇلەسىن قوسقانىن اتاپ ءوتتى.

ب.ءايتىموۆا بىرلەسكەن ەكسپەديتسيا اتقارعان اۋقىمدى جۇمىستاردىڭ ارقاسىندا 2016 جىلى جايىق وزەنىنىڭ ەكوجۇيەسىن ساقتاۋ جونىندەگى ۇكىمەتارالىق كەلىسىمگە قول قويىلعانىن، جايىق ترانسشەكارالىق وزەنى ايدىنىنىڭ ەكوجۇيەسىن ساقتاۋ جونىندەگى كوميسسيا قۇرىلعانىن ەسكە سالدى. «كىتاپتا ەكسپەديتسيانىڭ تاريحى، وسىناۋ ماڭىزدى ىسكە قاتىسقان ءاربىر ازامات تۋرالى، ەلىمىزدىڭ كەلەشەگى جانە ونىڭ بولاشاق ۇرپاعى ءۇشىن جاۋاپكەرشىلىك جايىندا جان-جاقتى جازىلعان»، - دەدى سەناتور.

شارا بارىسىندا «قoعaمدىق كەلىسىم» رەسپۋبليكالىق مەكەمەسىنىڭ ديرەكتورى الەكساندر Taراكوۆ، سەنات دەپۋتاتى، قازاقستان رەسپۋبليكاسىنداعى بالا قۇقىقتارى جونىندەگى ۋاكىل ساۋلە ايتپاەۆا، سەنات دەپۋتاتى سەرىك بەكتۇرعانوۆ، ادام قۇقىقتارى جونىندەگى ۇلتتىق ورتالىقتىڭ باسشىسى سەرىك وسپانوۆ كىتاپ جايىندا ءوز ويلارىن ورتاعا سالدى.

تۇساۋكەسەرگە سەنات پەن ءماجىلىس دەپۋتاتتارى، ۇكىمەت وكىلدەرى مەن قوعامدىق جانە ساياسي قايراتكەرلەر، جوعارى وقۋ ورىندارى كىتاپحانالارىنىڭ قىزمەتكەرلەرى مەن ستۋدەنتتەرى قاتىستى.

ەلەنا تاراسەنكو شاراعا قاتىسۋشىلاردىڭ كىتاپقا دەگەن ىقىلاسىنا  العىس ءبىلدىرىپ، جيناقتىڭ تاۋەلسىز قازاقستاننىڭ تاريحناماسىنان ورىن الاتىنىنا ءۇمىتىن جەتكىزدى. اۆتور سونداي-اق پارلامەنت كىتاپحاناسىنىڭ، ەلىمىزدىڭ ۇلتتىق كىتاپحاناسىنىڭ جانە س.سەيفۋللين اتىنداعى قازاق اگروتەحنيكالىق ۋنيۆەرسيتەت پەن ل.ن.گۋميلەۆ اتىنداعى ۋنيۆەرسيتەتتىڭ كىتاپحانالارى وكىلدەرىنە كىتابىن تارتۋ ەتتى.

Abai.kz